MATHAI 4 - Bawm Common Language Bible Version

Ramkaro Ah Jisu Lêmnâk

¹ Churawhchun, Jisu chu Diabol nih lêm ding hen ramkaro ah Thlarau Thenhlimh nih put hen a um rawh.

² Chun, ni sâwmli leh zân sâwmli buh a ngei nûnah a sungvâng rawh.

³ Chun, Diabol chu a hawng kal le, “Pathian Fapa na si chun hi bang lung hi sang ah chang ding hen thu pêk rawh,” a ti.

⁴ Sikhawmsele, anih nih chun, “Minung hi sang cho hen an nung lai lo le, Pathian kâ thu kip suak hen an nung dauh lai, ti rîn asi,” ti hen a sâng.

⁵ Churawhchun, Diabol nih Khua Thenhlimh ah chun a lûtpi le, Pathian Biakin tlûn sîp zum ah a siah le,

⁶ chun a sinah, “Pathian Fapa na si chun a khâwk rawh; ‘Nang lakah chun a vânmifial tla thu a pêk lai le, an kut hen an nan dawmh lai le, chu hâwi asi lo chun na kê hen lung na suih lebang lai, ti Pathian lasui thu nih a sim ruangah,” a ti.

⁷ Jisu nih a sinah, “Lalpa na Pathian niksak dêl lah, ti rîn asi” a ti.

⁸ Chun, Diabol nih chun tlâng sâng tak ah a kalpi nawlh le, laikulh ram zawzawng leh an rokualnâk a zauhtir.

⁹ Chun, a sinah, “Bawkbukhup hen hawng ka sawnh le, hi bang zawzawng hi ka nan pêk ver lai,” a ti.

¹⁰ Chu ka hen Jisu nih a sinah, “Setan, kal ving! ‘Lalpa na Pathian sawnh le, amah rian cho ṭuan rawh,’ ti rîn asi,” a ti.

¹¹ Churawhchun, Diabol nih a kaltâk rawh. Chun, ngâinik, vânmifial tla nih a rian an ṭuan piak rawh.

Galili Ah Jisu Rianṭuan A Dawmhnâk

¹² Chun, Johan an tleih ti Jisu nih a theih kâ hen Galili ram ah a kal ving le,

¹³ chun, Nazaret a kaltâk le, Kapernaum ah a va um le, chu chu Zebulun leh Naphtali bial ah rilî kap ah um mi asi.

¹⁴ Khuavâng Isai kâ ah,

¹⁵ “Rilî leiah, Jordan varâl ah, Zebulun ram leh Naphtali ram, Phundang tla Galili ram!

¹⁶ Mûi nâwng ah to tla nih chun chêu fâk tak an muh lai, Thihnâk mun leh a thlaliah ah um mi tla tlûnah chun, chêu a hawng suak rawh,’ ti hen, a sim mi kha a hawng tlung khonâk ding hen.

¹⁷ Chu ri rawh chun Jisu nih chun, “Rim u, Vân Ram a nâi rawh,” ti hen sim a dawmh rawh.

Jisu Nih Ṭhiruai Masachem Tla A Kawhnâk

¹⁸ Chun, Galili Rilî kap ah a kal pah hen, unau panih, Simon (Peter an ti mi chu), a unau Andri hen rilî ah chun lên vawrh hen a muh na; ngarâltu an si rerêng.

¹⁹ Chun, Jisu nih chun an sinah, “Hawng ka zûl u, chun minung tleihtu ah ka nan siam na lai,” a ti.

²⁰ Chun, lên tla chu kaltâk hen an zûl sawm rawh.

²¹ Chun, chu thawk hen a kal vima le, unau dang panih Zebedai fapa Jem leh a unau Johan chu an pa Zebedai sinah lawng ah an lên tla remh hen a muh na, chun annih chu a kawh na rawh.

²² Chun, lawng leh an pa chu an kaltâk le, Jisu an zûl sawm rawh.

Jisu Sîntirnâk, Thusim Leh Damhtirnâk

²³ Chun, Jisu nih anna pûmnâk in tla ah sîntir na hen Ram Thâwngthâng Ṭha chu sim hen, mi le tla lakah nganfâk kip leh chaklonâk kip damh hen Galili ram zawzawng a ṭawl.

²⁴ Chun, Siria ram zawzawngah a thâwng a thang le, chun mi damlo zawzawng damlonâk leh nganfâknâk kip tuar tla, khuri vawnh tla, rualthlû tla, mi khêng tla a sinah an hawng put le, a damh ver na.

²⁵ Galili ram thawk hen, Dekapoli thawk hen, Jerusalem thawk hen, Judai ram thawk hen, Jordan râl thawk hen mi zapi cherkhet nih an zûl.