LUK 17 - Bawm Common Language Bible Version

¹ Chun, Jisu nih a ṭhiruai tla sinah, “Tlûknâk tla hi um lo kho asi lo, sikhawmsele, tlûknâk umtirtu tlûn chu a pit!

² Hi bang mi mê tla lakah pakhat khawm tlûktir ngâk chun a tlûktirtu ngâwng ah fâng rialnâk lung awihtir hen tisumsumriat ah thlâk sele a rangah a ṭha dauh lai.

³ Thiamthih u! “Na unau nih thil a sual chun, nun simh rawh; chun â sîr chun ngaihdam rawh.

⁴ Ni khat ah na tlûnah vei sarih thil sual hen, vei sarih, ‘Ka sîr,’ ti hen, nangmah leiah a hawng âwn chun na ngaihdam ding asi,” a ti.

Lungnâk

⁵ Chun, ṭhiruai tla nih chun Lalpa sinah, “Kan lungnâk pungtir,” an ti.

⁶ Chun, Lalpa nih chun, “Anṭam chî fang khat hâwi lungnâk nan nei chun, hi theipi kûng sinah hin, ‘Hawng a phâwi le, tisumsumriat ah va a phun, nan ti lai le, nan thu a âwi ko lai,” a ti.

To-aw Rianṭuan

⁷ “Sikhawmsele, nannih lakah âuzawng nih tual nâwn hen mawh dawrâ vêng hen mawh to-aw nei ule, a hawng tlung kâ hen, ‘Buh ei hawng a dawmh sawm,’ âunih nan ti lai?

⁸ ‘Ka ei ding hawng ka tuah piak le, na tâi sâwm le, ka din leh ka ei dih lânlo chu hawng ka bul; chu nûnah chun nang na din hen na ei lai, âunih ti dauh lo lai?

⁹ Nan thu hâwi hen a ti ruangah nan to-aw sinah lâwmthu nan sim dah mazei?

¹⁰ Chu hâwi ber hen nannih khawm nih nan sinah thupêk zawzawng hâwi hen nan ti nûnah, ‘to-aw salam kan si, kan ti ding mi rêng asi,’ ti u,” a ti.

Phâr Parâ Rangah Jisu Nih A Damhnâk

¹¹ Chun, Jerusalem ah an kal awt ah, Samaria leh Galili ram chu a lanh.

¹² Khua zeimawh ah a lût awt liauah mi phâr parâ nih an tawng. Chu tla chu lât takah an dîr le,

¹³ chun hâu fâk tak hen, “Jisu! Sîntirtu! hawng kan siherh,” an ti.

¹⁴ Chun, anih nih chun chu chu a muh rawh chun an sinah, “Bâwlpu tla sinah va a zauhtir u,” a ti. Chun, an kal liauah chun an thiang chawlh rawh.

¹⁵ Chun, an lakah pakhat nih a dam tih â theih kâ hen hâu fâk tak hen Pathian sawr bû hen a kîr nawlh rawh.

¹⁶ Chun, Jisu kê bul ah a bawkbukhup le, a lâwmthu a sim. Chu minung chu Samaria mi asi ngengê.

¹⁷ Chun, Jisu nih a sâng le, “Mi parâ kha nan thiang rawh silo ma? Pakua tla kha zeiah?

¹⁸ Pathian sawr ding hen hawng kîr nawlh mi lakah, hi ram dang mi cho lo hi, âukhawm nih an tawng lo masi?” a ti.

¹⁹ Chun, a sinah, “Thawk le, kal rawh, na lungnâk hi na dam phah asi,” a ti.

Ram A Hawng Tlung Ding Mi Chu

²⁰ Chun, Farisai tla nih Pathian Ram a hawng tlung tik ding an deih ruangah an sinah, “Pathian Ram chu muh kho hen a hawng tlung lo.

²¹ ‘Zauhnik, hinah hi,’ mawh ‘Khinah khi,’ mawh khawm an ti lai loh. Ngâinik u, Pathian Ram chu nan lakah a um asi,” a ti le, a sâng.

²² Chun, ṭhiruai tla sinah chun, “Minung Fapa dam liau ni tla hi ni khat tal nan muh duh ni a um teh lai, sikhawmsele, nan muh lai lo rawh.

²³ Chun, nan sinah, ‘Zauhnik u, khinah khi, zauhnik u, hinah hi,’ an ti na lai. Kal lah ule, annih chu zûl lah u:

²⁴ Kâwlkil khatlei dawmh thawk hen khatlei dawngh tiang mîmthlâ a lek le, kâwlkil khatlei tiang a chêu hâwi khan Minung Fapa hi a hawng nawlh ni ah a um awt asi.

²⁵ Sikhawmsele, chu lânah chun thil tam tak a tuar ding asi, chun tu san minung tla duh lo hen a um ding asi.

²⁶ Chun, Noa dam liauah thil umzia hâwi khan, Minung Fapa a hawng kal nawlh ni ah khawm a um bâk lai.

²⁷ Noa chu lawng ah a lût le, buanso a hawng tlung le, an ektê hen a thah ver na ni kha a tlung lânlo chu an din hen an ei le, nupi pasal anna umh tâwn.

²⁸ Chu hâwi ber hen, Lot dam liauah a hawng um; an din hen an ei le, an châwk hen an zuar le, an chîng le, an sak tâwn.

²⁹ Sikhawmsele, Sodom khua thawk hen Lot a suak ni ah chun vân thawk hen mei leh kât a sûr le, an ektê hen a thah ver na.

³⁰ Chu hâwi ber hen Minung Fapa hi a hawng a langh ni ah chun a um lai.

³¹ “Chu ni ah chun âuzawng a sum in sungah um hen, amah in tlûnah a um mi chu lâk ding hen ṭum lah seh; chun lo ah um mi chu tlung lah seh.

³² Lot nupi theihkumza u.

³³ Âuzawng a nungnâk hum tumtu nih chun a thlâu lai le, âuzawng a nungnâk thlâutu nih chun a hum lai.

³⁴ Ka nan simh na, chu zân ah chun ihkhun pakhat ah minung panih it mi an um lai le, pakhat chu lâk hen a um lai le, pakhat chu mâk hen a um lai.

³⁵ Nunau panih fâng rial hen an um lai le, pakhat chu lâk hen a um lai le, pakhat chu mâk hen a um lai,” a ti.

³⁶ Lo ah mi panih an um lai le, pakhat chu lâk hen a um lai le, pakhat chu mâk hen a um lai.

³⁷ Chun, a ṭhiruai tla nih chun a sinah, “Lalpa, zeiah me?” an ti le, an sâng. Chun, Jisu nih chun an sinah, “Ruak umnâk zawng ah ruaklâwmmû tla khawm anna pûm lai,” a ti.