MIKAH 5 - Bawm Common Language Bible Version

¹ Jerusalem mi tla, na kawrsen rual pumh na! Hual hen kan um rawh, Israel ruitu an do na rawh!

Pathian Nih Bethlehem Mi Lâirêltu Ah A Ruat

² LALPA nih, “Bethlehem, Eprathah, Juda ram khuapi ah a mêchem mi na si, sikhawmsele nangmah thawk hen Israel tla lâirêltu ding a lânah mi a dâwngsung hâwitê si nawlh ding mi ka hawng suaktir awt!

³ Churuangah LALPA nih a mi tla chu fapa ring lânlo chu an mêlma sinah a mi chu a kaltâk awt rih. Churawhchun, ram sungah a hâwi tla sal ah an um mi tla chu anmah minung tla hen anna fawnh nawlh lai.

⁴ A hawng tikah chun LALPA sinah mi chaknâk leh LALPA Pathian amah lalnâk hen a mi tla lâi a rêl piak na lai; laikulh ah mi zawzawng nih a rokualnâk an theih awt ruangah leh thlangamnâk a pêk na awt ruangah a mi tla chu

⁵ him tak hen an um lai rawh. Asiria mi nih kan ram ah an hawng rûn hen vêngtu tla an hawng pah zek na tikah chun hawng kan ruitu chak chem mi tla anmah do ding hen kan fial na lai.

San Suaknâk Leh Rêpnâk

⁶ Râlthuam chaknâk hen Asiria chu an neh lai le, Asiria nih kan ram an donâk lakah mi chu ruang an hawng kan suah lai.

⁷ Israel mi lakah a dam rih mi tla chu LALPA nih dâmtî phun tam tak rangah a hawng tlâktir mi hâwi hen leh a fachî tuhtu nih thlâi a chîng mi hâwi an si lai. Minung silo hen Pathian an ngauhsan lai rawh.

⁸ Phun lakah a um rih mi tla chu chakeibaknei thing mun ah ei ding a hâwl mi hâwi mawh an tlawngnâk ah â sawk mi hâwi asi lai le, a nam na le, a sâm dip na le, sanh kho an silo rawh mi hâwi an si lai.

⁹ Israel tla nih a mêlma tla a neh hen a veih dep na lai rawh.

¹⁰ LALPA nih, “Chu tikah chun na rang tla ka lâk lai le, na kari tla khawm ka râwk hep awt.

¹¹ Na ram ah khuapi tla ka râwk lai le, a vêngtu tla khawm ka veih phin lai.

¹² Dâwithiam na mang na mi tla chu ka veih na lai le, chamchawh thiam tla umlo hen kan siah lai rawh.

¹³ Na milem tla leh na lungphun tla chu ka veih lai le, nangmah tak nih na siam mi thil tla chu na sawnh lai lo rawh.

¹⁴ Na ram ah mi pathiannu Aserah chu ka thlûk lai le, na khuapi tla chu ka râwk lai.

¹⁵ Ka thu ngâilotu phun zawzawng tlûnah ka thinthawknâk fâk tak hen phû ka lam awt,” a ti.