NEHEMIAH 12 - Bawm Common Language Bible Version

Bâwlpu Leh Levi Tla Rinnâk

¹ Hi bang bâwlpu leh Levi tla hi sal tângnâk thawk hen Sealtiel fapa Zerubabel leh Bâwlpu Lian Josua tla hen hawng kîr mi tla chu an si:

^2-7 Bâwlpu tla: Seraiah, Jeremia, Ezra, Amariah, Maluk, Hatus, Sekaniah, Rehum, Meremoth, Ido, Ginethoi, Abijah, Mijamin, Maadiah, Bilgah, Semaiah, Joiarib, Jedaiah, Sallu, Amok, Hilkiah, Jedaiah. Hi bang tla hi Josua dam liauah an hâwi bâwlpu lakah ruitu an si.

⁸ Levi tla: Hi bang tla hi lâwmthusimnâk lasaktu lakah a hotu dauh tla an si: Jeshua, Binui, Kadmiel, Serebiah, Juda leh Mataniah.

⁹ Hi bang tla hi lapawl sak lakah mawhphurhtu tla an si: Bakbukiah, Uno leh an Levi hâwi tla.

Bâwlpu Lian Josua Thlâk Tla

¹⁰ Josua chu Joiakim pa asi; Joiakim chu Eliasib pa asi; Eliasib chu Joiada pa asi;

¹¹ Joiada chu Jonathan pa asi; Jonathan chu Jadua pa asi.

Bâwlpu Chi Lakah A Lukhâi Dauh Tla

^12-21 Joiakim Bâwlpu Lian asi liauah, bâwlpu chi lakah a lukhâi dauh tla chu hi bang an si: Bâwlpu ------------------- Chi Meraiah ------------------- Seraiah Hananiah ------------------- Ieremia Meshullam ------------------- Ezra Jehohanan ------------------- Amariah Jonathan --------------------- Maluki Josef ------------------------- Sebaniah Adna ------------------------- Harim Helkai ---------------------- Meraioth Zekaria ----------------------- Ido Meshullam ------------------- Ginethon Zikri ----------------------------- Abijah --------------------------- Miniamin Piltai ------------------------- Moadiah Sammua ---------------------- Bilgah Jehonathan ------------------- Semaiah Matenai ---------------------- Joiarib Uzi --------------------------- Jedaiah Kalai -------------------------- Salai Eber --------------------------- Amok Hasabiah ----------------------- Hilkiah Nethanel ----------------------- Jedaiah

Bâwlpu Tla Leh Levi Dâwngsungkhur Singsiahnâk

²² Hi bang Bâwlpu Lian tla dam liauah hin Levi leh bâwlpu dâwngsungkhur lakah a lukhâi dauh tla singsiahnâk chu kil asi: Eliasib, Joiada, Jonathan leh Jadua. Hi singsiahnâk hi Persia lal lianchem Darias lal liauah lîm asi.

²³ Levi dâwngsungkhur lakah a lukhâi dauh singsiahnâk rîn mi tla chu, Jonathan, Eliasib tupa dam liau tiang cho asi.

Biakin Rianṭuan Vauhnâk

²⁴ Hasabiah, Serebiah, Jeshua, Binui leh Kadmiel leh tla nih Levi tla a murui rui hen an siam na. Murui nih chu Pathian mi lalchem David nih sîntirnâk a pêk mi hâwi hen thinlung munkhat hen a rual hen Pathian an sawr.

²⁵ Thil-le-rî siahnâk Biakin leiah kalnâk kulh kawtkâ vêngtu murui lakah hotu dauh chu hi tla hi an si: Mataniah, Bakbukiah, Obadiah, Meshullam, Talmon leh Akub tla an si.

²⁶ Hi bang minung tla hi Josua fapa Joiakim, Jehozadak tupa leh lâirêltu Nehemiah leh Ezra, Pathian Dân theihtu bâwlpu tla dam liau mi tla an si.

Nehemiah Nih Khuapi Kulh Pathian Sinah A Apnâk

²⁷ Jerusalem khuapi kulh an ap liau chun chu lakah tel ding hen Levi tla chu mun kip ah mi kawh hen an um le, tumphung, chêngchêng leh ṭingṭang tla hen lâwmthusimnâk lasaktu ding ah.

²⁸ Levi dâwngsungkhur lasaktu tla chu Jerusalem kiangkam an umnâk leh Netophah khua kiangkam tla,

²⁹ Bethgilgal leh Geba leh Azmaveth thawk hen hawng mi tla anna pûm.

³⁰ Bâwlpu tla leh Levi tla nih chun anmah leh mi zapi, kulh kawtkâ leh khuapi kulh kawtkâ Dân hâwi hen thenhlimhnâk an timhtuah.

³¹ Juda lakah ruitu tla chu kulh tlûnah ka pumh na le, murui lianpi murui nih ṭhen mi hotu ah ka siam na le, Pathian sinah lâwmthusim bû hen khuapi chu hêl ding hen. Murui khat nih chun kulh tlâng Nâwm Lawnhnâk Kulh Kawtkâ vawrhlei kâng hen an hêl.

³² Hosaiah chu lasaktu murui dunglei kângah a kal le, Juda ruitu khingkhuai nih an zûl.

^33-35 A sangtu chu hi bang bâwlpu tla hi tâwtawrâwt tum bû hen an zûl na: Azariah, Ezra, Meshullam, Juda, Benjamin, Semaiah leh Jeremia. Chu sangtu chu Zekaria, Jonathan fapa, Semeiah tupa a kal. (Amah thlâktu tla chu Mataniah, Mikaiah leh Zakur, Asap thlâk ah mi an si.)

³⁶ Amah chi lakah mi midang tla: Semaiah, Azarel, Milalai, Gilalai, Maai, Nethanel, Juda, Hanani tla nih tumphung chikip tum bû hen lalchem David, Pathian mi nih a ruat mi tla put bû hen an zûl. An kalnâk leiah chun Pathian Dân theihtu Ezra nih a ruai na.

³⁷ Tikhur Kawtkâ thawk hen David khuapi leiah an kâi le, David lal in pal hen Tî Kawtkâ leiah mi kulh ah an kîr le, khuapi saklei kângah an kal.

³⁸ Lâwmthusimtu murui dang tla chu kehlei kângah mi kulh tlâng an zawh le, chu murui khingkhuai tla chu ka zûl na. Insâng mei tihnâk pal hen kulh kâunâk leiah kan kal le,

³⁹ chun Efraim Kulh Kawtkâ, Jesanah Kulh Kawtkâ, Ngâ Kawtkâ, Hananel Insâng, leh Hamea Insâng (Zâ) pal hen Dawrâ Kawtkâ leiah kan kal, Biakin kawtkâ kiang ri kan kal.

⁴⁰ Churawhchun, an murui nih hen Pathian sinah lâwmthusim bû hen Biakin mun chu an tleng vevê. Chu lo khawm ah,

⁴¹ ruitu ka sinah um mi tla keimah murui bâwlpu tla hen tâwtawrâwt an tum, chu tla chu: Eliakim, Maaseiah, Miniamin, Mikaiah, Elioenai, Zekaria leh Hananiah tla an si le,

⁴² chu tla chu Maaseiah, Semaiah, Eleazar, Uzi, Jehohanan, Malkijah, Elam leh Ezer tla nih an zûl na. Lasaktu tla chu Jezrahiah nih a rui na le, an hâu fâk kho ri suah hen la an sak.

⁴³ Chu ni ah chun bâwlnâk tam tak an ap le, Pathian nih lâwm tak hen a siam na ruangah zapi tla chu thungâi anna lâwm. Chu ni chu nunau ngâksia tla hen an mang le, an hâu chu lât tak a râltlâng hen khawm theih kho asi.

Biakin Ah Pathian Sawnhnâk Rangah Vauh Mi

⁴⁴ Chu liau chun Biakin rang ding ah khawlh mi parâ lû ah pakhat fâng thar leh thingthei rah min kum siar khawlh mi tla siahnâk mun hotu rang ding ah mi tla ruat an si. Chubang minung tla chu khuapi kiangah phâisen lakah mi bâwlpu leh Levi tla rangah Dân nih a herh a ti mi hâwi hen khawlhtu rang ding ah pêk an si. Juda mi zawzawng chu thenhlimhnâk leh Pathian nih thu a pêk mi hâwi hen an timhtuah ruangah,

⁴⁵ bâwlpu leh Levi tla tlûnah thungâi anna lâwm. Biakin tumphung tumtu murui leh Biakin vêngtu tla nih lalchem David leh Solomon nih dân an siam mi hâwitê hen thil an ti.

⁴⁶ A lânah lalchem David leh tumphung tumtu Asap um liau khawm ah Pathian sinah lâwmthusimnâk leh lasaknâk lakah chun tumphung tumtu murui nih an rui na.

⁴⁷ Zerubabel leh Nehemiah san liau khawm ah Biakin ah tumphung tumtu leh Biakin vêngtu tla rangah châwmnâk ding hen Israel mi zawzawng tla nih nisiar thilpêk tla an pêk. Zapi minung tla nih thilpêk thenhlimh Levi tla rangah an pêk na le, Levi tla nih bâwlpu rangah thil herh an pêk na.