MATHAI 7 - Bawm Common Language Bible Version

Midang Simsâwi Thu Ah Sîntirnâk

¹ “Simsâwi lah u, simsâwi hen nan umlonâk ding hen.

² Nan simsâwi na hâwi ber hen an simsâwi na lai; nan tahnâk tê hen an tah piak nawlh na lai.

³ Chun, zei rangah me mah mit ah mi kân um mi chu ruat lo hen na unau mit ah mi fungrêutê um mi chu na muh zia?

⁴ Asi lo leh, zeitin me na unau sinah, ‘Na mit ah mi fungrêutê kha hawng ka thuaktir rawh,’ na ti kho lai, nangmah mit ngelchel ah kân um ko hen.

⁵ Mi perpê! Na mit ah mi kân kha lâk masa rawh; chuvachun, na unau mit ah mi fungrêutê thuak ding mi chu fiang tak hen na muh lai.

⁶ “Ui tla sinah thil thenhlimh chu pêk lah u; an hawng a her hen an seh na lebang lai; vawk mâika ah nan âitikep lung tla lawnh lah u, an chîl salam lai.

Deih, Hâwl, Kik

⁷ “Deih u, chun a nan pêk na lai; hâwl u, chun nan tawng lai; kik u, chun a nan awng piak na lai.

⁸ Âuzawng a deihtu nih chun an tawng tâwn le; âuzawng a hâwltu nih chun an tawng tâwn; âuzawng a kiktu chu an awng piak awt asi.

⁹ Asi chun, nan lakah âutal a fapa nih sangtlêp deih sele, âunih lung pêk lai?

¹⁰ Asi lo leh, ngâ deih sele, âunih rûl a pêk lai?

¹¹ Chuvachun, nannih misual men nih nan fa tla thil ṭha pêk ding dân nan theih chun, nan Pa vân ah mi nih chun a deihtu tla chu thil ṭha a pêk dauh khun lai lo mazei?

¹² “Chuvachun, thil zeizawng mi nih nan tlûnah ti sele, nan duh hâwi hen mi tlûn khawm ah ti bâk u; chu chu Dân leh khuavâng tla thu asi rêng asi.

Lampi Bî Chu

¹³ “Kawtkâ bî ah chun lût u; tlâunâk ah kalnâk kawtkâ chu a kâu le, a lampi khawm a kâu le, chu leiah lût mi chu tam khawm thungâi an tam.

¹⁴ Nungnâk ah kalnâk kawtkâ chu a bî le, a lam khawm a tawr le, a tawngtu tla khawm tâwmtê an si.

Thing Leh A Rah

¹⁵ “Khuavâng telê lakah a thiamthih u; chu tla chu dawrâ vun aih hen nan sinah an hawng kal tâwn le, an sung leiah lam chun chingngia râwlṭâm an si ruangah.

¹⁶ Anmah tla chu an rah lakah nan theih ko lai. Zûn lingnei lakah grep rah an kawih dah tâwn mazei? Bualingnei lak khawm ah theipi an kawih dah tâwn mazei?

¹⁷ Thing ṭha zawng a rah a ṭha tâwn le, thing sia lam chu a rah a ṭhalo.

¹⁸ Thing ṭha a rah a sia kho lo le, thing sia khawm a rah a ṭha kho lo.

¹⁹ Thing kip a rah a ṭhalo mi zawng chu an hâu le, mei ah an paih tâwn.

²⁰ Churuangah anmah chu an rah lakah nan theih ko lai.

Lalpa Titu Namên Vân Ram Ah An Lût Lai Loh

²¹ “ ‘Lalpa, Lalpa’ hawng ka titu namên Vân Ram ah an lût lai lo; ka Pa vân ah mi duhzia titu lam chu an lût lai.’

²² Chu ni ah chun mi cherkhet nih, ‘Lalpa, Lalpa! Na min hen thu tla kan sim hen, na min hen khuri tla kan nar le, na min hen thilchê tam tak kan ti tâwn lo mazei?’ an ti teh lai.

²³ Chu ni ah chun ‘Nannih thilsual titu tla, ka nan theih na loh, ka sin thawk hen kal u,’ ti hen, annih chu ka simh na teh lai.

In Saktu Panih Chu

²⁴ “Chuvachun, mikip hi bang ka thu theih hen zâwttu zawng chu, mi fing lungpi tlûnah in saktu hen tahṭhimh ding asi.

²⁵ Ruah tla a hawng sûr le, tî tla a hawng lian le, thli tla a hawng râng le, chu in chu a khup khup hen a hawng nam le; sikhawmsele, a chim lo le; lungpi tlûnah sak thlir asi ruangah.

²⁶ “Chun, mikip hi bang ka thu theih hen zâwtlotu chu, mi â sep tlûnah in saktu hen tahṭhimh asi.

²⁷ Ruah a sûr le, tî a hawng lian le, thli a hawng râng le, chu in chu a khup khup hen a hawng nam le, a chim rawh; a râwk zia thungâi a fâk asi, a ti.

Jisu Thuneihnâk

²⁸ Chun, hi hâwi hi asi le, Jisu nih chubang thu chu a sim thluh kâ hen, mi zapi tla nih a thu sîntir chu thungâi chê an ti le,

²⁹ Dân sîntirtu tla hâwi silo hen, thuneihnâk nei hâwi tak hen a sîntir na ruangah.