MARK 12 - Bawm Common Language Bible Version

Grep Dûm Tahṭhimh Thu

¹ Chun, tahṭhimh thu hen Jisu nih an sinah a sim rawh: “Âunih mawh grep dûm a siam le, dâi hen a kulh le, grep sûrnâk khur a chawh le, in sâng a sak le, a bultu tla sinah thlawh lawh ding hen a pêk le, ram dang ah a kal rawh.

² Chun, kawih a chû rawh chun dûm ah a rah mi chu a tingvo bultu tla sinah mi lâk ding hen a bultu tla sinah chun sal pakhat a fial.

³ Chun, chu minung chu an tleih le, an vuak le, kut karo hen an kîrtir nawlh rawh.

⁴ Chun, sal dang an sinah a fial nawlh le; chu khawm chu a lû ah an liamh, ningzakkâi tak hen an siam.

⁵ Chun, sal dang a fial nawlh le; chu minung chu an thah. Sal dang tam tak khawm zeimaw mi an vuak le, zeimaw mi an thah.

⁶ Chun, pakhat, fapa duhtak a nei rih; ‘Ka fapa hi chu an zah lai,’ ti hen, anih chu a madung chem ah an sinah a fial.

⁷ Sikhawmsele, chubang a bultu tla nih chun, ‘Hi minung hi rotingtu ding chu asi; kan thah lai! Chun, a roting ding mi hi kan tâ asi ko lai,’ anna ti.

⁸ Chun, anih chu an tleih le, an thah le, grep dûm ah mi chu an lawnh rawh.

⁹ “Chuvachun, dûm dâwngpu nih chun zeitin a hawng ti lai? Bultu tla chu a hawng veih na lai le, dûm chu midang tla a pêk lai.

¹⁰ Hi Pathian lasui thu hi nan rêl lo mazei? “ ‘In saktu tla duh lo mi lung kha, chu tak chu a kil ah lung herh chem a hawng si rawh.

¹¹ Chu chu ‘Lalpa’ ti asi le; kan mitmuh ah a chê asi,’ ti hi,” a ti.

¹² Chun, amah chu tleih an tum le, sikhawmsele, mi zapi chu an ṭih le; chu tahṭhimh thu chu anmah tla tisan hen a sim ti an theih dangâiah. Chun, amah chu an kaltâk le, an kal rawh.

Kaisar Sinah Siah Châwi Thu Deihnâk

¹³ Chun, a thusim ah tleih ding hen Farisai tla leh Herod murui lakah mi âu tla mawh a sinah an fial.

¹⁴ Chun, annih chu an hawng tlung rawh chun a sinah, “Sîntirtu, mi dik tak na si le, âukhawm ṭih leh zah khun na nei lo ti kan theih, âukhawm thliar leh dang lo hen, sîset hen Pathian lei thu na sîntir tâwn asi. Kaisar sinah siah châwi hi dân asi ma, si lo? Kan pêk lai ma, pêk lai lo?” an ti.

¹⁵ Anih lam nih chun an perpet zia chu theih hen an sinah, “Zei rangah nan ka nik? Denari khat hawng put ule, ka zauh lai,” a ti.

¹⁶ Chun, an hawng put. Chun, anih nih chun an sinah, “Hi hi âu lem leh âu min mesi?” a ti. Chun, annih nih chun a sinah, “Kaisar,” an ti.

¹⁷ Chun, Jisu nih an sinah, “Kaisar thil tla chu Kaisar sinah pêk ule, Pathian thil tla chu Pathian sinah pêk u,” a ti. Chun, thungâi chê an ti.

Thawknawlhnâk Thu Deihnâk

¹⁸ Chun, Sadukai tla, thawknawlhnâk a um lo titu tla chu Jisu sinah an hawng kal le, a sinah,

¹⁹ “Sîntirtu, Mosi nih, ‘Âuzawng a unaupa nih fa nei lo hen a nupi thih tâk sele, a unaupa nih chun a nupi chu umpi hen a unaupa rangah chi a thlâk piak ding asi,’ ti hen hawng kan rîn piak asi.

²⁰ Unau pasarih an um le, upa chem nih nupi a nei le, chi thlah lo hen a thi.

²¹ Chun, a panihnâk nih chun a umpi le, chi thlah lo hen a thi nawlh le; a pathumnâk nih chu hâwi ber hen.

²² Chun, unau pasarih chu chi rerêng thlah lo hen an thi vima. A madung chem ah nunau khawm chu a thi rawh.

²³ Thawknawlh tikah anmah lakah âu nupi me asi lai? An pasarih nih chun nupi ah an umpi dangâiah,” ti hen, an deih.

²⁴ Jisu nih an sinah, “Hi ruangah hin silo ma, nan ngaih palh tâwn, Pathian lasui thu leh Pathian thiltikhonâk nan theih lo ruangah hin?

²⁵ Mithi lakah mi an thawknawlh tikah chun mipa leh nunau tla anna umh lai lo rawh le, vân ah vânmifial tla hâwi hen an si awt lehlam asi.

²⁶ Chun, mithi tla thawh hen an um ding thu chu-- Mosi lasuibu ah, Thingbû thu ah khan Pathian nih, ‘Kei Abraham Pathian, Isak Pathian, Jakob Pathian kasi,’ ti hen, a sawnh zia kha nan rêl lo mazei?

²⁷ Anih chu mithi Pathian asi lo le, minung Pathian asi dauh; thungâi nan ngaih sual asi,” a ti.

Thupêk Rokual Thu Deihnâk (Mat 22.34-40; Luk 10.25-28)

²⁸ Chun, Dân sîntirtu lakah mi pakhat a hawng kal le, anna êl mi chu a hawng ngâi. Jisu nih annih tla chu ṭha tak hen a sâng ti a theih le, a sinah, “Thupêk zawzawng lakah a zei hi me a herh chem?” ti hen a deih.

²⁹ Jisu nih, “Thupêk herh chem chu hi hi asi: ‘Israel tla, ngâi u, Lalpa kan Pathian chu Lalpa pakhat cho asi le;

³⁰ Lalpa na Pathian chu na thinlung zawzawng hen, na thlarau zawzawng hen, na dawnruatnâk zawzawng hen, na chaknâk zawzawng hen na dâwt ding asi, ti hi.

³¹ A sangtu chu hi hi asi: ‘Nangmah na dâwt hâwi hen na zâwlbâwm tla na dâwt ding asi,’ ti hi. Hi ngâk hen thupêk rokual rerêng a um lo,” ti hen, a sâng.

³² Chun, Dân sîntirtu nih chun a sinah, “Asi ngâk! sîntirtu, amah chu pakhat cho asi le, amah lo chu Pathian dang rêng an um lo,

³³ amah chu thinlung zawzawng hen, theihthiamnâk zawzawng hen, chaknâk zawzawng hen, mah a dâwt hâwi hen zâwlbâwm tla dâwt hi pum duah thilpêk leh bâwlnâk zawzawng ngâk hen a ṭha dauh khun ti hi, na sim dik tak ko,” a ti.

³⁴ Chun, fing tak a sâng ti Jisu nih a theih rawh chun a sinah, “Pathian Ram na lât lo,” a ti. Chu rî rawh chun âukhawm nih thu rerêng an deih ngam lo rawh.

David Fapa Mesia Chu

³⁵ Chun, Jisu nih Pathian Biakin ah a sîntir liauah anmah tla a sawnh na le, “Mesia chu David fapa asi ti Dân sîntirtu tla nih zei zia hen sim me an si?

³⁶ David tak nih Thlarau Thenhlimh hen, ‘LALPA nih chun ka Lalpa sinah, na mêlma tla na kê sirhsanh ah ka siam lânlo chu ka vawrhlei ah to rawh,’ a ti.

³⁷ David tak nih chun anih chu, ‘Lalpa,’ a ti dangâiah, zeitin a fapa asi lai?” a ti. Chun, mi zapi vântlâng nih chun lâwm tak hen a thu an ngâi.

Dân Sîntirtu Tla Lakah Fîmkhurnâk

³⁸ Chun, a sîntirnâk ah chun, “Dân sîntirtu tla lakah a thiamthih u; annih nih chun kawrdawh fual ruk hen tawih an duh tâwn le,

³⁹ sumtuah mun ah chibai bûk tla, pumhnâk in ah tophah ṭha chem tla, puaituahnâk ah mun ṭha chem tla an ngiat tâwn.

⁴⁰ Numei sum an ei le, mi muh ah sâwt tak thla an cham tâwn; chubang tla nih chun a mawh an phurh zual khun lai,” a ti.

Numei Thawhlâwm Thawh Thu

⁴¹ Chun, thawhlâwm bâwm zâwn ah chun Jisu chu a to, thawhlâwm ah mi zapi tla tangka thlâk zia chu a zauh le; minei tam tak nih cherkhet an tlâk.

⁴² Chun, numei pâm tak a hawng kal le, lepta panih a thlâk le, chu chu quadran khat tluk asi.

⁴³ Chun, Jisu nih chun a ṭhiruai tla chu a kawh na le, an sinah, “Thungâi tak hen ka nan simh na, thawhlâwm bâwm ah thlâktu dang zawzawng ngâk hen hi numei pâm tak nih a thlâk tam dauh.

⁴⁴ Hi bang zawzawng nih hin an neih a lei mi an thlâk asi; anih lam nih chun a duh liau tak, a neihlemtê, a um san mi zawzawng chu a thlâk ver asi,” a ti.