MALAKI 2 - Bawm Common Language Bible Version

¹ LALPA Zeizawng tikho nih bâwlpu tla sinah, “Hi hi nan rangah thupêk chu asi:

² Nan thilti hen keimah nan hawng ka zah ding asi. Ka thusim nan ngâilo chun nan tlûnah siat ka tlungtir awt. Nanmah ṭangpinâk ding ah thil nan tawng mi chu siat ka lawh awt. Ka thupêk tla nan zûl tatak lo ruang takah tu khawm ah siat ka barh rawh.

³ Nan fa tla chu ka rêp na lai le, bâwlnâk ran êk nan mêl ah ka nalh lai le, êk pawngnâk leiah kalpi hen nan um lai.

⁴ Churawhchun, thupêk kan pêk na mi asi ti nan theih lai rawh le, bâwlpu leh Levi thlâk tla hen thudân ka tuk mi â râwk lonâk ding hen.

⁵ “An hawng ka zahnâk ding hen an sinah ka thudântuk lakah nungnâk damnâk thu ka tiamh na. Chubang liau chun an hawng ka zah hen an hawng ka ṭih.

⁶ Diklonâk silo hen diknâk anna sîntir. Ka sinah um nuam an ti le, diknâk lâwng an ti le, midang rang khawm sual tilo ding hen mi tam tak an ṭangpi na.

⁷ Pathian theihnâk dik sîntir chu bâwlpu rianṭuan asi. LALPA Zeizawng mifial an si ruangah an sinah ka duhzia sîn ding hen mi tla an kal ding asi.

⁸ “Sikhawmsele, tuah nannih bâwlpu tla, diknâk lampi mi chu nan pial rawh, nan sîntirnâk nih mi tam tak nih thil diklo ti ding hen a kalpi na. Nan sinah ka thudântuk chu nan râwk rawh.

⁹ Churuangah ka duh dân nan zûl lo ruangah leh ka mi tla nan sîntir na liauah mikip bang khap hen nan titir na lo ruangah Israel mi tla nanmah zauhnawmhtu ah ka siam rûl na bâk awt,” a ti.

Pathian Lakah Mi Zapi Zumhkâilonâk

¹⁰ Kan ektê hen kan pa â khat mi asi lo ma? Pathian pakhat nih hawng kan siam mi ver asi lo ma? Chu hâwi asi mi zei rangah khatlei khatlei thu kanna tiam mi chu kan râwk hen hawng kan thlâktu nih Pathian hen thudântuk an siam mi chu kan siarlo zia?

¹¹ Juda mi tla nih Pathian sinah mi thutiam an buar le, Jerusalem ah leh ram pumpi ah thil ṭihnungkâi an ti. LALPA nih a duh tak mi Biakin chu an nawmh. Ramdang pathian sawnhtu nunau hen anna umh.

¹² Israel murui lakah chubang hâwi titu chu, LALPA, Zeizawng tikho sinah phun thil ap lakah a tel lah seh.

¹³ Hi hi thil dang nan ti mi chu asi, a sinah thil ap nan put mi tla a pawmlo rawh ruangah LALPA mâichâm chu mitthli tlâk leh ṭap bû hen nan thlûk rel.

¹⁴ Zei rangah me a pawm lo nan ti, nan no liauah nanna umhnâk lakah thutiam nan buar mi a theih ruangah asi. Na nupi chu thutiam nan neipi mi asi le, Pathian mâika ah zumhkâi tak a um ding hen thu nan tiam mi chu nan buar.

¹⁵ Pathian nih taksa leh thlarau ah amah hen pumkhat an siam na mi asi lo ma? Hi lakah hin a thiltum zei mesi? Pathian mi, fa dik tak si mi nan neinâk ding hen asi. Churuang chun nan lakah âukhawm nih mah nupi sinah thutiam buar lo ding hen theih set u.

¹⁶ LALPA, Israel Pathian nih, “Nupi mâk ka hua,” ti hen a sim. Nan lakah âutal nih a nupi sinah thil diklo a ti mi chu ka hua asi. Nan nupi sinah zumhkâi hen thu nan tiam mi râwk lo ding hen theih set u,” a ti.

Lâirêlnâk Ni A Nâi Rawh

¹⁷ Na thusim hen LALPA rangah nengtawr a kâi. Nangnih, “Zeitin nengtawr ka kâitir?” na ti. “LALPA, Zeizawng tikho nih thilsual titu tla chu ṭha hen a ruat na, churuang chun a lawmh na,” na ti mi lakah. Asi lo leh, “Pathian rep chu zeiah a um?” na ti mi lakah.