MATHAI 26 - Bawm Common Language Bible Version

Jisu Thah Ding Hen Thlûknâk

¹ Chun hi hâwi hi asi le, Jisu nih chubang thu zawzawng chu a sim thluh rawh chun, a ṭhiruai tla sinah,

² “Ni nihnâk ah Kalkanh Kût a hawng um awt ti nan theih, Minung Fapa hi khenh ding hen an tleihtir awt asi,” a ti.

³ Chu liau chun Bâwlpu Lalchem Kaiapha an ti mi inkulh sung tualmâi ah chun bâwlpu lal tla leh zatlâng upa tla chu anna pûm;

⁴ Jisu chu ngamlêm pêk hen tleih hen an thah khonâk ding hen anna thluk le;

⁵ sikhawmsele, "Kût sung chun si lah seh, chu lo chun zatlâng lakah nawknâk a hawng um sual lai,” an ti,

Bethani Ah Jisu Rangah Sariak Thuhnâk

⁶ Chun, Jisu chu Bethani ah, phâr Simon in ah a um liauah,

⁷ nunau pakhat alabasta bâwm ah sariak rimthâw man har tak put hen a sinah a hawng kal le, buh a ei liauah a lû ah a tawih.

⁸ Sikhawmsele, ṭhiruai tla nih chun chu chu an muh chun an thinthawk le, “Zei srangah me hi hâwi hen a veih salam?

⁹ Hi sariak hi man tam tak zuar hen, mipâm tla sinah pêk kho asi mi!” an ti.

¹⁰ Jisu lam nih chun chu chu a theih le, an sinah, “Nunau hi zei rangah nan nawktir? Ka tlûnah thil ṭha tak a ti asi.

¹¹ Mipâm tla chu nan sinah um kumza ding an si lo mazei, kei lam chu nan sinah um kumza ding kasi lo.

¹² Hi sariak rimthâw hen ka taksa a tawih mi hi, an hawng ka vûinâk ding mi rangah a timhtuah asi.

¹³ Thungâi tak hen ka nan simh na, laikulh zawzawngah hi Thâwngthâng Ṭha an simnâk zawng ah hi nunau thilti khawm hi amah theihkumzanâk ding hen an sim vima bâk lai,” a ti.

Juda Iskariot Nih Jisu Tleih A Tumnâk

¹⁴ Chu nûnah chun leinih tla lakah pakhat Juda Iskariot an ti mi chu bâwlpu lal tla sinah a kal le,

¹⁵ “Amah chu kan tleihtir na lai le, zei nan ka pêk lai?” a ti. Chun, tangka shekel sâwmthum pêk ding an tiamh.

¹⁶ Chu nûnah chun tleih ding hen remkâng tik a hâwl rawh.

Jisu Kalkanh Kût Buh Ṭhiruai Tla Hen An Dûmnâk

¹⁷ Chun, Sang Thilnu telhlo ni, ni masa chem ah ṭhiruai tla chu Jisu sinah an hawng kal le, “Kalkanh Kût buh einâk ding hen kha zeiah me an timhtuah piak sele na duh?” an ti.

¹⁸ Chun, anih nih chun, “Khuapi ah âumawh sinah kal ule, a sinah, ‘Sîntirtu nih chun ka tik a nâi rawh; ka ṭhiruai le hen Kalkanh Kût na in ah kan mang lai, a ti,’ va ti u,” a ti.

¹⁹ Chun, Jisu nih an sinah a ti mi hâwi hen ṭhiruai tla nih chun an ti, chun Kalkanh Kût buh chu an timhtuah rawh.

²⁰ Chun, zânleibâi asi rawh chun, ṭhiruai leinih tla hen buh an dûm le;

²¹ chun, an ei liauah anih nih chun, “Thungâi tak hen ka nan simh na, nan lakah minung pakhat nih a hawng ka tleihtir lai,” a ti.

²² Chun, thungâi an lawksawng le, a sinah, “Lalpa, keimah ma?” an ti chiau.

²³ Chun, anih nih chun, “Khêng hawng ka purhpitu tak nih a hawng ka tleihtir lai.

²⁴ Minung Fapa hi a thâwngthâng an rîn hâwitê khan a kal awt asi. Sikhawmsele, Minung Fapa tleihtirtu ding minung tlûn chu a pit! Chu minung chu suak lah sele a rangah a ṭha dauh lai,” ti hen a sâng.

²⁵ Chun, a tleihtirtu ding mi Juda nih a sâng le, “Rabbi, keimah ma?” a ti. Anih nih chun a sinah, “Si ta a,” a ti.

Zânriah Madung

²⁶ Chun, an ei liauah Jisu nih sang a lâk le, mal a sâwm le, a phel le; chun a ṭhiruai tla sinah a pêk le, “Lâk ule, ei u; hi hi ka taksa asi,” a ti.

²⁷ Chun, hâi a lâk le, lâwmthu a sim le, an sinah a pêk le, “Nan ektê hen din u;

²⁸ hi hi ka thisen, sual tla ngaihdamnâk ding ah mi tam tak rangah suak ding mi thutiamnâk chu asi.

²⁹ Sikhawmsele, ka nan simh na, ka Pa Ram ah nanmah tla hen a thar ka din ni a tlung lânlo chu tu thawk hen grep zûn rah lakah mi hi ka din nawlh lai lo rawh,” a ti.

³⁰ Chun, la an sak thluh rawh chun an suak le, Oliv Tlâng ah chun an kal rawh.

Peter Nih A Pheh Ding Mi Jisu Nih A Simkannâk

³¹ Chun, Jisu nih an sinah, “Tuzân hin nan ektê hen nan ka kaltâk ver lai; ‘Dawrâ vêngtu chu ka vuak lai le, dawrâ rual chu anna rek ver lai,’ ti rîn asi ruangah.

³² Sikhawmsele, ka thawknawlh nûnah Galili ram ah nan mâi leiah ka kal lai,” a ti.

³³ Peter lam nih chun a sinah, “An ektê hen an kaltâk khawmsele, kei lam chu ka nan kaltâk rîlmâl lai lo,” ti hen a sâng.

³⁴ Jisu nih a sinah, “Thungâi tak hen ka nan simh, tuzân ah âr khuang lânah veithum na ka pheh lai,” a ti.

³⁵ Peter nih a sinah, “Na thihnâk ah chun thi bâk awt khawmsele ka nan pheh rîlmâl lai lo,” a ti. Chu hâwi hen ṭhiruai tla zawzawng nih chun an ti chiau.

Getsemani Ah Jisu

³⁶ Chu thluh chun Jisu chu anmah tla hen munkhat hen Getsemani an ti mi chu an tleng le, chun a ṭhiruai tla sinah, “Khinah thla ka cham kar vial chu hinah hin to u,” a ti.

³⁷ Chun, Peter leh Zebedai fapa panih chu a put na le, a ngaihsia hen thungâi a lawksawng.

³⁸ Chun an sinah, “Ka thinlung thungâi a ngaihsia, thihnâk rê asi; hinah hin um ule, hawng ka vêngpi u,” a ti.

³⁹ Chun, tâwm hen mâi leiah a va kal le, a bawkbukhup le, “Ka Pa, tikho asi chun hi hâi nih hin hawng ka lanh seh; sikhawmsele keimah thu silo hen, nangmah thu thu si dauh seh,” ti hen thla a cham.

⁴⁰ Chun, ṭhiruai tla sinah a hawng kal le, annih chu it riap hen a muh na, chun Peter sinah, “Nannih nih dârkar khat men nan ka vêngpi kho lo mu?

⁴¹ Lêmnâk ah nan lût lonâk ding hen râlring kumza hen thlacham u. Thlarau lam nih chun a huam le, taksa lam chu a chak lo asi,” a ti.

⁴² Chun, veinihnâk ah a va kal le, thla a cham nawlh le, “Ka Pa, din lo hen hi hâi nih hin hawng ka lanh kho lo thlo chun nangmah thu thu si seh,” a ti.

⁴³ Chun, a hawng kal nawlh le, annih murui chu it riap hen a muh nawlh na le, thungâi an itmu a suak ruangah.

⁴⁴ Chun, a kaltâk na nawlh le, veithumnâk ah a thusim lîlâ thla a cham nawlh.

⁴⁵ Chu thluh chun ṭhiruai tla sinah a hawng nawlh le, an sinah, “Tuah lam chun it ule, a dîn u rawh. Zauhnik u, a tik chu a tlung rawh, Minung Fapa hi misual tla kut ah an tleihtir awt hi.

⁴⁶ Thawk ule, kan kal lai. Zauhnik u, hawng ka tleihtirtu ding chu a nâi rawh hi,” a ti.

Jisu Tleihnâk

⁴⁷ Chun, a sim liau chirah Juda, leinih tla lakah pakhat chu a hawng tleng rawh. Amah rual hen bâwlpu lal leh zatlâng upa tla sin thawk hen mi zapi cherkhet nâmsâu leh talhbo put hen an hawng tleng bâk.

⁴⁸ Chun, a tleihtirtu ding mi nih chun singsiahnâk ding a simhkan ver na, “Ka châwchawk mi chu amah chu asi lai, tleih u,” ti hen.

⁴⁹ Chun, Jisu chu a va fûk sawm le, “Chibai, Rabbi” ti hen, a châwchawk chiam.

⁵⁰ Chun, Jisu nih a sinah, “Kâwi, na hawng san chu ti rawh,” a ti. Chu kâ hen Jisu chu an fûk le, an tleih rawh.

⁵¹ Chun, Jisu murui lakah mi pakhat nih chun a kut hen a banh le, nâmsâu a phâwi le, Bâwlpu Lalchem sal chu a lengh le, a nakhaw tla phak hen a themh.

⁵² Chun, Jisu nih a sinah, “Na nâmsâu kha a siahnâk ah siah nawlh, nâmsâu lektu tla vial chu nâmsâu ber hen an thi awt asi.

⁵³ Tu khawm ah vânmifial sâng ruk mun leinih ngâk a tam dauh hawng ka fial piak ding hen ka Pa sinah ngiar kho lo hen ma na ka ruat?

⁵⁴ Sikhawmsele, ngiar menza khawmsele zeitin Pathian lasui thu hi hâwi hen a hawng um ding mi thu hi a hawng tlung kho lai?” a ti.

⁵⁵ Chu liau tak chun Jisu nih mi zapi tla sinah chun, “Nâmsâu tla, talhbo tla put hen rawkmang tleih ding hâwi hen hawng ka tleih ding hen nan hawng suak mu? Pathian Biakin ah nisiar sîntir na hen ka to le, nan ka tleih ṭung lo.

⁵⁶ Sikhawmsele, khuavâng lasui rîn tla chu a tlung khonâk ding hen hi bang zawzawng hi a hawng um rawh asi hi,” a ti. Chu liau chun ṭhiruai tla zawzawng nih chun amah chu an thlahthlamh le, an tek ver.

Bâwlpu Lalchem Mâika Ah Jisu Dîrnâk

⁵⁷ Chun, Jisu tleihtu tla nih chun Bâwlpu Lalchem Kaiapha in ah Dân sîntirtu tla leh upa tla anna pûmnâk ah chun anih chu an kalpi rawh.

⁵⁸ Sikhawmsele, Peter nih lât tak thawk hen amah chu a zûl le, Bâwlpu Lalchem in kulh sung tualmâi tiang hen; chun, a va lût le, a dawnghnâk muh ding hen vêngtu tla lakah a va to bâk.

⁵⁹ Chun, amah chu an thah khonâk ding hen bâwlpu lal tla leh lâirêltu tla zawzawng nih chun Jisu phiarnâk an hâwl le;

⁶⁰ âwkrâwl saksi tam tak hawng kal na khawmsele zeitin khawm an tawng lo.

⁶¹ A nehnûn ah lam chun minung panih an hawng kal le, “Hi minung nih hin ‘Pathian Biakin siat hen ni thum sung ah ka sak nawlh kho lai,’ a ti,” an ti.

⁶² Chun, Bâwlpu Lalchem chu a dîr le, a sinah, “Zeitin khawm na sâng lo mu? Hi bang tla nih an phiarnâk hi zei ti zia mesi?” a ti.

⁶³ Jisu lam chu a dâisip. Chun, Bâwlpu Lalchem nih chun a sinah, “Pathian nung min hen ka nan fâi. Mesia, Pathian Fapa chu na si ma? Hawng kan simh,” a ti.

⁶⁴ Jisu nih a sinah, “Si ta a. Sikhawmsele, ka nan simh, hi nûnah Minung Fapa hi thiltikhonâk vawrhlei ah to hen, a vân sûm tlûnah a hawng kal mi nan muh awt asi,” a ti.

⁶⁵ Chun, Bâwlpu Lalchem nih chun a nipuan tla a thlêk le, “Pathian a simsiat rawh; theihpitu dang zei kan herh lai rawh? Pathian a simsiat zia tu ah nan theih rawh, zeitin nan ngaih?” a ti.

⁶⁶ Annih nih chun, “Thi tlâk asi,” ti hen, an sâng.

⁶⁷ Chun, a mêl ah chil an sah le, an vuak le; zeimaw mi nih chun,

⁶⁸ “Nang, Mesia, âunih a nan bengh? Hawng kan simh,” ti hen, an bengh.

Peter Nih Jisu A Phehnâk

⁶⁹ Chun, Peter chu lêng ah inkulh sung tualmâi ah a to le; chun nungâk pakhat a sinah a hawng kal le, “Nang khawm Jisu sinah Galili ram ah um mi kha na si hi,” a ti.

⁷⁰ Sikhawmsele, anih nih chun, “Na thusim chu ka theih lo thlo,” ti hen an ektê mâika ah a pheh.

⁷¹ Chun in kulh kawtkâ ah a va suak kâ hen nungâk dang nih anih chu a muh le, chunah mi tla sinah chun, “Hi khawm hi Nazaret mi Jisu sinah um mi kha asi hi,” a ti.

⁷² Chun, “Chu minung chu ka theih loh,” ti hen siatsirh hen a pheh nawlh.

⁷³ Chun, sâwtlotê nûnah a kiangah dîr mi tla nih chun Peter sinah, “Nang khawm hi an sinah mi na si ngelchel, na hawlh ah â thei ko,” an ti.

⁷⁴ Chun, anih nih chun, “Chu minung chu ka theih loh,” ti hen hawlh siat â barh le, siat â sirh rawh. Chun, âr a khuang sawm.

⁷⁵ Chun, Peter nih chun, Jisu nih, “Âr a khuang lânah nangnih veithum na ka pheh lai,” a ti mi thu kha a hawng theih nawlh rawh. Chun, a suak le, ngaihsia tak hen a ṭap rawh.