MATHAI 5 - Bawm Common Language Bible Version

Tlâng Tlûnah Thusimnâk

¹ Chun, Jisu nih mi zapi tla chu a muh na rawh chun tlângah a kâi le, a to le, a ṭhiruai tla a sinah an hawng kal le;

² chun thu a sim le, anmah tla a sîntir na:

Lâwmnâk Dik

³ “Thlarau leikâng ah thinlung hamh mi tla chu an thaw a suak; Vân Ram an tâ asi ruangah!

⁴ “Ngaihsia tla chu an thaw a suak, Pathian thlangamh hen an um awt ruangah!

⁵ “Â dawnh kho mi tla chu an thaw a suak, tual hi an luah awt ruangah!

⁶ “Repnâk ruangah sungvâng tîhâl tla chu an thaw a suak, an khim awt ruangah!

⁷ “Mi khuaruat kho tak tla chu an thaw a suak, Pathian khuaruatnâk anna ting awt ruangah!

⁸ “Thinlung ah thenhlimh tla chu an thaw a suak, Pathian an muh awt ruangah!

⁹ “Remnâk siamtu tla chu an thaw a suak, Pathian fa ah sak hen an um awt ruangah!

¹⁰ “Repnâk ruangah nehsawh tuar rawh tla chu an thaw a suak; Vân Ram an tâ asi ruangah!

¹¹ “Mi nih keimah ruangah an fâi na hen, an nehsawh na hen, âwkrâwl hen sual kip hen an phiar na tikah nan thaw a suak lai.

¹² Lâwm ule, lâwptlo hen um u; vân ah nan lâwmman a tam ruangah. Chu hâwi ber hen nanmah lânah khuavâng um tla khawm an nehsawh na tâwn.

Chitê Leh Khâwnvâr

¹³ “Minung zawzawng rangah chitê hâwi nan si. Sikhawmsele, chitê hi a dâwng rawh chun zei hen an altir nawlh lai? Churawhchun, lawnh hen, minung tla chîl salam ding lo chun zeirang khawm ah a tlâk loh.

¹⁴ “Laikulh chêu nan si. Tlâng tlûnah khua um chu thuh kho asi loh.

¹⁵ Mi nih khâwnvâr kaih hen tâwng tangah an siah dahlo, a siahnâk mun ah an siah dauh tâwn; chun in sungah mi zawzawng a cherh tâwn.

¹⁶ Chu hâwi ber hen nan chêu chu mi mitmuh ah chêu seh, chuvachun nan thil ṭha ti tla an muh lai le, nan Pa vân ah mi an chawnglawmh kho lai.”

Dân Li Leh Dân Thar

¹⁷ “Mosi Dân thu mawh khuavâng tla sîntirnak thu mawh veih ding a hawng kal hen hawng ka ruat lah u; veih ding hen hawng kal kasi lo le, rangtlingtir ding hen hawng kal kasi dauh.

¹⁸ Thungâi tak hen ka nan simh na, tual leh vân hi a vei lânlo chu Dân thu ah mi lasui ṭialtê mawh lasui ṭialtê khingkhuai mawh pakhat khawm a vei lai lo, a ektê hen a tlungkim lânlo chu.

¹⁹ Chuvachun, âuzawng hi bang thupêk mê chem lakah hin pakhat mawh buar hen, chu hâwi ti bâk ding hen mi le tla sîntirtu zawng chu Vân Ram ah mi mêchem an ti lai; khawmsele, âuzawng Dân zâwt hen, sîntir bâktu zawng chu Vân Ram ah chun mi lian an ti lai.

²⁰ Nanna repnâk nih Dân sîntirtu tla leh Farisai repnâk hi a khûp lânlo chu Vân Ram ah nan lût kho lai loh ti ka nan simh na.”

Thinrunhnâk Leh Mi Thahnâk Thu Ah Sîntirnâk

²¹ “Tuan liau mi tla sinah chun, ‘Mi na thah ding asi lo,’ an ti mi leh ‘Âuzawng mi thahtu vial chu lâirêlnâk ah dîr ṭihnungkâi tak hen a um lai,’ an ti, ti nan theih rawh.

²² Kei lam nih chun, ‘Âuzawng a unau tlûnah thinruntu vial chu lâirêlnâk ah dîr ṭihnungkâi tak hen a um lai le, âuzawng a unau sinah, ‘Nang, mido-tla-lo,’ titu vial chu lâirêltu tla rêl piak ding ṭihnungkâi tak hen a um lai; chun, âuzawng ‘Nang mi â’ titu vial chu Gehena mei ah lawnh ṭihnungkâi tak hen a um lai ti ka nan simh na.

²³ Chuvachun, mâichâm bul ah na thilpêk na ap liauah na unau nih na tlûnah lungsilonâk a nei ti na theih nawlh chun,

²⁴ chu mâichâm kiangah chun na thilpêk chu mâk thlap le, va kal le, na unau remh tâ rih le, chu nûnah chun na thilpêk chu hawng ap rawh.

²⁵ “Na leido chu lampi ah munkhat hen nan kal liauah remh sawm rawh, chu lo chun na leido nih chun lâirêltu an tleihtir lai le, lâirêltu nih chun kawrsen sinah a nan pêk lai le, rêngin ah a nan khumh sual lai.

²⁶ Thungâi tak hen ka nan simh, quadran tê men na lîm lânlo chu chunah mi chu na suak rîlmâl lai lo.

Ṭângdang Pawmtâknâk Leikângah Sîntirnâk

²⁷ “ ‘Ṭângdang na pawmtâk ding asi lo,’ an ti, ti nan theih rawh.

²⁸ Kei lam nih chun, âuzawng nunau duhnâk nei hen zauhtu vial chu a thinlung ah ṭângdang a pawmtâk ving rawh ti ka nan simh na.

²⁹ Chun, na mit vawrhlei nih a nan sualtir chun chawih zek le, lawnh ving! Na taksa a pum hen Gehena ah lawnh ngâk hen na taksa ṭeng pakhat vei chu na rangah a ṭha dauh asi.

³⁰ Chun, na kut vawrhlei nih a nan sualtir chun, tan le, lawnh ving! Na taksa a pum hen Gehena ah kal ngâk chun na taksa ṭeng pakhat vei chu na rangah a ṭha dauh asi.

Nupi Pasal Mâk Leikângah Sîntirnâk

³¹ “ ‘Âuzawng nupi mâktu zawng nih chun mâknâk lasui a sinah pêk seh,’ an ti.”

³² Kei lam nih chun, âuzawng tlangvâl duh ruangah silo hen nupi mâktu vial nih chun amah chu ṭângdang a pawmtir asi; chun, âuzawng mi mâk chia umpitu chu ṭângdang a pawmtâk asi ti ka nan simh na.

Siat Tleih Thu Ah Sîntirnâk

³³ “Tuan liau mi tla sinah, ‘Âwkrâwl hen siat tleih lah, Lalpa sinah na siat tleih chu lîm rawh,’ an ti, ti nan theih rawh.

³⁴ Kei lam nih chun ka nan simh na, siat rerêng tham lah u; vân min sim hen tham lah u, chu chu Pathian laltophah asi ruangah; tual min sim hen tham lah u, chu chu a kê thângnâk asi ruangah.

³⁵ Jerusalem sim hen khawm tham lah, chu chu Lalchem rokual tak khuapi asi ruangah.

³⁶ Na lû sim hen na tham ding asi lo, sam zâi pakhat khawm na ngotir hen na dum tir kho lo.

³⁷ Nan thusim chu asi mi chu si seh,’ ‘Silo mi chu silo ko seh,’ chu ngâk hen a lei mi chu Setan lakah suak asi.

Leido Sinah Lehrûl Samnâk Thu Ah Sîntirnâk

³⁸ “ ‘Mit ruangrûl ah mit, hâ ruangrûl ah hâ,’ an ti, ti nan theih rawh.

³⁹ Kei lam nih chun ka nan simh na, misual do lah u; na vawrhlei biang ah a nan benghtu zawng chu khat leikâng khawm dawnh.

⁴⁰ Chun, âuzawng na lakah thunawk tuah hen na kawrdawh lâk a tum chun na puan khawm lâktir dâidua.

⁴¹ Chun, mêl khat kal ding hen an êngtu zawng sinah chun mêl nih kal rawh.

⁴² An deihtu sinah chun pêk le, na lakah pûk duhtu chu ngaihlo lêm thlâk lah.

Mêlma Rangah Dâwtnâk

⁴³ “ ‘Na zâwlbâwm tla dâwt le, na mêlma hua na,’ an ti, ti nan theih rawh.

⁴⁴ Kei lam nih chun ka nan simh na, nan mêlma tla dâwt na ule, an nehsawh natu chu thlacham piak u,

⁴⁵ nan Pa vân a mi fa tla nan si khonâk ding hen. Anih nih chun misual tla leh mi ṭha tla tlûnah chun a nî a suaktir tâwn le, mirep tla leh mi replo tla tlûnah khawm ruah a sûrtir tâwn asi.

⁴⁶ An dâwt natu cho nan dâwt chun lâwmman zei me nan tawng lai? Siah khawlhtu tla khawm nih chu hâwi hen an ti bâk lo mazei?

⁴⁷ Chun, nan unau cho chibai nan bûk chun zei tipi me midang tla ngâk hen a lei nan ti? Phundang tla khawm nih chu hâwi hen an ti bâk asi lo mazei?

⁴⁸ Chuvachun, nan Pa vân a mi a ṭha rangtling hâwi hen nan ṭha rangtling ding asi.