LEVITICUS 18 - Bawm Common Language Bible Version

Hur-Le-Khuang Khapnâk

¹ LALPA nih Mosi sinah, “Kei, LALPA nan Pathian chu kasi ti hen

² Israel mi tla simh na.

³ Aigupta ram nan umnâk ah mi tla ti dân chu châwng lah ule, tuah kan kalpi na awtnâk ram Kanaan ram mi minung umdân khawm châwng lah u.

⁴ Kei, LALPA nan Pathian kasi, thu ka nan pêk na mi ka dân nan zûl ding asi.

⁵ Dân ka nan pêk na mi zûl hen ti ule, chu hâwi nan ti chun nan nungnâk nan hum mi asi lai. Kei, LALPA kasi,” a ti.

⁶ Hi bang dân tla hi LALPA nih a pêk na. Nan unau tla âu lak khawm ah pung le lêngnâk nei lah u.

⁷ Na nu ihpi hen na pa rangah mualphoh lah. Mah nu tak rangah khawm mualphoh lah.

⁸ Na pa nupi tla âu hen khawm ihpi hen na pa rangah mualphoh lah.

⁹ Na in sungkhur ah mi na farnu mawh na nu-ei fanu mawh na ihpi ding asi lo.

¹⁰ Na tunu ihpi lah, na rangah ningzaknâk asi lai.

¹¹ Na nu-ei fanu khawm na ihpi ding asi lo, anih khawm na farnu asi.

^12-13 Na nutê na pa farnu mawh na nu unaunu mawh na ihpi ding asi lo.

¹⁴ Na patê nupi na ihpi ding asi lo, anih khawm na nutê asi bâk.

¹⁵ Na monu na ihpi ding asi lo,

¹⁶ na unaupa nupi khawm.

¹⁷ Na ihpi mi nunau nih a ring mi fanu mawh tunu mawh na ihpi ding asi lo; nangmah lei tlâi asi bâk ruangah mi rua lo na sâng lai.

¹⁸ Na nupi dam ko hen na nupi unaunu na umpi ding asi lo.

¹⁹ Nunau a nunau râitâ a nei liauah na ihpi ding asi lo, a thianglo ruangah.

²⁰ Midang nupi ihpi lah; chu nih chun dân hâwi hen a nan nâwmtir lai.

²¹ Na fa tla Molek pathian sawnhnâk ah mang ding hen pêk lah, LALPA Pathian min mualphohnâk asi ruangah.

²² Mipa leh mipa âukhawm anna pung ding asi lo, chu chu Pathian nih a hua asi.

²³ Nunau mawh mipa mawh ran hen anna pung ding asi lo; chu hurnâk nih dân hâwi hen a nan nâwmtir asi.

²⁴ Hi bang hâwi thilti hen a nâwmtir lah u, lunglo mi tla nih chubang hen anna nâwmtir tâwn. Chu ram ah nan va lût khonâk ding hen lunglotu tla chu ram ah nanmah lânah um masa mi tla chu LALPA nih a nar na asi.

²⁵ An thilti nih ram chu an nawmh le, chu ram ah minung tla chu LALPA nih a rêp na hen a nawng na.

^26-27 Hi bang thil fihnungkâi an ti le, ram chu an nawmh. Sikhawmsele, nannih tla nih chun ti bâk lah u. Nan ektê hen Israel mi leh ramdang minung nan sinah um mi tla khawm nih LALPA dân leh a thupêk nan zûl ding asi.

²⁸ A lânah lunglotu tla nanmah lânah an um mi hâwi hen nawng nan si lonâk ding hen.

²⁹ Âuzawng hi bang thil nâwmtâm titu tla chu Pathian minung ah ngaih nan si awtlo ti nan theih.

³⁰ LALPA nih, “Ka thupêk tla hi ngâi ule, nanmah lânah um mi minung umdân châwng lah ule, chubang hâwi thil ti hen khawm a nawmtir lah u. Kei, LALPA nan Pathian kasi,” a ti.