MIKAH 2 - Bawm Common Language Bible Version

Mipâm Nehsawhtu Tla Vânduainâk

¹ It lo hen an zâu mi leh thilsual ti tumtu tla rangah chun ṭihnung a kâi a! Zînglei asi rawh chun, tik remchâng an tawng kâ hen an tum hâwi hen thilsual an ti.

² Phâisen an duh mi tla an lâk piak na le, in an duh mi zawng an lâk piak na.

³ Churuang chun LALPA nih, “Nan lakah siatnâk tlungtir ding ka tum, chu lakah mi chu nan âwl rêng lai lo, nanmah lawksawngnâk ding hen siat leh râwknâk hâwltu nan si, hi nûn chun zûm tak hen nan kal lai lo rawh.

⁴ Chu chu a hawng tlung tik chun mi nih a sia leikâng hen nan thâwng an sim lai le, nan thinlung lungdawngh kâi tak chu la hen an sak lai: Kanna râwk dep rawh! Kan ram chu LALPA nih a lâk le, Sal ah hawng kan puttu tla sinah a pêk ving rawh, ti mi hi an sak lai,” a ti.

⁵ Churuang chun LALPA mi le tla sinah ram pêk asi nawlh tik khawm ah nannih rangah zeikhawm tingvo a um lai lo.

⁶ Mi nih ka sinah thu an sim le, “Kannih lakah sim lah. Chubang thu tla chu sim lah, Pathian nih ningzak hawng kan saih lai lo.

⁷ Israel mi tla hi siatbarh mi hen ma na ruat? Pathian nih sûmnâk a nei lo rawh mazei? Chubang hâwi thil chu a ti tak awt mazei? Thil dik titu tla sinah vêlnei tak hen thu a sim lo ma?” an ti.

⁸ LALPA nih a sâng le, “Ka mi tla chu mêlma hâwi hen nan do na. Râltuknâk thawk hen mi tla chu in leiah him ziar a um ding tum hen an hawng kîr le, sikhawmsele chunah nannih nih an dunglei ah an kawrdawh tla fîr piak na ding hen nan bawh na ko.

⁹ Ka mi tla nih an dâwt tak mi nunau tla in ah nuam tak hen an um mi chu nan nar na le, mal ka sâwm mi an fa tla chu nan rawk na.

¹⁰ Thawk ule, kal u; hinah himnâk a um lo rawh. Nan sualnâk nih hi mun hi siat leh râwk phahnâk ah a siam.

¹¹ Hi bang minung tla nih hin, âwkrâwl thu karo sim hen perpettu khuavâng, “Uain hâng nan rangah a luang ding mi thu ka sim,” ti hen thusimtu tla chu nan duh.

¹² “Sikhawmsele nannih Israel mi tla lakah um rih mi tla, munkhat ah ka nan pumh ver na awt. Dawrâ tla an kâwm sungah an hawng kîr mi hâwi hen kan kîrpi na lai. Ram ningno dawrâ a khat mi hâwi hen nan ram chu nan khat zat nawlh teh lai,” a ti.

¹³ Pathian nih an rangah lampi a awng lai le, sal ah tâng mi chu a suah na lai. Khuapi kulh thawk hen an suak lai, an lal LALPA ngelchel nih a rui na lai.