MATHAI 15 - Bawm Common Language Bible Version

Thlâktu Tla Sîntirnâk

¹ Chu liau chun Jerusalem thawk hen Farisai tla leh Dân sîntirtu tla Jisu sinah an kal le,

² “Zei rangah me na ṭhiruai tla nih thlâktu thurovuih chu an buar tâwn? Sang an ei chun an kut an ṭâwl lo,” an ti.

³ Chun, anih nih chun an sinah, “Nannih khawm nih zei rangah nan thurovuih ruangah Pathian thupêk nan buar ne?

⁴ Pathian nih, ‘Na nu leh na pa chawnglawmh rawh,’ ‘Âuzawng a nu mawh a pa mawh simsiattu chu thi ngelchel seh,’ a ti ruangah.

⁵ Nannih lam nih chun, ‘Âuzawng a nu mawh a pa mawh sinah na ka mangnâk ding hi Pathian sinah pêk asi rawh, titu zawng chu a nu mawh a pa mawh chawnglawmh ding asi lo,’ nan ti tâwn.

⁶ Chun, nan thurovuih ruangah Pathian thu chu nan thlâu phah rawh mahi.

⁷ Mi perpê tla, Isai nih hin nan thu a simkan mi hi thungâi a dik ko!

⁸ ‘Hi minung tla nih hin an kâ hen an ka chawnglawmh le, an thinlung lam nih chun an ka lât tâwn.

⁹ Zeikhawm si sele, an sîntirnâk ah minung thupêk an sîntir na ruangah, an ka sawnh tâwn hi a thawt salam asi,’ a ti,” a ti le, a sâng.

Minung Nawmhtu Thil Tla

¹⁰ Chun, mi zapi tla chu a kawh na le, an sinah, “Ngâi ule, a ngaihtawnh dân thiam u;

¹¹ Kâ ah lût mi chu minung nawmhtu asi lo le, kâ thawk suak mi chu, chu tak chu minung nawmhtu asi dauh,” a ti.

¹² Chu liau chun a ṭhiruai tla an hawng kal le, a sinah, “Farisai tla nih kha thu kha an theih le, an thinthawk mi kha na theih ma?” an ti.

¹³ Anih lam nih chun, “Kûng zawzawng ka Pa vân ah mi nih a phun lo mi chu phâwi hen a um lai.

¹⁴ Annih chu zeikhawm siar lah u; ruitu mitchâw an si. Chun, mitchâw nih mitchâw lîlâ a rui chun khursaduap ah munkhat hen an tlâ vevê lai,” a ti le, a sâng.

¹⁵ Chun, Peter nih a sinah, “Tahṭhimh thu kha hawng kan simhfiang me ne?” a ti piak.

¹⁶ Chun, anih nih chun, “Tutiang hen nannih khawm nih theihnâk nei lo hen nan um nget rih mu?

¹⁷ Kâ ah lût mi vial chu paw lakah a tlâ le, pâwng kalnâk ah lawnh hen a um ti nan theih lo ma?

¹⁸ Kâ thawk suak lam chu thinlung thawk hen a hawng suak le; chu tak nih chun minung a nawmh tâwn asi.

¹⁹ Thinlung ah hin dawnnâk sual tla, mi thahnâk tla, ṭângdang pawmnâk, duhnâk, fîrnâk, phiarnâk, simsiatnâk tla a hawng suak tâwn.

²⁰ Chubang chu minung nawmhtu asi; kut ṭâwl lo hen buh ei lam nih chun mi a nawmh lo,” a ti.

Kanaan Nunau Nih Jisu A Zumhnâk

²¹ Chun, Jisu chu chunah mi chu a suak. Tura leh Sidon bial ah a kal rawh.

²² Chun, chu ram mi chu Kanaan nunau pakhat a hawng suak le, “Lalpa, David Fapa, hawng ka zângfah rawh, ka fanu khuri nih a tleih thlir asi,” ti hen a âu.

²³ Anih lam nih chun kâ khat hen men a sâng lo. Chun, a ṭhiruai tla nih chun, “Kan dung leiah a âu lemang mi, kaltir ko ma a,” ti hen an hawng ngiar.

²⁴ Anih lam nih chun, “Israel mi tla dawrâ tlâu sinah lo chun fial kasi lo,” a ti le, a sâng.

²⁵ Sikhawmsele, nunau chu a hawng kal le, “Lalpa, hawng ka ṭangpi rawh,” ti hen mâi a mûk.

²⁶ Chun, anih nih chun, “Fa tla sang lâk piak hen ui tla sinah lawnh chu â dawh lo,” a ti le, a sâng.

²⁷ Anih nih chun, “Lalpa, si lam chu asi; sikhawmsele, ui tla khawm nih an pu dawhkân lakah mi sang neknâwi a tlâ mi chu an ei tâwn lo mazei?” a ti.

²⁸ Chu kâ hen Jisu nih chun a sinah, “Nunau, na lungnâk a fâk tuktarâi! na duh hâwi hen na tlûnah um seh,” a ti le, a sâng. Chun, a fanu chu chu dâr thawk chun a hawng dam ko rawh.

Jisu Nih Mipi Tamtak A Damtirnâk

²⁹ Chun, Jisu chu, chu thawk hen chun a kal le, Galili Rilî kiang a tleng le; chun tlângah chun a kâi le, chunah chun a to rawh.

³⁰ Chun, mi zapi cherkhet ke khêng, mitchâw, hawlh kho lo, suaksual tla damlo tla tam tak an hawng put na le, a sinah an hawng kal le, a kê kiang ah an siah; chun, a damh khap na.

³¹ Chuvachun, mi zapi nih chun hawlh kho lo tla an hawng hawlh kho hen, a suaksual mi tla an hawng a remh hen, kekhêng tla kê hen an hawng kal hen, mitchâw tla an hawng muh kho mi an muh rawh chun thungâi chê an ti le; chun Israel tla Pathian chu an sawr rawh.

Jisu Nih Mipi Sâng Li A Khimtirnâk

³² Chun, Jisu nih a ṭhiruai tla chu a kawh na le, “Mi zapi tla hi tu ah ni thum ka sinah an um rawh le, ei ding zeikhawm an nei lo ruangah thungâi ka lungkham na asi; sungvâng bû hen kîrtir na ka duh lo, chu lo chun lam lakah an vâiphâl lai,” a ti.

³³ Chun, ṭhiruai tla nih chun a sinah, “Mi zapi hi tluk rak khawp rê ding hen sangtlêp chu tluk rak ramkaro ah kha zei mi me kan tawng lai?” an ti.

³⁴ Chun, Jisu nih an sinah, “Sângtlêp zei zat nan nei?” a ti. Chun, annih nih chun, “Tlêp sarih leh ngâ tâwmtê,” an ti.

³⁵ Chun, anih nih chun tual ah to ding hen mi zapi chu thu a pêk.

³⁶ Chun, sangtlêp pasarih leh ngâ tla chu a lâk le, lâwmthu a sim le, a phel le, ṭhiruai tla sinah a pêk. Chun, ṭhiruai tla nih chun mi zapi tla sinah an pêk.

³⁷ Chun, an ektê hen an ei le, an khawp khap; an ei bang neknâwi khawm chu khobung sarih an rût le, a khat.

³⁸ A eitu tla chu nunau leh ngâksia sim lo hen, upa karo khawm sâng li an si.

³⁹ Chun, mi zapi tla chu a ṭiaktir na nûnah lawng ah â chuan le, Magadan ram leiah a tlung.