MALAKI 4 - Bawm Common Language Bible Version

LALPA Ni A Hawng Tlung Awt

¹ LALPA Zeizawng tikho nih, “Mi zûm tla leh misual tla fabû hâwi hen an kâng ding ni a hawng tlung awt rawh. Chu ni ah chun pakhat khawm âklo hen an kâng hep lai.

² Sikhawmsele ka thu ngâitu tla rang chun ruangsuahnâk thiltikhonâk chu nan lakah repnâk nî hâwi hen a hawng suak lai le, nî chêu hâwi hen damhnâk a hawng put lai. Chawlâ a rung lakah mi an suah le, thawsuak tak hen a um hâwi hen an lâwptlo lai.

³ Thil ka ti ni ah chun, misual tla chu nan neh na lai le, nan kezaphah tangah valeidip hâwi hen lamhbêk mi hâwi an si lai.

⁴ Ka to-aw Mosi sîntirnâk thupêk leh dân Sinai Tlângah Israel mi tla zawzawng nih zûl ding hen ka pêk mi kha theihkumza u.

⁵ Sikhawmsele LALPA ni ṭihnungkâi leh rokual tak a hawng tlung lânah nan sinah khuavâng Elija ka hawng fial lai.

⁶ Pa tla leh fa tla munkhat ah a pumh nawlh na lai le, chu hâwi asi lo chun ka hawng lai le, nan ram ka râwk lai,” a ti.