LUNGFÂKNÂK 2 - Bawm Common Language Bible Version

LALPA Nih Jerusalem A Rêpnâk

¹ LALPA nih a thinthawknâk hen Zion chu mûi hen a khuh. A vân rokualnâk chu siatnâk ah a changtir. A thinthawk ni ah chun, a Biakin men a kaltâk.

² LALPA nih khuaruatnâk nei lo thlo hen Juda ram khua kip chu a râwk le, An vêng mi ram lakah kulh tla chu siat hen a um. Lalram tlûnah leh a lâirêltu tlûnah mualphonâk a tlungtir.

³ A thinrunhnâk hen Israel chaknâk chu a veih le; Mêlma a hawng liau khawm ah ṭangpi ding hawng kan duh lo. Kan lakah mei hâwi hen a thinthawk le, thil zeizawng a râwk ver.

⁴ Mêlma hâwi hen a chanhtiang hen hawng kan zâwn le; Kanna lâwmnâk leh hawng kan lawmhtirtu tla chu a thah hep na. Jerusalem ah hin a thinthawknâk a kâng mi chu kan tuar rawh.

⁵ Mêlma hâwi hen LALPA nih Israel chu a veih rawh; A kulh leh a lal in tla chu râwk dep hen a mâk. Juda mi tla tlûnah ngaihsiatnâk dawnglo a tlungtir.

⁶ Amah kan sawnhnâk Biakin chu a mântir dip le, Ni thenhlimh leh Dinhni tla chu a dawngtir rawh. Lalchem leh bâwlpu tla nih a thinthawknâk chu bang cho hen an tuar.

⁷ LALPA nih a mâichâm chu a nawng le A Biakin thenhlimh chu a kaltâk rawh; A kulh tla chu mêlma nih râwk ding hen a siang. Lâwm tak hen Pathian kan sawnhnâk lakah nehtu an si ruangah an âu.

⁸ LALPA nih Zion kulh chu râwk ding a tum rerêng; Râwk dep ding hen a tahtimh zet mi rawh. A kulh leh a insâng tla khawm tu chun râwk dep hen a um rawh.

⁹ A kulh kawtkâ tla chu nâwm nih a silh le, A kalhnâk tluan tla khawm a man ver. Lalchem leh milian tla khawm tu chun sal ah an um ver rawh. Dân sîntirnâk khawm a um lo rawh, Khuavâng tla khawm nih LALPA sinah mi muhnâk an nei lo rawh.

¹⁰ Jerusalem ah tarpa tla chu dâisip hen tual ah an to le, An lû ah valeidip an phulh le, an tak lakah salâpuan anna aih, Nungâk tla khawm tual leiah an buk.

¹¹ Ka ṭapnâk ah ka mit khawm a dî le, Ka thinlung khawm a nawk, Ka mi tla siat leh râwknâk ruangah ngaihsia hen ka dî, Ngâksia leh fasêm tla chu khuapi zâwllâi ah an uai tep.

¹² An nu tla sinah, ‘Ka sung a vâng, ka tî a hâl,’ ti hen an ṭap; Liamh mi hâwi hen zâwllâi ah an tlû. Dusah hen an nu pawm bû hen an thi.

¹³ Aw Jerusalem, Jerusalem duhtak, zei ka sim kho rawh? zeitin lung kan ngamh kho lai? Âukhawm nih hi hâwi an tuar dahlo. Na siatnâk chu tisumsumriat hâwi hen dawngh a nei lo; lungum kho asi lo rawh.

¹⁴ Na khuavâng tla khawm nih âwkrâwl thu cho lo chu zeikhawm sim ding an nei lo; Na sualnâk langh lo hen an thusim nih a nan perpet. Rim ding a herh lo ti ruatnâk a nan neihtir na.

¹⁵ Na kiangah kaltu nih nang khuapi chu a nan zauhnawmh. An lû an lei le, Jerusalem â râwk mi chu an nihsanh. “Hi hi khuapi duhkâi tak ma asi? Hi hi laikulh nih an putso mi ma si?” an ti.

¹⁶ Na mêlma tla nih an tluktlak le, hua tak hen an zauh. An kam an seh le, “Kan râwk dep rawh,!” Hi hâwi um ding mi ni hi kan ngâk mi rêng asi!”an ti.

¹⁷ LALPA nih ti ding hen a ṭhih na mi chu A dawnghnâk ah a ti taktê rawh. A lân thawk a hawng kan simhkan rawh hâwi hen Khuaruat lo hen hawng kan veih dep rawh. Niamh hen kan um mi lakah, kan mêlma tla chu Nehtu si hen a lawmhtir na rawh.

¹⁸ Aw Jerusalem, na kulh tla chu LALPA sinah ṭaptir na! Na mitthli chu tiva hâwi hen a sûn a zân hen luang seh; ṭapnâk leh ngaihsiatnâk ruangah uai tep rawh!

¹⁹ Zân khuavâr hen LALPA sinah ṭap ding hen thawk lemang le; Na thinlung pêk le, na fa tla tlûnah khuaruat ding hen a sinah deih. Zâwllâi a ker kip ah ngâksia chu sungvâng hen an thi rawh!

²⁰ Aw! LALPA, zauhnik! Na tuartir na mi tla chu zauhnik! Nunau tla nih an dâwt mi an fa sa an ei! Bâwlpu leh khuavâng tla chu Biakin sung ah thah hen an um!

²¹ Upa, ngâksia bang cho hen khua lâi ah an thi le; Mêlma riamnâm hen tlangvâl leh nunau tla chu thah hen an um. Na thinthawk ni ah khuaruatnâk umlo thlo hen na thah na.

²² Ka kiangkam ah ka mêlma tla chu Ningṭihnâk nuamsabut tuah ding hen na sâwm na le, Na thinthawk ni ah chun âukhawm an âwl kho lo. Ka fa ka châwm le, ka dâwt na mi an thah na.