LEVITICUS 12 - Bawm Common Language Bible Version

Nunau Fa A Ring Nûnah  Thenhlimhtir Ding Dân

¹ Hi bang tla hi LALPA nih Mosi sinah

² Israel tla rangah dân a pêk mi chu asi. Nunau nih fapa a ringnâk thawk hen ni sarih kar chu, a nunau râitâ neih liau hâwitê hen thenhlimh loh hen ngaih asi.

³ A fa chu ni riat ni ah a fêm a tan ding asi.

⁴ Chun, ni sâwmthum dang dân hâwi hen thiangtir asi lânlo chu, a thî suak mi ruangah zei thil khawm a thenhlimh mi a tawngh ding asi lo. Puanin thenhlimh khawm ah a lût ding asi lo.

⁵ Nunau nih nunau fa a ring chun thlasiar nunau râitâ a nei mi hâwi hen ni leili kar chu thenhlimhlo hen ngaih asi. Churawhchun, a thî suak mi ruangah ni sâwmruk leh ni ruk a thiang lânlo chu thenhlimh loh hen ngaih asi.

⁶ A thenhlimh ni a tling rawh chun mipa fa khawm nunau fa khawm LALPA umnâk Puanin tualmâi ah bâwlpu sinah a kalpi lai le, dawrâ kum khat mi duahphung thil ap rangah, lâilêng mawh vaṭhu mawh pakhat sual thil ap rangah a put ding asi.

⁷ Bâwlpu nih a thil ap chu LALPA sinah a nawmhnâk chu thiangtir ding hen a pêk lai le, dân hâwi hen a thenhlimh lai rawh. Hi hâwi hen nunau nih fa a ring nûnah ti dân ding chu asi.

⁸ Nunau nih dawrâ put ding a tlinh kho lo chun, vaṭhu panih mawh lâilêng panih mawh duahphung thil ap rangah pakhat leh sual thil ap rang ding ah pakhat a put ding asi; bâwlpu nih dân hâwi hen a nâwm mi chu a thenhlimh ding hen a timhtuah lai le, dân hâwi hen a thiang lai rawh.