MATHAI 10 - Bawm Common Language Bible Version

Jisu Nih Ṭhiruai Tla Rangah Thuneihnâk A Pêknâk

¹ Chun, a ṭhiruai leinih tla chu a kawh na le, khuri nâwmtâm tla nar kho ding hen leh damlo kip leh nganfâk kip damh khonâk ding hen thuneihnâk a pêk na.

² Chun, ṭhiruai leinih tla min chu hi bang hi an si: A masa chem ah chun, Peter an ti mi Simon leh a unau Andri; Zebedai fapa Jem leh a unau Johan;

³ Philip leh Bartholomai, Thom leh siah khawlhtu Mathai, Alphai fapa Jem leh Thadai,

⁴ Kana mi Simon leh a tleihtirtu Juda Iskariot tla hi.

Jisu Nih Ṭhiruai Leinih Tla A Fialnâk

⁵ Chubang leinih tla chu Jisu nih a fial na le, an sinah hi hâwi hen thu a pêk: “Phundang tla lampi ah kal lah ule, Samaria khua rerêng ah khawm lût lah u;

⁶ Sikhawmsele, Israel phun dawrâ tlâu tla sinah chun kal dauh u.

⁷ Chun, nan kal liauah, “Vân Ram chu a hawng nâi rawh,” ti hen, sim vima u.

⁸ Damlo tla damh ule, mithi tla thawh ule, phâr tla thenhlimhtir ule, khuri tla nar u; a thawt hen nan tawng le, a thawt hen pêk u.

⁹ Nan tâisâwm tla lakah ngûn tangka mawh, tangka mawh, dâr tangka mawh put lah u;

¹⁰ khualtlâwngnâk ding ah zâl mawh, kawrdawh mawh pheikawk mawh, ṭhianṭhunh mawh put lah u; rianṭuantu chu a ei ding tawng tlâk asi ruangah.

¹¹ “Chun, khua lian ah mawh khuatê ah mawh nan lûtnâk kip ah an tlungtir na ding hen a tlâk ding mi hâwl ule, nan suak nawlh lânlo chu chunah chun tlung kumza u.

¹² Chun, in ah chun nan lût awt bâiah chibai bûk na u.

¹³ Chun, in ah mi tla chu chibai bûk tlâk an si chun nan lungngamnâk thu chu an tlûnah tlung seh; an tlâklo lam chun nan lungngamnâk thu chu nan tlûnah hawng kîr nawlh seh.

¹⁴ Chun, âuzawng an lawmh na lo hen, nan thu khawm ngâilotu zawng, chu in thawk hen mawh, chu khua thawk hen mawh nan suak tikah chun nan kezaphah lakah mi valeidip khâwng u.

¹⁵ Thungâi tak hen ka nan simh na, lâirêl ni ah chun chu khua tla tuar ngâk chun Sodom leh Gomorah ram tuar ding chu a ziachâng a um dauh lai.

Tuarnâk Hawng Tlung Ding Mi Chu

¹⁶ “Ngâinik u, chingngia nâwngah dawrâ um hâwi hen ka nan fial na hi: chuvachun, rûl hâwi hen fing hen, vaṭhu hâwi hen pawi khawih lo hen um u.

¹⁷ Sikhawmsele, minung lakah chun a thiamthih u; lâirêltu tla a nan tleihtir na lai le, pumhnâk in tla ah an vuak na lai le;

¹⁸ asi, keimah ruangah governor tla leh lalchem tla mâikaah anmah leh phundang theihnâk ding hen an put na lai.

¹⁹ Sikhawmsele, an tleihtir na tikah chun, “Zeitin me, zei thu me ka sim lai?” ti hen lawksawng lah u; nan sim ding mi chu a tik takah chun a nan theihtir na awt ruangah.

²⁰ A simtu chu nanmah nan si awtlo le, nan Pa Thlarau nih nanmah lakah a sim dauh awt asi.

²¹ “Chun, thah ding hen unaupa leh unaupa anna tleihtir lai le, pa khawm nih a fa a tleihtir ber lai; fa tla khawm nih an nu leh pa tla an do lai le, an thahtir na lai.

²² Keimah min ruangah mi zawzawng huat nan si lai; sikhawmsele, a dawngh tiang hen tuar huamtu zawng chu, chu tak chu ruangsuah hen a um lai.

²³ Chuvachun, khua khat ah an nehsawh na tikah khua dangah tektâk u; thungâi tak hen ka nan simh na, Minung Fapa a hawng kal lânah Israel khua tla chu nan ṭawl thluh lai lo.

²⁴ “Sîntu a sîntirtu tlûnah a um lo; to-aw khawm a pu tlûnah a um lo.

²⁵ Sîntu chu a sîntirtu hâwi hen a hawng um mi leh to-aw chu a pu hâwi hen a hawng um mi chu â tâwk. Indâwngpu men ‘Belzebul’ an ti chun, a dâwngsung tla chu an ti ding rêng asi!

Minung Nih Ṭih Ding Mi Chu

²⁶ “Chuvachun, annih tla chu ṭih lah u; langlo ding hen thuh zeikawm a um lo, theihlo ding hen pheh zeikhawm a um lo.

²⁷ Mûi lakah ka nan simh na mi hi chêu ah sim u; nâ ah nan theih mi hi in tlûnah a chuan hen âu u.

²⁸ Chun, taksa thah kho hen thlarau thah kholotu tla chu ṭih lah u; Gehena ah thlarau leh taksa veih khotu lam chu ṭih lehlam u.

²⁹ Phâisen phittê panih Assarion khat hen an zuar tâwn lo mazei? Sikhawmsele, an lakah pakhat khawm nan Pa thu lo hen tual ah a tlâ lai lo.

³⁰ Nan samzâitê tiang khawm rêl hep asi.

³¹ Churuangah ṭih lah u; Phâisen phittê tam tak ngâk hen nan sung-û dauh asi.

Mi Le Tla Sinah Lalpa Ṭanhtu Chu Pa Vân Ah Mi Nih A Ṭanh Bâk Lai

³² “Chuvachun, mi le tla mâika ah hawng ka ṭanhtu zawng ka Pa vân ah mi mâika ah ka ṭanh bâk lai.

³³ Sikhawmsele, âuzawng mi le tla mâika ah an hawng ka phehtu zawng ka Pa vân ah mi mâika ah ka pheh bâk lai.

Mesia Ruangah Nungnâk Dawktu Nih Chun A Tawng Lai

³⁴ “Laikulh ah hin rem lêngtir ding hen hawng kal hen hawng ka ruat lah u. Rem lêngtir ding hen hawng kal kasi lo le, nâmsâu lêngtir ding hen hawng kal kasi dauh.

³⁵ Mi a pa dotir ding hen, fanu a nu dotir ding hen, mo a ni dotir ding hen hawng kal kasi.

³⁶ Mi a mêlma tla chu amah dâwngsungkhur lakah mi ngelchel an si lai.

³⁷ “Âuzawng a nu mawh a pa mawh keimah ngâk hen dâwt dauhtu chu ka mi si tlâk asi lo. Âuzawng a fanu mawh a fapa mawh keimah ngâk hen dâwt dauhtu khawm chu ka mi si tlâk asi lo.

³⁸ Âuzawng a kraws put hen hawng ka zûl lo mi chu ka mi si tlâk asi lo.

³⁹ Âuzawng a nungnâk tawngtu nih chun a dawk lai le; keimah ruangah a nungnâk dawktu nih chun a tawng lai.

Lâwmman

⁴⁰ “Âuzawng an lawmhnatu chu keimah lawmhtu an si le, âuzawng hawng ka lawmhtu chu hawng ka fialtu lawmhtu asi.

⁴¹ Âuzawng khuavâng chu khuavâng asi ruangah lawmhtu nih chun khuavâng lawmh man a tawng lai le, âuzawng mirep chu mirep asi ruangah lawmhtu nih chun mirep lawmh man a tawng lai.

⁴² Chun, âuzawng hi bang hawng ka zûltu tla lakah a mê chem mi pakhat sinah hin, ka ṭhiruai asi ruangah, tî dâi hâi khat cho khawm pêktu zawng chu, thungâi tak hen ka nan simh na, an lâwmman chu an dawk rîlmâl lai lo,” a ti.