MARK 16 - Bawm Common Language Bible Version

Jisu Thawknawlhnâk

¹ Chun, Dinhni chu a hawng lanh rawh chun, Mari Magdala mi, Jem nu Mari leh Salomi tla nih chun Jisu taksa chulh ding hen an va kal khonâk ding hen zeilo rimthâw an châwk.

² Chun, ni sarih ni masa chem ah, zîngtê ah, nî suak nûnah thlân chu an va tleng.

³ Chun, “Thlân kawtkâ ah mi lung chu âunih me a kan rilh piak ving lai aw?”

⁴ anna ti liau chirah an va chuanh le, lung chu rilh chia hen an muh le, lung chu a lian thlo asi.

⁵ Chun, thlân sungah an lût le, tlangvâl pakhat puan vâr aih mi, vawrhlei kângah to an muh le; an lawksawng rawh.

⁶ Chun, anih nih chun, an sinah, “Lawksawng lah u; Jisu Nazaret mi, an khenhbêk mi kha nan hâwl asi; a thawknawlh rawh; hinah a um lo rawh, zauhnik u, an vûinâk hi!

⁷ Sikhawmsele kal ule, a ṭhiruai tla leh Peter sinah chun, ‘Galili ram ah nanmah lânah a kal awt; nan sinah a sim hâwitê khan chunah chun nan muh lai,’ ti hen, simh na u,” a ti.

⁸ Chun, an thir le, chê an ti ruangah an suak le, thlân thawk hen chun an tek chiam le; an ṭih ruangah âu sinah khawm zeikhawm an sim lo.

THÂWNGTHÂNG ṬHA AH DAWNGHNÂK LI CHU Mari Magdala Mi Sinah Jisu A Langhnâk

⁹ [Chun, ni masa chem Pathian ni zîng ah, zîngtê ah a thawknawlh rawh chun Mari Magdala mi, a sungah mi khuri pasarih a nar piak mi sinah khan â langh masa chem.

¹⁰ Chun, anih chu Jisu umpitu tla sinah a va kal le, mithi ulh hen ṭap liau chu a simh rawh.

¹¹ Sikhawmsele, annih nih chun, a nung nawlh le, muh khawm a muh ti an theih ko na hen an lung lo.

Ṭhiruai Panih Sinah Jisu A Langhnâk

¹² Chun, chu mi nûnah chun an lakah mi panih ram lei fûk hen an kal liauah mêl dang put hen an sinah â langh.

¹³ Chun, annih nih chun ṭhiruai dang tla an va simh le, annih khawm chu an lung lêm lo.

Leikhat Tla Sinah Jisu A Langhnâk

¹⁴ Chun, chu nûn khawm ah chun, buh an dûm liauah leikhat tla sinah tak â langh le, a thawknawlh nûnah a muhtu tla thu chu an lung lo ruangah leh an thinlung chang leikâng thu ah a fâi na rawh.

¹⁵ Chun, an sinah, “Laikulh zawzawng ah kal ule, thilsiam zawzawng sinah chun Thâwngthâng Ṭha hi sim u.

¹⁶ A lung hen baptis hen a um mi chu ruangsuak hen a um lai le, a lunglotu lam chu mawh hen a um lai.

¹⁷ Chun, hi bang singsiahnâk tla nih hin lungtu chu a zûl vima lai: Ka min hen khuri tla an nâr lai le, hawlh thar hen an hawlh lai le;

¹⁸ rûl tla kut hen an lâk lai le, thihnâk tûr zei tal din khawmsele zeikhawm a pawi lai lo. Damlo tla tlûnah an kut an thâng lai le, an dam vima lai,” a ti.

Jisu Vân ah A Kâinâk

¹⁹ Chuvachun, Lalpa Jisu chu an sinah thu a sim thluh rawh chun vân leiah lâk hen a um le, Pathian vawrhlei ah a to rawh.

²⁰ Chun, annih chu an suak le, ram kip ah thu an sim rawh le, Lalpa nih anmah tla a ṭuanpi na le; a zûltu singsiahnâk tla hen thu chu a birhtir vima.] 9 [Nunau tla chu Peter leh a hâwi tla sinah an kal le, thâwngthang an sinah simh hen a um mi zawzawng chu a tâwikâng hen an simh na. 10 Chu nehnûnah, Jisu ngelchel nih suahlei thawk hen tlâklei ah a ṭhiruai tla chu zungzâl ruangsuahnâk thu thenhlimh leh nung chu phuang ding hen a fial na.]