LEVITICUS 21 - Bawm Common Language Bible Version

Bâwlpu Tla Thenhlimhnâk

¹ LALPA nih Mosi chu Aron thlâk bâwlpu tla sinah thu sim ding hen thu a pêk. “Bâwlpu âukhawm nih dân hâwi hen a unau tla thi mi vûinâk lakah tel hen â nâwmtir ding asi lo;

² a nu mawh, a pa, fapa, fanu, a unaupa

³ mawh a in sung khur ah pasal nei lo mi a far tla an si lo chun.

⁴ Umhnâk leikângah unau si mi thihnâk lak khawm ah amah â nâwmtir ding asi lo.

⁵ “Bâwlpu âukhawm mithi zûn phurh hen a lû mawh a khamul mawh a mêt hen a taksa a rawi ding asi lo.

⁶ Â thenhlimhtir ding asi, ka min a mualphoh ding asi lo. Ka sinah eiphung thil ap hen â thenhlimhtir ding asi.

⁷ Bâwlpu nih nunau â zuar mi mawh, a thenhlimh lo mi mawh mi mâk chia mawh a umpi ding asi lo; amah chu mi thiang asi ruangah.

⁸ Mi nih bâwlpu chu mi thenhlimh ah a ruat ding asi, ka sinah eiphung thil ap aptu asi ruangah. Kei, LALPA kasi; ka thenhlimh le, ka minung tla khawm ka thenhlimh tir na.

⁹ Bâwlpu fanu â zuar chun a pa a mualphoh mi asi, thi thlo duah ding asi.

¹⁰ “Bâwlpu Lalchem chu a lû ah sariak thuh hen bâwlpu thuam hen thuamh ding hen ruat asi le, mithi ruangah a lungfâk zauhtirnâk ding hen a puan a thlêk ding asi lo, sam riat lo hen a siah ding asi lo.

^11-12 Ka sinah pêk asi rawh le, amah chu â nâwmtir ding asi lo; ka puanin thenhlimh nâwmtir ding hen mithi umnâk in ah a lût ding asi lo, amah nu leh amah pa tak sikhawmsele.

¹³ Nungâk thenhlimh a umpi ding asi,

¹⁴ numei mawh, mi mâk mi nunau mawh, â zuar mi nunau mawh a umpi ding asi lo. Amah chi lakah mi nungâk thenhlimh cho a umpi ding asi.

¹⁵ Chu hâwi lo chun a fa le tla chu thenhlimh ding mi an si ruangah dân ah thianglo an si sual lai. Kei, LALPA nih a dang ê hen thlei hen Bâwlpu Lalchem ah ka ruat mi asi,” a ti.

¹⁶ LALPA nih Mosi chu

¹⁷ Aron sinah thusim ding hen thu a pêk le, “Na thlâk tla âukhawm taksa leiah sâwinâk um mi nih ka sinah eiphung thil ap an hawng pêk ding asi lo. Hi hi zeiliau zawng rang ding asi.

¹⁸ Âukhawm taksa ah sâwinâk um mi nih thil ap an hawng pêk ding asi lo; mitchâw, ke khêng, kut kê tling lo, mi suaksual;

¹⁹ kut le kê khêng mi;

²⁰ a kêngkûn mi, hâwi bangh lo mi, mit leh vun râi nei mi; mi tilkhei tla.

²¹ Aron bâwlpu thlâk taksa ah sâwinâk um mi khawm nih ka sinah eiphung thil ap an hawng ka pêk kho lai lo.

²² Chubang hâwi minung tla nih chun ka sinah eiphung thil ap mi tla eiphung thil ap thenhlimh leh eiphung thil ap thenhlimh tak mi an ei kho lai.

²³ Sikhawmsele, an taksa leiah sâwinâk nei an si ruangah puanzâr thenhlimh kiang leh ka mâichâm kiangah an hawng kal ding asi lo. Hi thil thenhlimh tla hi a nâwmtir ding asi lo, Kei, LALPA nih ka thenhlimh tir na mi asi ruangah,” a ti.

²⁴ Churawhchun, hi hi Mosi nih Aron, a fapa leh Israel mi zapi sinah a sim rawh.