NAHUM 3 - Bawm Common Language Bible Version

¹ Neihnâk hen khat, rawk hen um ding mi mi thahtu khuapi chu a vânduai rawh!

² Vuak hâu, kari kê rîl mi hâu, rang tek hâu, kari â nin mi hâu tla ngâi u!

³ Rang tlûn chuan mi tla nih an nâwr, nâmsâu tla tlêukul hen a um, fei tla an lekzur! Ruak tla sâng tak hen an pawng, a thi mi rêl châwk lo-- minung tla chu ruak anna suih le, an tlû!

⁴ Ninevi, â zuar mi chu rêp asi rawh. Mi muisung thih phah rê hen duhrim kâi, anih chu phun tla dâwi hen sal ah siamtu asi.

⁵ LALPA Zeizawng tikho nih, “Ninevi ka nan rêp awt! Na nipuan lît hen takkaro na si mi phun tla kan muhtir lai le, ningzak a kâi zia chu a nan muh lai.

⁶ Zauhnawmh kâi tak hen kan ti lai le, nâwmtâm ka nan buaih awt, mi nih thlingzâ tak hen an zauh lai.

⁷ An muhtu zawzawng an thinlung a kah zar lai! ‘Ninevi chu râwk dep hen a um ko rawh a! Amah rangah lungkhamtu âu um? Âunih thla va ngamh ding a duh? an ti lai,” a ti.

⁸ Ninevi, Aigupta ram a mi Thebes khuapi ngâk hen zei me na ṭhat dauhnâk a um? Anih khawm nih amah vêngtu chu Nile tiva vâm hâwi a nei bâk.

⁹ Sudan leh Aigupta tlûnah lâi a rêl le, a thiltikhonâk nih dawngh a nei lo; Libia chu amah bawptu asi.

¹⁰ Sikhawmsele Thebes mi tla chu sal ah put hen an um, khua lâi ah a ker kip ah an fa tla chu thah hen an um, anmah ruitu chu rêngkhimh bû hen an kalpi na le, tleihtu murui sinah an ṭhenh zâr na.

¹¹ Ninevi, zurî lungfîmlo hâwi hen na tlû lai! Nang khawm nih na mêlma lakah mi suak ding na tum lai.

¹² Na kulh tla chu theipi a kûng tlûnah a rah a min le, a kûng an ninh le, a rah min chu na kâ lakah a hawng tlâ mi hâwi asi lai.

¹³ Na kawrsen tla chu nunau hâwi hen an um lai le, na ram tla chu na mêlma lakah vêngtu lo hen an um lai, mei nih na kulh kawtkâ renh tla a khangh hep lai.

¹⁴ Kulh hualnâk timhtuahnâk ding ah tî than le, na in kulh tla birhtir! Tual rawh siam ding hen nêng chîl, tual rawh chu a siamnâk ah timhtuah!

¹⁵ Zeitin tal ti khawm le, thi thlo hen kâng hen râltuknâk ah na thi ding nget. Khâubawk nih thil chîng mi a veih dep mi hâwi hen veih dep hen na um lai. Khâubawk hâwi hen nan pung.

¹⁶ Vân ah ârfi ngâk a tam hen na sawlehtu tla na pungtir, sikhawmsele tu chun khâubawk an thlâ an pharh le, an zuang hep mi hâwi hen an kal hep rawh.

¹⁷ Na rianṭuantu tla chu khâubawk rual vâm lakah a dâi liauah an um mi hâwi an si. Sikhawmsele nî a hawng suak rawh chun an zuang hep le, zeiah an kal rawh ti âukhawm nih an theih lo.

¹⁸ Asiria lal, na lâirêltu tla chu an thi le, na milian tla chu an it pawt rawh! Na mi tla chu tlângah anna rek le, in leiah hawng tlungpi natu ding âukhawm an um lo.

¹⁹ Na nganfâk ṭhatnâk ding zeikhawm a um lo, nâ liam mi khawm damh kho asi lai lo. Na siat leh râwknâk thu theihtu zawng chu anna lâwm tukah zâ an bengh rê lai. Dawng ti umlo hen ṭhatlo na rawt mi thu ah suahtu an um ma?