MIKAH 7 - Bawm Common Language Bible Version

Israel Nunchan Râwknâk

¹ Lungdawng a kâi thlo, mi sungvâng nih thing lakah rah a tawng lo mi leh grep zûn lakah a rah tawng lo mi hâwi kasi. Grep zawzawng leh theipi thaw zawzawng kawih hen an um rawh.

² Ram lakah mi zumhkâi pakhat khawm an um lo, Pathian lakah khawm zumhkâi pakhat khawm an um lo, mikip nih mi thah ding hen dêngkhâwng tik an bawh ver. Mikip nih ram sungah mi an thah na.

³ Sual leikângah ti chu an thiam ver, rianṭuan ding leh lâirêl ding hen nawhnâk an hauh. Mi kuaih khotu nih a duh thu chu a simh na le, churawhchun a ti dân an ruat tawnh.

⁴ An lakah mi ṭha chem leh zumhkâi chem ti mi khawm belh hâwi hen zeirang khawm an tlâklo. Khuavâng tla mang hen Pathian nih rêp ding hen a simhkan mi ni chu a tlung rawh. Tuah chun anna nawk rawh.

⁵ Na zâwlbâwm khawm zumh lah na le, na hâwi khawm rinhsan lah. Na nupi sinah thu na sim mi khawm a thiamthih.

⁶ Chu tikah chun mi â nih ti mi hâwi hen an pa rangah an ti lai, fanu tla nih an nu tla an do lai, nungâk tla nih an ni le an tawhpi lai. Mi, a mêlma tla chu amah dâwngsungkhur ah mi asi.

⁷ Sikhawmsele, LALPA lei ka zauh kumza lai le, Pathian ruang hawng ka suahtu chu ka rinhsanh. Ka Pathian nih hawng ka ngâi lai.

LALPA Nih Ruangsuahnâk A Tlungtir

⁸ Kan mêlma tla nih a san umlo hen hawng kan diriamh. Kan tlû le, sikhawmsele kan thawk nawlh lai. Tu chun mûi ah kan um le, sikhawmsele LALPA nih chêu hawng kan pêk teh lai.

⁹ LALPA lakah thilsual kan ti, churuang chun a thinthawk kar vial chu kanna dawnh rarâm ding asi. Sikhawmsele a dawnghnâk ah chun hawng kan hum lai le, kan lakah thil diklo tla dik hen a hawng diktir lai. Chêu lakah hawng kan kalpi lai le; ruang hawng kan suah mi muh ding hen kan nung lai.

¹⁰ Chu chu kan mêlma tla nih an muh lai le, “LALPA nan Pathian chu zei ah?” ti hen hawng kan nihsanhtu tla chu an ningzak lai rawh. Tualmâi ah nêngthû hâwi hen lamhbêk hen neh an si mi chu kan muh na lai.

¹¹ Jerusalem mi tla, khuapi kulh dirh nawlh ding mi tik chu a tlung rawh. Chu tikah nan ramrî chu kauh asi lai.

¹² Nan mi tla chu munkip thawk hen an hawng kîr nawlh lai le, Asiria ram saklei thawk hen, Aigupta ram simlei thawk hen Eufretis tiva kiangkam thawk hen tipi lât tak tla thawk hen leh lât tak a mi tlâng sâng thawk hen an hawng kîr lai.

¹³ Sikhawmsele a tlûnah misual um mi tla ruangah tual chu ramkaro hâwi hen a hawng um rawh.

Israel Lakah LALPA Zângfahnâk

¹⁴ LALPA, na thîm mi na minung tla lakah vêngtu si rawh. Ramkaro ah a dangtê hen um menza na khawmsele an kiangkam ah ram ningno tak a um. A lânah an um mi hâwitê hen ram ṭha Basan leh Gilead ram ah kaltir na le, châwm na.

¹⁵ LALPA, Aigupta ram ah na kan suakpi liauah thilchê na ti hâwi hen kan rangah thilchê hawng kan ti piak.

¹⁶ Phun tla nih chu chu an muh hen chak ding ngangâk hen an lawk lam a sawng lai. An lung a dawng tuktarâi ah an kâ an chîp lai le, an nâ tla an phih lai.

¹⁷ Rûl hâwi hen valeidip ah an lâwn lai, an kulh thawk hen lâu leh thir bû hen an hawng suak lai, LALPA kan Pathian an ṭih lai rawh.

¹⁸ LALPA, nang hâwi mi pathian dang âukhawm an um lo; a thibang um rih mi sualnâk tla na ngaihdam na, nang chu na thin a thawk kumza lo le, sikhawmsele chu hâwi ngâk hen na lâwm hen zângfah dawnglo na kan muhtir.

¹⁹ Kan tlûnah khua na ruat nawlh nget lai, kan sual tla chu na kê tangah na lamhbêk hen tipi tawdeng ah na siah ving lai.

²⁰ A lânah hawng kan thlâktu sinah thu na tiamh mi hâwi hen zumh na kâinâk leh na dâwtnâk dawnglo Abraham leh Jakob thlâk na mi tla sinah na langh lai.