MIKAH 4 - Bawm Common Language Bible Version

LALPA Nih Laikulh Pumpi Thlangam Tak Hen Lâi A Rêlnâk

¹ Ni a hawng tlung ding mi lakah Biakin umnâk tlâng chu tlâng dang zawzawng a khûp ver lai. Phun tam tak tla chu chunah chun tî hâwi hen an hawng luang lai.

² Chu tla nih chun “LALPA tlângah mi, Israel Pathian Biakin ah kan kal lai. Anih nih ti ding hawng kan duh mi chu hawng kan sîntir awt ruangah; a thîm mi lampi ah chun kan kal lai rawh. LALPA sîntirnâk chu Jerusalem thawk hen a hawng um lai le, a mi tla sinah Zion thawk hen thu a sim lai,” an ti.

³ Phun tla lakah thunawk a lât leh a nâi nâk ah um mi tla lâi a rêl piak lai. An nâmsâu tla phâisen nâwnnâk ah an mang lai le, an fei tla chu tual nâwnnâk zum ah an siam lai. Phun tla chu râltuk ding hen an kal lai lo rawh le, râltuk ding khawm anna timhtuah lai lo rawh.

⁴ Mikip rem tak hen an grep leh an theipi nâwngah an um lai le, an lâutir na lai lo rawh. LALPA Zeizawng tikho nih hi hi a tiamh mi asi.

⁵ Phunkip nih mah pathian chiau an sawnh lai le, an zûl lai. Sikhawmsele LALPA kan Pathian chu sawnh hen a thu kan ngâi kumza lai rawh.

Israel Sal Tâng Tla An Hawng Kîr Ding Mi

⁶ LALPA nih, “Sal tângnâk ah ka rêp na hen hamhnâk tuartu tla munkhat ka pumh na ding mi tik chu a tlung awt rawh.

⁷ Mikhêng in thawk hen lât takah um mi an si le, chubang a thibang tla hen a thartê hen dawmh nawlhnâk ka siam lai le, phun rokual tak ah an um lai. Chu thawk hen chun kumleza hen Zion tlângah an tlûnah lâi ka rêl lai,” a ti.

⁸ Nang, Jerusalem, Pathian nih a mi tla dawrâpu hâwi hen a vêng na nâk mun na lalram lakah khuapi lianchem na si nawlh nget lai.

⁹ Zei rangah fâk tak hen na ṭap? Nunau nganfâk tuar hâwi hen zei rangah na tuar? Lal nei lo hen remruattu tla an thi ruangah ma?

¹⁰ Jerusalem mi tla, nunau nih fa a ring awt mi hâwi a, merh le rûm, tuah khuapi kaltâk hen mâng ah na um awt rawh ruangah. Babulon ah sal ah na kal lai le, sikhawmsele chu lakah mi na mêlma lakah mi LALPA nih ruang an suah lai.

¹¹ Phun tam tak nangmah do ding hen anna pûm, “Jerusalem chu râwk ding mi asi! Hi khuapi hi râwk hen kan muh teh lai!” an ti.

¹² Sikhawmsele chu phun tla nih LALPA thinlung an theih lo, fâng zâp ding an hawng put mi hâwi hen rêp ding ah pumh hen an um mi an theih lo.

¹³ LALPA nih, “Jerusalem mi tla, kal ule, nan mêlma tla va rêp na u! Chawchal a kî thîr, a tin dâr nei a chak mi hâwi hen ka nan siam lai. Phun tam tak na veih na lai le, mi leh tuknâk ruangah neih leh siah anna ting mi chu laikulh pumpi LALPA, Keimah sinah na hawng pêk lai,” a ti.