LEVITICUS 5 - Bawm Common Language Bible Version

Sual Thil Ap lakah Thu Herh

¹ Hi bang thu lakah hin sual thil ap a herh. Mi âumawh thufiang deih hen lâirêlnâk mun ah kawh asi hen, a muh le a theih mi fiang tak a sim kho lo chun, a mawh chu amah nih a phurh lai.

² Mi âunih mawh tum ruang silo hen, dân nih thianglo hen a ruat mi a tawngh chun, chu tla chu ran a thi mi mawh, a tawngh hen thil thianglo a tawngh mi a theih kâ hen amah chu a nâwm hen a sual asi.

³ Mi âunih mawh tum ruang silo hen îk mi minung a tawngh chun amah khawm a nâwm sih, thil a ti mi â theih ka hen sual ah ngaih asi.

⁴ Mi âunih mawh a thu zeikhawmlo lakah siat a tham chun a thilti a theih kâ hen sual ah ngaih asi.

⁵ Mi nih thilsual a ti chun thutluang a vâwr lai le,

⁶ a sual man rêpnâk rang ding hen LALPA sinah dawrâ a nunau mawh kêl mawh thil ap ah a put ding asi. Bâwlpu nih chu minung sual rangah bâwlnâk a ap lai.

⁷ Mi nih kêl mawh dawrâ mawh a ti kho lo chun a sual man pêk ding hen vaṭhu panih mawh lâilêng panih mawh LALPA sinah a pêk lai le, pakhat chu sual thil ap ah, pakhat chu duahphung thil ap rangah.

⁸ Bâwlpu sinah a put lai le, amasa hen vâ chu sual bâwlnâk ah a ap lai. A lû dawh phak lo hen a ngâwng a khiak lai le,

⁹ a thî chu mâichâm sîr a theh lai. A thî dang chu mâichâm bul ah a luangtir lai. Hi hi sual thiangnâk ding hen thil ap asi.

¹⁰ Vâ a panihnâk chu dân hâwi hen duahphung thil ap ah a ap lai. Hi hâwi hen bâwlpu nih chun, chu minung sual bâwlnâk chu a ap lai le, ngaihdam asi lai rawh.

¹¹ Mi nih vaṭhu panih mawh lâilêng panih mawh a nei lo chun, sangvut kilogramme khat sual thil ap rangah a ap ding asi. Oliv sariak mawh rimthâw mawh a telh ding asi loh, fâng thil ap asi lo le, sual thil ap asi ruangah.

¹² Bâwlpu sinah a hawng put lai le anih nih zapei khat LALPA sinah zeizawng ap ver asi ti theihnâk ding hen eiphung thil ap mi hâwi hen mâichâm tlûnah a duah lai. Chu chu sual thiangnâk thil ap asi.

¹³ Hi hâwi hen bâwlpu nih chun minung sualnâk rang ding ah bâwlnâk ap asi lai le, ngaihdam asi lai. Fâng ap mi hâwi hen a lei mi vial chu bâwlpu vo asi.

Rulhnâk Thil Ap

¹⁴ LALPA nih Mosi sinah hi bang dân tla hi a pêk.

¹⁵ Mi nih a tum lo hâwi tak hen LALPA thil thenhlimh ah rulh ding mi lakah a rulh kho lo chun, rulh nawlhnâk thil ap LALPA sinah dawrâ mawh kêl mawh a mipa simsâwinâk umlo mi a hawng put ding asi. A man zat chu dân nih a ruat mi zia asi lai.

¹⁶ A rulh kho lo mi rulhnâk ding hen a lei zâ lakah kul a pêk ding asi. Bâwlpu sinah a va pêk lai le, bâwlpu nih ran chu, chu minung sual ruangah a ap lai le, chu minung chu ngaihdam asi lai.

¹⁷ Mi nih a tum ruang si lo thlo hen LALPA thupêk a buar chun a sual asi, a sual man chu châwi asi lai.

¹⁸ Rulhnâk thil ap rang ding ah bâwlpu sinah kêl mawh dawrâ mawh a mipa sâwinâk umlo mi a hawng put ding asi. A man chu dân nih a ruat zia zia asi lai. Chu misual rangah bâwlpu nih bâwlnâk a ap lai le, ngaihdam asi lai.

¹⁹ LALPA lakah a sual mi rulhnâk ding ah thil ap asi.