MATHAI 27 - Bawm Common Language Bible Version

Jisu Rangah Pilat Sinah An Kalpinâk

¹ Chun, zînglei a hawng si rawh chun bâwlpu lal tla leh zatlâng upa tla zawzawng chu Jisu thah ding hen thu anna thluk.

² Chun, an phuar le, an kalpi le, governor Pilat sinah an pêk rawh.

Juda Thihnâk

³ Juda, a tleihtirtu nih khan Jisu an mawhtir ti a theih kâ hen â sîr le, tangka shekel sâwmthum kha bâwlpu lal tla leh upa tla sinah a hawng put nawlh le,

⁴ “Sual nei lo ka tleihtir mi kha thil ka ti sual asi,” a ti. Annih nih chun, “Chu chu kan rangah zei a pawi lai? Nangmah duhzia zawng hen ti,” an ti piak.

⁵ Chun, anih nih chun tangka shekel chu mun thenhlimh sungah a lawnh le, a kal ving le, thi thlo hen â âwk rawh.

⁶ Chun, bâwlpu lal tla nih chun tangka shekel tla chu an lâk le, “Hi hi Biakin thawhlâwm bâwm ah siah a thiang lo, thisen man asi ruangah,” an ti.

⁷ Chun, anna thluk le, khual tla vûinâk ding hen bêl hêmtu mun chu an châwk rawh.

⁸ Churuangah asi, chu mun chu tutiang hen ‘Thisen Mun’ an ti mi chu.

⁹ Chu liau chun khuavâng Jeremia nih, “Chun tangka shekel sâwmthum an hauh mi man, Israel thlâk âu tla nih mawh an hauh mi man chu an lâk le,

¹⁰ Lalpa nih hawng kan tiamh hâwi hen bêl hêmtu mun rangah an pêk,” ti hen, a sim mi kha a hawng tlung rawh asi.

Jisu Pilat Mâika Ah A Dîrnâk

¹¹ Chun, Jisu chu governor mâika ah chun a dîr le, chun governor nih chun, “Juda tla Lalchem na si ma?” ti hen, a deih. Jisu nih a sinah, “Si ta a,” a ti.

¹² Chun, bâwlpu lal tla leh upa tla nih an phiar liauah zeitin khawm a sâng lo.

¹³ Chun, Pilat nih a sinah, “Hi tluk an phiar mi hi na theih lo ma?” a ti.

¹⁴ Sikhawmsele, kâ khat khawm hen a sâng lo; chun governor nih thungâi chê a ti.

Jisu Thi Ding Hen Thlûknâk

¹⁵ Chun, governor nih kût ni ah chun rêngtlâ pakhat, an duh mi zawng mi zapi chu a suah piak tâwn.

¹⁶ Chun, chu liau chun rêngtlâ, min thang tak, Jisu Baraba, an ti mi chu an nei.

¹⁷ Chun, an hawng le, Pilat nih an sinah, “Âu me an suah piak na sele nan duh? Jisu Baraba ma, Jisu Mesia an ti mi chu?” a ti.

¹⁸ Nahsuahnâk ruangah anih chu an tleihtir ti a theih ruangah.

¹⁹ Chun, lâirêlnâk tophah ah chun a to liauah, a nupi nih, “Kha mirep tak tlûnah khan zeikhawm ti lah; tusûn hin amah ruangah mang leiah thil tam tak ka tuar asi,” ti hen, a chah.

²⁰ Chun, bâwlpu lal tla leh upa tla nih Baraba deih hen Jisu veih ding hen mi zapi tla chu an lêm.

²¹ Governor nih chun annih tla chu a sawnh na le, “An panih lakah a zei mi dauh me an suah piak na sele nan duh?” a ti nawlh. Chun, annih nih chun, “Baraba,” an ti.

²² Pilat nih an sinah, “Jisu, Mesia an ti mi hi zeitin ka ti lai rawh ne?” a ti. An ektê hen, “Anih chu kraws ah khenh rawh,” an ti.

²³ Chun, anih nih chun, “Zei rangah me? Zei me a sual?” a ti. Sikhawmsele, annih tla chu, “Kraws ah khenhtir rawh,” ti hen an âu chiam.

²⁴ Chun, Pilat nih zeitin khawm a ti kho lo le, a nawk awt da dauh ti a theih le, tî a lâk le, mi zapi mâika ah chun a kut a ṭâwl le, “Hi mirep thahnâk lakah hin ka thiang; nannih nih nanmah ti hen va ti u,” a ti.

²⁵ Chun, zatlâng zawzawng nih, “A thihnâk mawh chu kanmah tlûnah leh kan fa tla tlûnah um seh,” ti hen, an sâng.

²⁶ Chu thluh chun Baraba chu a suah piak na le; Jisu lam chu a vuak le, kraws ah khenh ding hen a pêk na rawh.

Kawrsen Tla Nih Jisu Nihsuaknâk Ah An Mangnâk

²⁷ Chu thluh chun governor kawrsen tla nih chun Jisu chu lal in ah an kalpi le, an murui lakah mi zawzawng an sinah an pumh na.

²⁸ Chun, a puan tla an lît piak le, puan sen an aihtir.

²⁹ Chun, ling lukhuh an phiar le, an khuhtir le, a kut vawrhlei ah lâiluang an puttir; a mâika ah an siksidîr le, “Chibai, Juda tla Lalchem!” ti hen, nihsuak siamnâk ah an mang.

³⁰ Chun, amah chu chil an sah le, lâiluang chu an suh le, a lû ah an vuak.

³¹ Chun, nihsuak siamnâk ah an mang thluh chun puan chu an lît piak le, amah puan chu an aihtir nawlh le, kraws ah khenh ding hen an kalpi rawh.

Jisu Kraws Ah Khenhnâk

³² Chun, an suak liauah, Kurini mi, a min Simon an muh le; chu minung chu a kraws put ding hen an tleih.

³³ Chun, Golgotha, luruh mun an ti mi mun chu an hawng tleng le,

³⁴ uain thur, zei lo khâ hen chawmh mi, a din ding hen an pêk.

³⁵ Sikhawmsele, a tem le, a din duh lo. Chun, kraws ah an khenh thluh rawh chun chamchawh hen a nipuan tla anna ṭhen.

³⁶ Chun, chunah chun an to le, an vêng.

³⁷ A phiarnâk, “HI JISU HI JUDA TLA LALCHEM ASI,” ti hen rîn mi a lû tlûnah an bêk.

³⁸ Chun, amah rual hen rawkmang panih an khenh na bâk, a vawrhlei ah pakhat, a kehlei ah pakhat.

³⁹ Chun, mivel kip nih an lû an sut le,

⁴⁰ “Nang, Pathian Biakin siat hen ni thum ah sak nawlhtu, a hum rawh; Pathian Fapa na si chun kraws thawk hen hawng ṭum ko me,” ti hen an sîrleih.

⁴¹ Chu hâwi ber hen bâwlpu lal tla nih chun Dân sîntirtu leh upa tla hen,

⁴² “Midang chu hum tâwn hen mah chu â hum kho lo. Israel Lalchem asi lo mazei, tuah kraws thawk hen hawng ṭum ko seh me, chun amah chu kan zumh lai.

⁴³ Pathian a lung si lo ma, amah hi a duh chun tuhin Pathian nih ruangsuah seh,! ‘Pathian Fapa kasi,’ a ti dangâi ah,” an ti.

⁴⁴ Rawkmang an khenh mi tla khawm nih chun, chu hâwi ber hen an sîrleih.

Jisu Thihnâk

⁴⁵ Chun, dâr leinih thawk hen dâr thum tiang hen laikulh a hawng mûi ver rawh.

⁴⁶ Chun, dâr thumnâk ding ah chun Jisu chu hâu fâk tak hen, “Eli, Eli, lema sabakthani?” ti hen a âu le, chu chu ‘Ka Pathian, ka Pathian, zei rangah na ka kaltâk?’ tinâk asi.

⁴⁷ Chun, a kiangah zeimaw mi dîr tla nih chu chu an theih le, “Hi minung nih hin Elija a kawh asi,” an ti.

⁴⁸ Chun, an lakah minung pakhat a tek sawm le, hâng dâwp kho mi a lâk le, uain thur lakah a chiah le, fung lakah a târ le, a dintir.

⁴⁹ Chun, midang tla nih chun, “Um ko seh, amah hum ding hen Elija a hawng lai mawh kan zauh lai,” an ti.

⁵⁰ Chun, Jisu chu hâu fâk tak hen a âu nawlh le, a nûkrî a chat rawh.

⁵¹ Chun, Pathian Biakin puanzâr chu a tlûnlei thawk hen a tanglei tiang hen suak dak hen a tlêk rawh. Chun, lî a hawng nîn le, lungpi tla a kak le;

⁵² thlân tla â awng le, mi thenhlimh it rawh mi tla taksa tam tak khawm thawk hen an um rawh.

⁵³ Chubang tla chu Jisu thawknawlh nûnah chun thlân ah mi chu an suak le, Khua Thenhlimh ah chun an lût le, mi tam tak sinah anna langh rawh.

⁵⁴ Chun, kawrsen zâ hotu leh a sinah Jisu vêng hen um bâk mi tla nih chun lînîn leh thil umzia tla chu an muh rawh chun thungâi an ṭih le, “Hi Minung hi Pathian Fapa asi chiammâm,” an ti.

⁵⁵ Chun, chunah chun nunau tam tak a rianṭuan piak vima hen Galili ram thawk hen Jisu hawng zûltu tla chu an um le, a râltlâng hen an chawnh.

⁵⁶ Chubang tla lakah chun Mari Magdala mi, Mari Jem leh Josef nu leh Zebedai fapa tla nu le anna tel.

Jisu Vûinâk

⁵⁷ Chun, zânleibâi a hawng si rawh chun, minei, a min Josef Arimathai thawk hen mi a hawng kal le, amah khawm chu Jisu ṭhiruai asi bâk.

⁵⁸ Chu minung chu Pilat sinah a va kal le, Jisu ruak chu a deih. Chun, Pilat nih lâk ding thu a pêk.

⁵⁹ Chun, Josef nih chun ruak chu a lâk le, puan mangṭhia thiang tak hen a tuam le,

⁶⁰ amah thlân thar lung a ker mi lakah chun a zâutir le; thlân kawtkâ ah chun lung lianpi mi hen a khâr le, a kal rawh.

⁶¹ Chun, Mari Magdala mi leh Mari dang chu chunah chun an um, thlân kawtkâ zâwn ah chun an to.

Thlân An Vêngnâk

⁶² Chun, a thâituan ah chun chu chu Timhtuah ni nûnah bâwlpu lal tla leh Farisai tla chu Pilat sinah an hawng a pûm.

⁶³ “Ka pu, chu perpettu nih chun a dam liauah khan, ‘Ni thum nûnah ka thawknawlh lai,’ a ti mi kan theih ko.

⁶⁴ Chun, thlân chu ni thum ni tiang hen vêng ding hen thu pêk. Chu hâwi asi lo chun, a ṭhiruai tla nih amah chu an fîr lebang lai le, zatlâng sinah, ‘Mithi lakah mi a thawknawlh rawh asi,’ an ti lebang lai; chun perpetnâk madung chu a masa mi ngâk hen a ṭhalo khun lai,” an ti.

⁶⁵ Pilat nih an sinah, “Vêngtu kawrsen tla nan nei kha ta a; kal ule, nan ti kho zia zawng hen ṭha tak hen vêngtir ko u me,” a ti.

⁶⁶ Chun, vêngtu kawrsen tla hen an va kal le, thlân chu an vêngtir na le, lung chu an singsiah.