LUNGFÂKNÂK 3 - Bawm Common Language Bible Version

Rêpnâk, Rimnâk Leh Lungumnâk

¹ Pathian nih a rêp ding mi chu zei asi theihtu kasi.

² Mûi lakah thûk dadauh hen hawng ka lûttir le,

³ Vuakfung hen khuaruat lo thlo hen hawng ka vuak nûnah hawng ka vuak nawlh.

⁴ Ka taksa chu ka sa lang têt hen a siah le, ka ruh tla a khiak ver.

⁵ Hamhnâk leh lawksawngnâk rêngin ah hawng ka khâr khumh pang.

⁶ Thihnâk mûi kumza mi lakah hawng ka umtir.

⁷ Rêng a hawng ka khimh le; suak ding hen lungumnâk nei lo mi rêngtlâ kasi.

⁸ Ṭangpi duh hen fâk tak hen ka âu le, sikhawmsele Pathian nih ngâi ding a duh lo.

⁹ Hâwr lemang hen ka kal le; ka hernâk zawng ah lungkulh nih hawng ka kham.

¹⁰ Vawm hâwi hen hawng ka bawh le; chakeibaknei hâwi hen hawng ka nam.

¹¹ Lampi ah hawng ka ṭhâwl le, hawng ka sâm dip le, hawng ka mâk thlo.

¹² A chanhtiang a kâu le, muidik sêlnâk ah hawng ka mang.

¹³ Ka tak lakah chanhtiang thalzum lût bir hen a hawng ka kah.

¹⁴ Nî tlâk hen mi nih an ka nihsanh le; annih rang chun dehchawh salam ding cho kasi rawh.

¹⁵ Thil khâ hâng chu hawng ka dawlhtir le buh khâ leh tî khâ hawng ka eitir hen hawng ka dinh.

¹⁶ Tual lakah ka mêl a rûntir le, lungteret lakah ka hâ a kiak ver.

¹⁷ Damnâk, thlangamnâk leh lâwmnâk ka philh hep.

¹⁸ Dam ding hen rêng ka duh lo rawh; LALPA lakah ka lungumnâk a vei ving.

¹⁹ Ka nganfâknâk leh in nei lo hen ka um mi dawnnâk chu tûr khâ asi le;

²⁰ Ka ruat chiam le, ka thinlung a dî thlo.

²¹ Sikhawmsele hi thil pakhat ka theih kâ hen lungumnâk a um nawlh:

²² LALPA dâwtnâk leh khuaruatnâk chu tlawlh dahlo hen a um vima.

²³ Zînglei hâwi hen a thar le, nî suak ding mi theih chia hâwi asi.

²⁴ LALPA chu ka neih zeizawng asi le churuangah amah lakah lungumnâk ka nei.

²⁵ LALPA chu amah rinhsanhtu mikip sinah a ṭha.

²⁶ Churuangah ruang hawng kan suah ding mi lakah felfê tak hen amah kan ngâk chun kan rangah a ṭha chem asi.

²⁷ Seino kan si liauah hi hâwi hen felfê tak a um tum hi a ṭha chem asi.

²⁸ Kan tuar liau khawm ah mah lâwng hen felfê tak hen dâisip hen kan to ding asi.

²⁹ Lungumnâk a um kho ding hen pumpêk hen kan kûn ding asi.

³⁰ Vuak leh zauhnawmhnâk khawm kan duh ver ding asi.

³¹ LALPA chu mi khuaruat tak asi le, hawng kan nawng kumza ding asi lo.

³² Ngaihsia tak hen hawng kan umtir kho. Sikhawmsele, hawng kan dâwtnâk chu a fâk thlo asi ti theih chia asi.

³³ Ngaihsiat mawh nganfâk kan tuar liauah â lâwm lo.

³⁴ LALPA nih rêngin ah kan thinlung lawksawngnâk chu a theih;

³⁵ Diknâk tla hawng kan pêk mi kan duh lo liau khawm a theih le;

³⁶ Lâirêlnâk ah thudik mahlo leikângah kalpi mi khawm a theih.

³⁷ LALPA duhkâng cho mang asi kumza tâwn.

³⁸ A thupêk lakah chun a ṭha mi leh a sia mi anna bang cho.

³⁹ Kan sual ruangah rêp hen kan um liauah zei rangah kan chipchiar nget awt?

⁴⁰ Kan umdân dawn set hen LALPA sinah kan kîr ding asi.

⁴¹ Vân ah mi Pathian sinah kan thinlung awng hen thla kan cham lai.

⁴² “LALPA, na lakah kan sual le, kan hel le, na kan ngaihdam duh lo rawh.

⁴³ “Na kan ṭhâwl le na kan thah rawh; na thinthawknâk nih na khuaruatnâk a thuh ving.

⁴⁴ Thinthawknâk vândâwm a sah tuktarâi ruangah kan thlachamnâk nih a tâwn kho lo.

⁴⁵ Hi laikulh nâwmtâm pawng ah na kan siam.

⁴⁶ “Kan mêlma tla nih hawng kan zauhnawmh le, hawng kan tluktlak.

⁴⁷ Siat leh râwk hen kan um le, ningṭih leh lâu hen kan um.

⁴⁸ Ka mi le tla siat leh râwknâk ruangah ka mitthli tiva hâwi hen a luang.

⁴⁹ “Ka mitthli chu tiva hâwi hen dawnglo hen a zut.

⁵⁰ LALPA nih vân thawk hen hawng ka zauh hen hawng ka muh lânlo chu.

⁵¹ Khuapi sungah mi nunau tla lakah thil a hawng tlung mi ka muh hen ka thinlung a ngaihsia.

⁵² “A san umlo hen hawng ka hua tuk, a mêlma nih va hâwi hen an ka rêng.

⁵³ A nung hen khur sungah an ka thlâk le, lung hen an ka sinh pang.

⁵⁴ Tî nih hawng ka nîm awt le, thihnâk a nâi ti ka theih.

⁵⁵ “LALPA khur tawdeng thawk hen kan âuh asi.

⁵⁶ Kan âuh mi ngâi ding hen ka nan ngiar liauah na theih.

⁵⁷ Na ka sâng le, ṭih lo ding hen na ka simh.

⁵⁸ “LALPA, ruangsuah ding hen na hawng le, ka nungnâk na hum.

⁵⁹ Ka lakah thil diklo ti hen a um mi chu na theih le, na ka sunhsaknâk hen lâirêl.

⁶⁰ Ka mêlma tla nih an ka hua le, an ka phiar zia khawm na theih.

⁶¹ “LALPA, an ka zauhnawmh mi leh an ka phiarnâk tla na theih.

⁶² Nî tlâk hen keimah thu karo an ruat le, an thilti ding mi an ruat.

⁶³ Zînglei thawk hen nî tlâk hen an ka nihsanh.

⁶⁴ “LALPA, an thilti ruangah rêp na le,

⁶⁵ Siatbarh na le, lungdawngnâk hen khattir na!

⁶⁶ Thah hep na le, tual ah mi tlâutir phin na! “ a ti.