LEVITICUS 26 - Bawm Common Language Bible Version

Ê-aw-ngâi Ruangah Malsâwmnâk

¹ LALPA nih, “Milem tla siam mi ruklem, lung phun tla, lung rîn tla sawnh ding hen siam lah. Kei, LALPA nan Pathian kasi.

² Phung kût tla nei ule, nan hawng ka sawnhnâk mun tla chu zah u. Kei, LALPA kasi.

³ “Ka dân thu hâwi hen nan um hen ka thupêk nan zûl chun,

⁴ a tik takah ruah ka sûrtir lai le, ram nih chun neihnâk a hawng suah lai le, thing khawm nih rah a suah lai.

⁵ Mîm-le-fâng cherkhet nan nei lai le, fâng nan ât liauah grep rah kawih a zâ lai, grep rah nan kawih liauah fâng tuh cham a hawng si fâwn lai. Nan duh mi zawzawng nan ei lai le, nan ram ah him tak hen nan um lai.

⁶ “Nan ram ah thlangamnâk kan pêk na lai le, ningṭihnâk nei lo hen nuam tak hen nan it lai. Ram sa ṭihnungkâi tla nan ram ah mi ka kiangtir ver lai le, râltuk khawm a um lai lo rawh.

⁷ Nan mêlma lakah nehtu nan si lai;

⁸ minung panga nih minung zâ nan neh kho lai, minung za nih mi sâng râ nan neh kho lai.

⁹ Mal kan sâwm na lai le, fa tam tak ka nan pêk na lai; dân kan pêk na mi ziatê hen thil ka ti lai.

¹⁰ Nan fâng thungâi a tling lai le, a ât kum khat nanna tâwk lai, falun siahnâk a tlum lai lo, fa thar nih a siahnâk ding a luah hep lai.

¹¹ Ka puanin thenhlimh ah nan sinah ka um lai le, zeiliau khawm ah dunglei kan sît na lai lo.

¹² Nan sinah ka um lai le; nan Pathian kasi lai le, nannih chu ka mi le nan si lai.

¹³ Kei, LALPA nan Pathian nih Aigupta mi kan suakpi na le, churuang chun sal ah nan um lai lo rawh. Nanmah an niamtir natu thiltikhonâk chu ka râwk rawh, thawsuak hen kan kaltir na rawh,” a ti.

Ê-aw Ngâilo Ruangah Rêpnâk

¹⁴ LALPA nih, “Ka thupêk nan ngâilo chun, rêp nan si lai.

¹⁵ Ka dân leh ka thupêk tla nan zûl duh lo hen ka thudântuk tla nan buar chun,

¹⁶ ka nan rêp na awt. Nan tlûnah vânduainâk râi dam kho lo leh zâwtnâk, nan mit châwtirtu ka hawng tlungtir lai le, nan nungnâk chu a vei lai. Thlâi nan chîng lai le, zeikhawm a ṭha lai lo, nan mêlma tla nih an neh na lai le, nan chîng mi tla khawm an ei piak hep na lai.

¹⁷ Ka nan hawitâk na lai le, neh hen nan um lai le, a nan hua natu nih nan tlûnah lâi an rêl lai; nan ṭih tuktarâi na lai le, âukhawm ṭhâwl lo hen nan tek lai.

¹⁸ “Chu hâwi tluk nûn khawm ah ka thu nan ngâilo nget rih chun, rêpnâk chu a leh sarih hen ka pungtir lai.

¹⁹ Zûm tak hen nan lung nan khungtir mi chu ka veih lai; ruah khawm ka sûrtir lai lo, nan ram chu a châr fêk lai le, thîr hâwi hen a chang lai.

²⁰ Hamh tak hen rian nan ṭuan mi chu zeikhawm asi lai lo, nan thlâi chîng khawm ti-râwl a suak lai lo, nan thingthei khawm a rah lai lo.

²¹ “Nan ka do nget hen ka thu nan ngâilo chun, kan rêp na nâk chu leh sarih hen ka pungtir lai.

²² Ram sa ṭihnungkâi nan sinah ka hawng fial lai, nan fa tla leh nan ran tla a seh lai le, nan lampi tla khawm a king thlo lai.

²³ “Hi tluk rêpnâk nûn khawm ah ka thu nan ngâi duh lo nget lai rih, chu khawm ah nan hawng ka siarlo nget lai.

²⁴ Churawhchun, ka nan hawitâk na lai le, a lân ah mi ngâk fâk dauh hen vei sarih ka nan rêp na lai.

²⁵ Nanmah rêpnâk ding hen tuknâk ka tlungtir lai, ka thudântuk nan buar ruangah; khuapi ah him ding duh hen nan tek lai le, chunah chun dam kho lo mi râi ka hawng tlungtir lai, nan mêlma tla lakah zângran hen pêk nan si lai.

²⁶ Nan buh tawngnâk lampi ka sah lai, nunau parâ nih sang zawzawng hût ding hen bêl pakhat cho a herh lai. Chu lakah mi chu an hawng ṭhen lai le, nan ei thluh ver nûn khawm ah nan sungvangh chu a mahmun nget lai.

²⁷ “Chubang zawzawng nûn khawm ah nan ka siarlo hen ka thu nan êl nget mi asi chun,

²⁸ ka thinthawk hen nan lakah ka lung asi lai lo le, kan rêp na nâk chu a ṭhalo chem mi vei sarih ka hawng tlungtir lai.

²⁹ Nan sungvangh chu a fâk tuktarâi lai le, nan fa tla sa tiang nan ei lai.

³⁰ Tlângah nan ruk sawnhnâk mun tla chu ka râwk lai le, nan rimthâw duahnâk mâichâm tla ka siat lai le, nan ruak chu milem a tlû mi tlûnah lawnh asi lai.

³¹ Fih hen nan khuapi tla chu ka râwk lai le, nan pathian sawnhnâk tla khawm râwk hen, nan bâwlnâk ka nawng awt.

³² Nan ram chu ka râwk dep lai le, nan mêlma a luahtu tla khawm an thinlung a lâu rê lai.

³³ Nan tlûnah râltuknâk ka hawng tlungtir lai le, ramdang leiah nanna thektham ver lai. Nan ram tla a karo hen a um lai le, nan khuapi tla râwk hen a um lai.

^34-35 Nan ram nan siang lo mi ram chu a âwl thlo lai rawh. Kaltâk hen a um lai le, nan mêlma ram ah nan um kar zawng chu a âwl ko lai rawh.

³⁶ “Sal ah put hen an um mi tla chu an lâu tuktarâi ah thing nah thlî nih a sêm mi hâu lak khawm ah an tek lai. Râltuk liauah ṭhâwl mi hâwi hen an tek lai le, mêlma nan kiangah umlo pet hen nan tlû phah rê lai.

³⁷ Âukhawm ṭhâwltu umlo hen nanmah leh nanmah nanna pah lai le, mêlma do kho khawm nan si lai lo.

³⁸ Nan mêlma tla ram ah sal ah nan tâng lai le, chu ram ah chun nan vei lai.

³⁹ Nanmah leh nan thlâktu tla sual ruangah nan mêlma tla ram ah nan vei dadauh lai.

⁴⁰ “Sikhawmsele, nan thlâk tla hawng ka do leh heltu

⁴¹ ka lung an sitir lo ruangah an mêlma tla ram ah sal ka tângtir na mi nih an sual tla leh an pu sual tla an lêt lai. A dawnghnâk ah chun nan thlâk tla chu an helnâk leh an sual ruangah rêp an si lai le, anna nautir lai rawh.

⁴² Jakob, Isak leh Abraham sinah ka thudântuk leh ka mi tla sinah ram pêk ding hen ka tiamh mi chu ka tharh nawlh lai kati mi chu ka theihkumza lai.

⁴³ A masa chem hen ram chu mi zapi nih an kaltâk rih ding asi, chu kar chun ram chu a âwl ziar lai le, ka thupêk leh ka dân thu an duh lo ruangah rêp an si lai.

⁴⁴ Sikhawmsele, an mêlma tla ram ah an um liau khawm ah ka kaltâk na hen ka veih dep na lai lo. Chu nih chun an sinah thu dân ka tuk mi chu a dawngtir lai le, Kei, LALPA an Pathian kasi.

⁴⁵ Kei, LALPA an Pathian kasi khonâk ding hen an thlâktu tla sinah phundang tla lakah ka thiltikhonâk langh hen Aigupta ram thawk hen ka suakpi na mi leh ka thudântuk chu ka tharh nawlh lai,” a ti.

⁴⁶ Hi bang dân leh thupêk tla zawzawng hi LALPA nih Israel mi tla rangah Sinai Tlângah Mosi sinah a pêk mi chu asi.