LEVITICUS 4 - Bawm Common Language Bible Version

Tumlo Mi Sual Apnâk

¹ LALPA nih Mosi chu thu a pêk le,

² LALPA mi lakah âuzawng nih hi bang dân tla hi zûl ding hen simh na a ti.

³ Bâwlpu Lalchem sualnâk ruangah zapi tla tlûnah mawhnâk a tlung chun, chawchal sâwinâk umlo mi sual bâwlnâk ding ah LALPA sinah a pêk ding asi.

⁴ Puanin kawtkâ ah chawchal chu a hawng put lai le, a lû tlûnah a kut a thâng lai le, LALPA mâika ah a thah lai.

⁵ Churawhchun, Bâwlpu Lalchem nih chawchal thisen zeimaw zat chu a put lai le, Puanin sungah a lûtpi lai.

⁶ A kutdawng chu thisen lakah a nîm lai le, puanzar mâika ah vei sarih a theh lai.

⁷ Thisen chu Puanin sungah mi rimthâw duahnâk mâichâm ki fawng a buaih lai. Thisen dang vial chu Puanin tualmâi ah mi bâwlnâk duahnâk mâichâm bul ah a thlêt lai.

⁸ Hi chawchal lakah mi a thâu zawzawng, a sungril thâu,

⁹ a kal leh a kal lakah mi a thâu, a thin a ṭha chemnâk chu a lâk ding asi.

¹⁰ Bâwlpu nih kawmhnâk thil ap lakah ran thâu an ap mi hâwi hen a thâu chu a lâk lai le, duahphung thil ap mâichâm tlûnah a duah lai.

¹¹ Sikhawmsele, a vun tla, a sâ tla, a lû, a kê, a sungril

¹² chu an riaknâk mun lênglei mun thenhlimh ah a lâk lai le, vachâm lawnhnâk mun ah thing châr pawng lakah a duah lai.

¹³ Israel mi lakah tum mi si lo hen LALPA thupêk a buar hen a sual chun,

¹⁴ chu sual chu a puang ka hen mi zapi nih chawchal tuai chu sual thil ap ah an put ding asi. LALPA umnâk Puanin tualmai ah an hawng put lai le,

¹⁵ zapi ruitu tla nih an kut a lû tlûnah an thâng lai le, chunah chun an thah lai.

¹⁶ Bâwlpu Lalchem nih chawchal thisen zeimaw zat chu lâk hen Puanin sungah a lûtpi lai.

¹⁷ A kutdawng a nîm lai le, puanzâr mâika ah vei sarih a theh lai.

¹⁸ Thisen chu Puanin sungah mi rimthâw duahnâk mâichâm kî chu a chulh lai le, bâwlnâk duahnâk mâichâm Puanin mâika ah mi bul ah a bungh lai.

¹⁹ A thâu zawzawng chu a lâk lai le, mâichâm tlûnah a duah lai.

²⁰ Sual thil ap rangah chawchal an mang mi hâwitê hen, hi khawm hi ti ding asi. Hi hâwi hen zapi sualnâk ruangah bâwlnâk siam ding asi, churawhchun ngaihdam an si lai.

²¹ Mah rangah sual bâwlnâk ah chawchal ap mi hâwi hen chawchal chu an riaknâk mun lenglei ah an duah ding asi. Chu chu zapi sual thiangnâk ding ah thil ap chu asi.

²² Lâirêltu nih tumnâk ruang silo hen LALPA thupêk a buar hen a sual chun,

²³ a tumnak chu sual hen ngaih asi chun kêl chal sâwinâk umlo mi bâwlnâk ding ah a hawng put ding asi.

²⁴ A lû tlûnah a kut a thâng lai le, ran duah mi bâwlnâk an thahnâk mun mâichâm sîr marlei kângah a thah ding asi. Chu chu sual thiangnâk ding hen thil ap asi.

²⁵ Chu ran thisen lakah chun bâwlpu nih a kutdawng a nîm lai le, mâichâm kî chu a va chulh lai, a dang vial chu mâichâm bul ah a thlêt lai.

²⁶ Kawmhnâk thil ap rangah thah mi ran thâu hâwi ber hen mâichâm tlûnah a thâu duah ding asi. Hi hâwi hen bâwlpu nih lâirêltu sual ruangah bâwlnâk a ap lai le, churawhchun ngaihdam asi lai.

²⁷ Zatlâng lakah minung pakhat nih tum ruangah si lo hen, LALPA thupêk pakhat a buar hen a sual chun,

²⁸ chu chu sual hen ngaih asi ka hen sâwinâk umlo mi kêl nunau a hawng put lai le,

²⁹ a lû ah a kut a thâng lai le, bâwlnâk duahnâk mâichâm marlei kâng sîrah ran duahnâk mun ah a thah ding asi.

³⁰ Bâwlpu nih chu ran thisen ah a kutdawng a nîm lai le, mâichâm kî a chulh lai le, a dang chu mâichâm bul ah a thlêt lai.

³¹ Kawmhnâk thil ap rangah ran an thah le, a thâu an lâk mi hâwi hen a lâk lai le, mâichâm tlûnah a duah lai, chu rim nih LALPA a lawmhtir ding hen. Hi hâwi hen bâwlpu nih bâwlnâk chu sualtupa rangah a ap lai le, ngaihdam asi lai rawh.

³² Mi nih sual bâwlnâk ah dawrâ a hawng put chun a mipa sâwinâk umlo mi asi ding asi.

³³ A lû tlûnah a kut a thâng lai le, mâichâm sîr marlei kângah duahphung thil ap rangah ran thahnâk mun ah an thah ding asi.

³⁴ Chu ran thisen ah bâwlpu nih a kutdawng a nîm lai le, mâichâm kî tla a chulh lai, a dang tla chu a mâichâm bul ah a thlêt lai.

³⁵ Churawhchun, kawmhnâk thil ap rangah dawrâ an thah le, a thâu an lâk mi hâwi hen a thâu chu lâk ding asi. LALPA sinah eiphung thil ap mi hen an duah ding asi. Hi hâwi hen a sualtupa rangah bâwlnâk chu an ap lai le, ngaihdam asi lai rawh.