LEVITICUS 25 - Bawm Common Language Bible Version

Kum Sarihnâk

¹ LALPA nih Mosi sinah Israel fa tla rangah dân pêk na ding hen

² Sinai Tlângah thu a pêk. LALPA nih ram an pêk na mi nan va lût tikah LALPA nan zah tih theihnâk ding hen, a kum sarihnâk kip ah lo nan tuah ding asi lo.

³ Kum ruk kar chu nan phâisen tla nan tuah lai le, grep zûn tla nan no tir lai le, nan pumh lai.

⁴ Sikhawmsele, a kum sarihnâk chu ram rangah dinhnâk kum asi rawh, LALPA sinah ap mi kum asi. Nan phâisen nan tuah ding asi lo, nan grep zûn nan no tir ding asi lo.

⁵ Nan tuh lo mi fâng amah lung hen a kho mi khawm nan ât ding asi lo, grep nanmah siam lo mi rah khawm nan kawih ding asi lo, ram rangah dinhnâk kum asi.

⁶ Chu kum kar zawng chu rianṭuan lo hen um khawm ule, nan sal tla lawh nan lâk mi tla nan sinah ramdang minung um mi tla rangah pêk ver asi awt.

⁷ Nan vulh mi ran leh ram sa nih nan phâisen ah mi zeizawng an duh duh an ei kho asi.

Rulh Nawlhnâk Kum

⁸ Kum sarih mun sarih fawnh le, kum sâwmli leh kum kua asi.

⁹ Churawhchun, a thla sarihnâk a ni râ ni ah tlanhnâk ni asi, ram pumpi ah minung pakhat tâwtawrâwt tum ding hen fial.

¹⁰ Hi hâwi hen a kum sâwmnganâk chu ram sungah minung tla sinah a bîk hen thawsuaknâk phuang ding asi. Chu kum sungah zuar mi thil zawzawng chu a dâwngpu mawh a thlâk tla mawh khirh nawlh ver ding asi. Sal zuar mi tla khawm a dâwngsung sinah kîrtir nawlh ver ding asi.

¹¹ Na phâisen ah fâng na chîng ding asi lo, amah lung hen a kho mi khawm na ât ding asi lo. Na no tir lo mi grep zûn lakah mi a rah khawm na kawih ding asi lo.

¹² Chu kum khat kar chu na rangah a thenhlimh asi; phâisen ah a suak mi cho na ei ding asi.

¹³ Chu kum ah thil zawzawng zuar mi chu a dâwngpu sinah khirh ver ding asi.

¹⁴ Churuangah na unau Israel tla sinah mun na zuar hen mawh amah sin thawk hen na châwk khawm ah dawh lo tak hen ti lah.

¹⁵ A man chu a kum rêl hen Rulh Nawlh Kum lânah a mun lakah a suak zia hen nan ruat ding asi.

¹⁶ A kum a tam chun a man khawm a tam lai, a kum a tâwm chun a man khawm a tâwm lai, a mun nih a suah kho zat hen zuar asi ruangah.

¹⁷ Na hâwi Israel mi tla rangah perpet lah. LALPA na Pathian ṭih rawh.

A Kum Sarihnâk Ah Thil Har Ding Mi

¹⁸ LALPA dân leh thupêk zûl u, chu ram ah him tak hen nan um khonâk ding hen.

¹⁹ Ram nih neihnâk a hawng suah lai le, nan duh mi zawzawng ei kho hen him tak hen nan um kho lai.

²⁰ Sikhawmsele, mi zeimaw mi nih phâisen ah fâng khawm kan tuh lo, fâng khawm kan ât lo chun zei me a kum sarihnâk kum sungah kan ei lai me khawm nan ti kho.

²¹ LALPA nih a kum ruknâk ah chun kum nih ei tâwk hen hawng suah ding hen mal a sâwm lai.

²² A kum riatnâk ah phâisen ah nan buh tuh mi chu nan ât tiang hen kum ruknâk ah mi fâng kha fângzûn phanh dak hen nan ei lai.

Thil-leh-rî Rulhnawlhnâk

²³ Na mun chu ting pawt ding hen na zuar ding asi lo, nangmah tâ tak asi lo ruangah; Pathian tâ asi, nang chu ramdang mi mang sungtir mi hâwi na si.

²⁴ Mun zuar asi chun a dâwngpu tak thu theihfiang hen tlanh ding asi.

²⁵ Israel mi lakah mi a pâm hen mun zuar ngelchel ding a suak chun a rualsia amah naih chemtu nih a tlanh piak ding asi.

²⁶ Tlanh piaktu ding unau a nei lo mi asi chun amah ngelchel khawm nih mâilei ah a in-lo tuah â rêl chun a tlanh kho bâk asi.

²⁷ Chu thu lakah chun a châwktupa sinah chu kum kar zawzawng a kum vei Rulh Nawlh Kum tiang rang ding man chu a pêk ding asi, chu chu a ram a tawng tikah asi lai.

²⁸ Sikhawmsele, tlanh nawlhnâk ding tangka a nei tâwk lo chun a kumvei Rulh Nawlhnâk Kum tiang hen a châwktupa kut ah a um ding asi. Chu kum ah a dâwngpu a tîr mi sinah pêk nawlh asi lai.

²⁹ Kulhnei khua ah mi nih in a zuar chun a zuar ni thawk hen kum khat kar lakah a tlanh nawlh kho lai.

³⁰ Sikhawmsele kum khat sungah a tlanh kho lo mi asi chun tlanh khonâk a nei lo rawh, chu in chu a châwktupa tâ leh a thlâk le tâ asi pawt lai rawh. Rulh Nawlhâk Kum tik khawm ah pêk nawlh ding asi lo rawh.

³¹ Khua kulhnei lo khua lakah mi in tla lam chu phâisen hâwi hen a dân â bang ding asi; a tîr mi dâwngpu nih Rulh Nawlhnâk Kum ah a tlanh lai le, an pêk nawlh lai.

³² Levi murui tla lam chu zeiliau zawng ah khuapi sungah mi an thil tlanh nawlh khonâk pêk asi.

³³ Levi mi nih khuapi ah mi in a zuar hen a tlanh nawlh lo chun Rulh Nawlh Kum ah khirh ding asi, Israel mi lakah Levi murui tla chu an luah mi in chu ting pawt mi asi ruangah.

³⁴ Levi khuapi tla umnâk kiangah mun ṭha dauh chu zuar ding asi lo; zeiliau zawng an tâ kumza asi.

Mipâm Rangah Pûk Pêk

³⁵ Nanmah Israel chi amah â châwmlâwm kho lo chun, nan kiangah a um kho bâk ding hen lawh nan siah na mi hâwi hen pêk na bâk u.

³⁶ A fa lâk lah u, Pathian ṭih rawh; nan kiangkam ah nan hâwi Israel tla chu umtir na u.

³⁷ Tangka na lângtir mi lakah a fa lâk lah le, fâng na zuar mi khawm a lei lâk lah.

³⁸ Hi hi LALPA nan Pathian thupêk asi. Nan Pathian siding hen Aigupta ram ah mi an suah natu leh Kanaan ram an pêk natu asi.

Sal Suahnâk

³⁹ Nanmah Israel mi nan kiangkam ah um mi, a pâm tuk ah nan sal ah â rawnh chun, sal hâwi hen rian nan ṭuantir ding asi lo.

⁴⁰ Lawh nan siah mi hâwi hen Rulh Nawlhnâk Kum vei tiang hen na rian a ṭuan ding asi.

⁴¹ Chu tikah amah leh a fa tla hen an suak lai le, a dâwngsung leh a thlâktu tla thil-le-rî umnâk ah an kal lai.

⁴² Israel mi tla chu LALPA sal an si, Aigupta ram thawk hen a suakpi na mi an si; sal ah anna zuar ding asi lo.

⁴³ Ṭha lo tak hen nan ti na ding asi lo, Pathian ṭih u.

⁴⁴ Sal nan duh asi âwk leh nan kiangkam phun lakah mi châwk u.

⁴⁵ Ramdang minung nan sinah um mi tla lakah mi nan châwk kho lai, chu an fa tla nan ram ah suak mi chu nan tâ asi kho.

⁴⁶ Chubang tla chu nan fa le tla rangah nan rauh na hen an dam sung zawng ah nan fa le rangah rian an ṭuan piak na ding asi. Sikhawmsele, nan hâwi Israel lakah mi khuaruat lo hen na ti ding asi lo.

⁴⁷ Hawlhnâk ah, ramdang minung nan sinah um mi a nei hen nan hâwi Israel mi a pâm hen, ramdang mi tla sinah sal ah â zuar hen a dâwngsungkhur ah a um kho.

⁴⁸ Â zuar nûnah tlanh nawlh khonâk a nei nget rih.

⁴⁹ A unau lakah pakhat mawh a patê mawh a rualsia amah taksa tlâi nih an tlanh nawlh kho; asi lo leh a lawh kho chun amah leh amah khawm â tlanh kho.

⁵⁰ Amah châwktupa hen an ruat lai le, a lût kum thawk hen Rulh Nawlhnâk Kum tiang rêl hen lawh an siah mi rangah a man an pêk mi dân hâwi hen a suak ding asi.

^51-52 A châwknâk a man chu a kum zat hisâp hen a rulh ding asi,

⁵³ kum khat kar lawh lâk dân hâwi hen. A lâk tupa nih khuaruat lo tak hen a ti ding asi lo;

⁵⁴ Hi hâwi hen suak kho asi lo khawm ah, Rulh Nawlh Kum ah chun a fa hen an suak ngelchel ding asi.

⁵⁵ Israel mi rerêng sal si kumza kho asi lo, Israel tla chu LALPA sal an si ruangah. Aigupta ram thawk hen suakpitu chu LALPA an Pathian asi.