LEVITICUS 17 - Bawm Common Language Bible Version

Thî Thenhlimh

¹ LALPA nih Mosi chu

² Aron leh a fapa tla leh Israel mi tla rangah dân tla pêk na ding hen thu a pêk.

^3-4 Israel lakah mi nih chaw mawh dawrâ mawh LALPA umnâk Puanin tualmâi ah silo hen mun dangah LALPA rangah thil ap pêktu nih chun dân a buar asi. Thî a suah ruangah Pathian mi ah ngaih asi lai lo.

⁵ Hi thupêk umzia chu Israel mi tla nih LALPA sinah ran an pêk mi chu mun dangah khawm thah hen an mang tinâk asi. Tu chun Puanin ah bâwlpu sinah an hawngpi hen kawmhnâk thil ap rangah thah ding asi.

⁶ Bâwlpu nih a thî chu LALPA Puanin mâika ah mi mâichâm sîr tla a theh lai le, a thâu a duah lai, a rim nih LALPA a lawmhtir ding hen.

⁷ Israel mi tla nih phâi ah kêl khuri sinah bâwlnâk rang ding ah an ran tla thah hen LALPA lakah zumhkâilo hen a um ding asi lo rawh. Hi nûnthâi mâilei zawng khawm ah hi dân hi Israel fa tla nih an mang kumza ding asi.

⁸ Israel minung an sinah um mi khawm nih LALPA Puanin mâika silo hen

⁹ a zei mun zawng ah LALPA sinah duahphung thil ap mawh bâwlnâk dang rerêng a pêk chun Pathian mi ah ngaih asi lai lo.

¹⁰ Israel mi mawh ramdang minung an sinah um mi âutal nih ran sâ a thî hen a ei chun LALPA a lungsi lai lo le, a mi ah ngaih asi lai lo.

¹¹ Thilnung zawzawng nungnâk chu thî lakah a um. Churuangah asi, LALPA nih zapi tla sual thiangnâk ding thî zawzawng chu mâichâm tlûnah tawih ding a ti mi chu. Thî chu nungnâk asi, sual thiangnâk khawm asi.

¹² Churuangah asi, LALPA nih, Israel fa tla rangah nan lakah ramdang minung um mi khawm nih a sâ leh a thî hen nan ei ding asi lo a tinâk chu.

¹³ Israel mi tla mawh ramdang minung nan sinah um mi nih ran a kah mi mawh vâ a kah mi mawh sa thiang asi mi chu, a thî tual ah a thlêt lai le, valei hen a vurh ding asi.

¹⁴ Thil nung zawzawng nungnâk chu thî lakah a um. Churuangah asi, Israel mi tla chu a thî tel hen sâ nan ei ding asi lo, a eitu zawng chu amah minung ah ngaih asi awtlo a tinâk chu.

¹⁵ Mi âuzawng, Israel mi mawh ramdang mi mawh nih ran sâ thi rerêng mi mawh, ram sa seh mi mawh eitu chu a nipuan a suk hen tak â khawlh lai le, a thenhlimh cham a tling lânlo chu zânlei tiang a ngâk ding asi.

¹⁶ Chu hâwi a tilo chun mawh a phurh lai.