LEVITICUS 11 - Bawm Common Language Bible Version

Ran Ei Kho Ding Mi Zât

¹ LALPA nih Mosi leh Aron chu,

² Israel mi tla rangah hi bang dân tla hi a pêk na. Ran lakah

³ a tin kak mi leh a râwl dawlh hen a khai nawlh mi vial chu nan ei kho lai.

^4-6 Sikhawmsele, sangâwngsâu, sâirem, leh zungnampî tla nan ei ding asi lo. Thianglo hen ngaih ding an si, an râwl dawlh chu an khâi nawlh le, khawmsele an tin a kak lo ruangah.

⁷ Vawksa ei lah u; thianglo hen ngaih ding an si, an tin chu a kak le, an râwl dawlh an khâi lo.

⁸ Nan ei ding asi lo, a ruak khawm nan tawngh ding asi lo, thianglo hen ngaih mi an si.

⁹ Ngâ a zeitin mi tal a mei phar leh a hir a um mi chu nan ei kho lai.

¹⁰ Sikhawmsele tî lakah ngâ rerêng a mei phar leh a hir a um lo mi chu nan ei ding asi lo.

¹¹ Chubang thilsiam tla chu thianglo a ngaih asi, nan ei ding asi lo, a thi mi khawm nan tawngh ding asi lo.

¹² Zeital tî lakah a um mi, a mei phar leh a hir umlo mi chu nan ei ding asi lo.

^13-19 Hi bang vâ tla hi nan ei ding asi lo, murâ, sûmbuh, kâitê, thlakâwi, sûmbuhsialkinei, ruaklâwmmu, langâk; vachâ, tivarak, ngaihkuangrâl, lili âr, varakmûrsâu, tipi vâ, vasuangtuar leh balâk tla an si.

²⁰ Ran nung thla nei zawzawng an thianglo,

²¹ a per zât mi lo chu.

²² Khâubawk, khuangbâi, khâuchangbawk tla nan ei kho lai.

²³ Sikhawmsele, thil dang a mê mi zât murui chu thil nâwm ah ngaih asi.

^24-28 Hi bang ran ruak tawnghtu tla chu zânlei tiang hen thianglo ah ngaih asi lai. Ran zawzawng a tin kak lo mi an râwl dawlh an khâi mi leh ran kê pâli nei khawm thianglo ah ngaih asi. Âuzawng an ruak nan put chun nan nipuan suk ngelchel ding, khawmsele zânlei tiang thianglo hen ngaih an si lai.

^29-30 Zubui, zungnam, châichîm, sanhtang tla chu thianglo hen ngaih an si.

³¹ Chubang tla ruak tawnghtu chu zânlei tiang thianglo hen ngaih an si lai.

³² An ruak tla nih zeital a tawngh chun thianglo hen ngaih asi. Chu umzia chu zei thil tal, thing, nipuan, savun, salâ, mang mi thil rerêng chu mang thianglo tinâk asi. Tî lakah zânlei tiang nîm ding asi, sikhawmsele zânlei tiang thianglo hen ngaih asi lai.

³³ An ruak tla chu tualbêl sungah a tlâ chun, bêl sungah mi chu a nâwm hep rawh, a bêl chu nan khuai ding asi.

³⁴ Thil ei kho zeital, chu bêl lakah mi tî tawih asi chun thianglo hen ngaih asi. Din mi thil zeital chu bêl lakah mi chu thianglo hen ngaih asi.

³⁵ Chu ruak tla nih a denh mi chu thianglo hen ngaih asi; tual lungthu mawh tappi chu râwk ding asi.

³⁶ Sikhawmsele tikhur mawh, tipang mawh chu thiang asi, an ruak nih a tawngh mi chu thianglo ah ngaih asi.

³⁷ Zei chî tal tuh ding mi ruak nih a denh chun, thiang hen ngaih asi.

³⁸ Sikhawmsele, thlâi chî chu tî lakah an chiah mi lakah a tlâ chun, thlâi chî chu thianglo ah ngaih asi.

³⁹ Ran ei kho mi zât a thi mi tawnghtu chu nî tlâk tiang thianglo ah ngaih asi.

⁴⁰ Mi nih a sa a ei asi chun a puan a suk lai le, zânlei tiang thianglo ah ngaih asi lai. A ruak puttu chu a nipuan a suk lai le, amah chu nî tlâk thianglo ah ngaih asi lai.

⁴¹ Ran nung tênâu, tual ah vâk mi tla nan ei ding asi lo,

⁴² a vâk hen an vâk mi mawh an kê pali hen an kal mi mawh, kê tam tak a nei mi khawm.

⁴³ Hi bang tla ei hen a nawmhtir lah.

⁴⁴ Kei, LALPA, nan Pathian kasi, Keimah ka thenhlimh ruangah nanna thenhlimh tir ding asi.

⁴⁵ Kei, Aigupta ram ah mi an suakpi natu kasi, churuangah nan Pathian kasi. Keimah ka thenhlimh ruangah nanna thenhlimh ding asi.

⁴⁶ Hi vial hi ran leh vâ leikâng thu ah, tî lakah a um mi leh tual tlûnah a châng kho mi zawng leikâng thu ah dân asi.

⁴⁷ Dân lakah a thenhlimh mi leh thenhlimhlo thiamthih tak hen nan thlei ding asi, ran ei kho mi leh ei kho lo mi zât lak khawm ah.