LEVITICUS 27 - Bawm Common Language Bible Version

LALPA Sinah Thilpêk Thu Ah Dân Tla

¹ LALPA nih Mosi sinah

² hi bâng dân tla hi Israel mi tla rangah a pêk. Mi nih LALPA sinah a thutiam rangtlingtir ding hen thilpêk a pêk chun, chu minung nih chun dân hâwi hen

^3-7 hi bang tangka tla hi pêk hen suah kho asi: mipa kum tling, kum kul thawk hen kum sâwmruk mi: tangka sâwmnga, -nunau kum tling mi chu: tangka sâwmthum, -tlangvâl kum nga thawk hen kum kul mi chu: tangka kul, -nungâk chu: tangka râ, -mipa kum nga tanglei mi: tangka ngâ, -nunau ngâksia chu: tangka thum, -mipa kum sâwmruk tlûnlei mi chu: tangka leinga, -nunau kum sâwmruk tlûnlei mi chu: tangka râ.

⁸ Mi nih a thutiam dân hâwi pêk ding hen a pâm tuk chun, bâwlpu sinah kalpi hen bâwlpu nih amah tikho tâwk ding hen niam dauh hen a ruat piak lai.

⁹ A thutiam chu ran asi chun LALPA sinah thil ap ah pawm piak asi lai. LALPA sinah thilpêk chu â thenhlimh asi.

¹⁰ Mi nih thu a tiamh rawh mi chu a ruangrûl ah ran dang hen a thleng kho lai lo. A thleng awt êu chun, a thlengnâk hen LALPA tâ asi vevê lai.

¹¹ Mi nih ran thianglo hen thu a tiamh chun, chu chu LALPA sinah thil ap rangah pawm asi lai lo, chu ran chu bâwlpu sinah kalpi ding asi.

¹² Bâwlpu nih a man zat ding a ruat lai le, a ran a siat a ṭhat zauh hen a man chu a ruat lai.

¹³ A pêktupa nih tlanh nawlh ding a duh asi chun, a man zâ lakah kul dân tam hen a sap ding asi.

¹⁴ Mi âunih mawh LALPA sinah a in a ap chun, bâwlpu nih a siat a ṭhat a zauh lai, a man zat a sim lai.

¹⁵ Chu a dâwngpu nih in chu tlanh nawlh ding a duh chun, a man zat nûnah zâ lakah kul dân hen a sap ding.

¹⁶ Mi nih a mun LALPA sinah a ap chun, a man chu a fachî lût zat hâwi hen ruat ding asi, fâng kilogramme kul lakah tangka râ dân asi lai.

¹⁷ Mi nih Rulh Nawlh Kum nûntê ah mun a ap chun, a man tling hep ding asi.

¹⁸ A nehnûn ah ap mi asi chun, bâwlpu nih a kum tam dân hâwi vima hen a kum vei Rulh Nawlhnâk Kum tiang a man dân a siam lai le, a man zat a suah lai.

¹⁹ A aptu nih phâisen chu tlanh nawlh ding a duh chun, a man zâ lû ah kul dân hen a pêk ding asi.

²⁰ Tlanh lo hen LALPA sinah mi midang sinah a zuar chun tlanh khonâk a nei lo rawh, a tâng ding asi.

²¹ A kum vei Rulh Nawlh Kum ah phâisen chu LALPA tâ asi pawt lai le, bâwlpu tla vo asi lai.

²² Mi nih phâisen a châwk mi LALPA rangah a ap chun,

²³ bâwlpu nih a kum vei Rulh Nawlh Kum tiang a man a kum tam zat hâwi hen a ruat lai le, chu minung nih chun chu ni ah chun a man a pêk ding asi, tangka chu LALPA tâ asi lai.

²⁴ Rulh Nawlh Kum ah chu phâisen chu a dâwngpu tak sinah mawh a thlâk tla sinah mawh a pêk nawlh ding asi.

²⁵ A man zawzawng chu a dân hâwi hen ruat ding asi.

²⁶ Ran a fa ring tîr mi chu LALPA vo asi, churuangah âukhawm nih mah duh thu thil ap rangah an pêk kho lai lo. Chawlâ, dawrâ fa, kêl fa chu LALPA tâ asi,

²⁷ sikhawmsele, ran thenhlimhlo a ring tîr mi chu dân hâwi hen zâ lû ah a man kul sap hen tlanh nawlh kho asi lai. A tlanh nawlh lo mi asi chun, âu sinah mawh dân hâwi hen zuar ding asi.

²⁸ A san umlo hen LALPA sinah aptu nih chun âukhawm nih an zuar hen an tlanh nawlh kho ding asi lo, minung mawh, ran mawh siseh LALPA tâ si pawt ding asi.

²⁹ Minung asi lo chun a san lo hen thil ap mi rêng chu tlanh hen thah ding asi.

³⁰ Ram sungah a hawng suak mi parâ lû ah pakhat chu fâng khawm, theirah khawm LALPA tâ asi.

³¹ Mi nih a tlanh duh asi chun a man dân za lû ah kul sap hen a pêk ding asi.

³² Ran vulh mi kip parâ lû ah pakhat chu LALPA tâ asi. Ran nan rêl hen parâ lû kip ah pakhat chu LALPA tâ asi.

³³ A dâwngpu nih ran lakah a sia â ṭha ai thîm ding asi lo, a ruangrûl khawm a siam ding asi lo. A ruangrûl ding hen pakhat a ruat chun ran chu LALPA tâ asi vevê lai, a tlanh nawlh kho ding asi lo.

³⁴ Hi bang hi LALPA nih Israel tla rangah Mosi sinah Sinai Tlâng âh a pêk mi thupêk chu asi.