LEVITICUS 3 - Bawm Common Language Bible Version

Kawmhnâk Thil Ap

¹ Âuzawng nih kawmhnak thil ap, a ranrual lakah mi pakhat a ap chun, chawchal mawh a nunau mawh simsâwinâk umlo mi asi ding asi.

² Ran lû tlûnah a kut a thâng lai le, LALPA umnâk Puanin mâika ah a thah lai. Aron thlâk bâwlpu tla nih a thisen chu mâichâm sâr pali ah an theh lai le,

³ LALPA sinah ran a khingkhuai chu eiphung thil ap ah an pêk ding asi, a sungril thâu tla,

⁴ akal tla leh a thâu, a thin a ṭha mi vial hen LALPA sinah ap ding asi.

⁵ Bâwlpu tla nih chubang zawng chu mâichâm ah duahphung thil ap hen an duah ver ding asi. Chu eiphung apnâk rim nih LALPA chu a lawmhtir.

⁶ Dawrâ mawh kêl mawh hi hawi bâwlnâk ah mang asi chun, a nunau mawh a mipa mawh khawm siseh sawi ding umlo mi asi ding asi.

⁷ Mi nih dawrâ mawh a ap chun,

⁸ a lû tlûnah a kut a thâng lai le, Puanin tualmâi ah a thah lai. Bâwlpu tla nih a thisen chu mâichâm kî lî sîrah an theh lai le,

⁹ LALPA sinah eiphung thil ap hâwi hen hi tla hi pêk seh; a thâu, a mei thâu zawzawng a kâwl ruh kiangah tan le, a sungril thâu,

¹⁰ akal leh a thâu, a thin a ṭha mi vial hen.

¹¹ Bâwlpu nih LALPA sinah mâichâm tlûnah eiphung thil ap ah a duah ver ding asi.

¹² Mi nih kêl a ap chun,

¹³ a lû tlûnah a kut a thâng lai le, Puanin mâika ah a thah lai. Bâwlpu tla nih a thisen chu mâichâm sîr li ah an theh lai.

¹⁴ A khingkhuai chu LALPA sinah eiphung thil ap ah a pêk lai; a sungril thâu zawzawng;

¹⁵ a kal leh a thâu, a thin a ṭha mi vial LALPA sinah ap ding asi.

¹⁶ Bâwlpu tla nih LALPA lawmhtir ding hen hi bang zawzawng hi mâichâm tlûnah eiphung ap mi ah an duah hep ding asi. A thâu zawzawng chu LALPA vo asi.

¹⁷ Israel fa âukhawm nih a thâu leh a thî an ei ding asi lo; hi dân hi an umnâk zawng ah Israel fa tla nih an zûl ding asi.