NAHUM 2 - Bawm Common Language Bible Version

Ninevi Khua Râwknâk

¹ Ninevi, do hen na um rawh! Nangmah mân ver tirtu thiltikhonâk a hawng tlung rawh. Minung hen vêngnâk siam! Lampi tla vêng! Râl tuk ding hen a tîm!

² (LALPA nih Israel tla chu an mêlma tla nih an rûn lânah mi hâwi hen rokualnâk a pêk na awt.)

³ Mêlma kawrsen tla nih phaw sen anna put le, a sen hen anna thuam. Do ding hen anna timhtuah! An kari tla chu mei hâwi hen a cherhtun! An rang tla chu an per!

⁴ An kari tla chu khuaruat lo tak hen khualâi ah an ṭawl le, khua sungah a suk a let hen an tek. Meifâr hâwi hen an chêu le, mîmthlalek hâwi hen a lek, an thalkah chu mîmthlalek hâwi hen a zuang.

⁵ Hotu tla chu thupêk hen an um le, mâilei an fûk liauah an tlû. Dotu tla chu kulh leikâng an nam le, kulh rawh ding hen phênnâk an siam.

⁶ Tiva kiangah mi kulh kawtkâ tla chu awng hen an râwk; lal in ah chun ningṭihnâk hen a khat rawh.

⁷ Lalnu chu sal ah put hen a um le, a to-aw tla chu lungfâk ruangah vaṭhu hâwi hen an râm, an lungfâk tuktarâi ah an ir an bengh.

⁸ Tidil a chat mi hâwi Ninevi khua thawk hen minung an hawng suak! “A dîn u! A dîn u!” ti hen âu hâu a hawng suak le-- sikhawmsele pakhat khawm dunglei hawitu an um lo.

⁹ Tangka thlawk u! Ngûn tla thlawk u! Khuapi chu rothil a khat zat!

¹⁰ Ninevi chu a vei rawh, a karo hen a um, a lâwng keng rawh! Thinlung chu ningṭihnâk hen a khat le, chaknâk a vei le, khûp tla a thir; mêl a dâng rê.

¹¹ Tu chun khuapi chakeibaknei pûk hâwi a um mi, chakeibaknei pûk ah mi, chakeibaknei tla nih an ei hen an dinnâk mun, chakeibaknei a mipa leh a nunau an va kalnâk mun leh an fa tla an châwmnâk mun chu zeiah a um rawh?

¹² Chakeibaknei nih sa a seh le, a fa le a nu rangah a sâm piak na le, a sa a sâm mi hen pûk chu a khattir zat.

¹³ LALPA Zeizawng tikho nih, “Kei chu na mêlma kasi! Na kari tla ka duah hep awt, na kawrsen tla chu râltuknâk ah thah hen an um lai le, midang thawk hen na lâk mi thil zawzawng ka lâk phin awt. Na thiltikhonâk chu laikulh ah theih asi lai lo rawh,” a ti.