LÂIRÊL 6 - Bawm Common Language Bible Version

Gideon

¹ Israel mi tla chu LALPA lakah thilsual an ti fâwn le, churuangah Midian mi tla nih an tlûnah kum sarih sung lâi an rêl.

² Midian mi tla chu Israel mi tla ngâk hen an chak dauh le, Israel mi tla chu pûk leh tlângah mun himnâk ah anna thup.

³ Zei thlâichi tal, Israel tla nih vawrh na khawmsele, Midian tla chu Amalek mi leh ramkaro ah phun um mi tla hen an va kal le, an do na.

⁴ Chu ram ah chun mun an va khuar le, an thil chîng tla chu Gaza ram simlei kiangkam tiang hen an râwk piak na. Dawrâ, ranrual leh sanatung tla an lâk piak na le, Israel tla rangah nungnâk ding zeikhawm an mâk piak na lo.

⁵ An ranrual tla hen, an puanin tla hen, khâubawk rualpi hâwi hen an hawng. Anmah leh an sangâwngsâu tla khawm rêl châwk asi lo. An hawng le, an ram tla an râwk piak na,

⁶ Israel tla chu ṭangpitu âukhawm an um lo.

⁷ Churawhchun, Israel mi tla chu Midian lakah ṭangpitu ding hen LALPA an auh le,

⁸ churawhchun khuavâng hi thusimtu ding hen LALPA Israel Pathian thawk hen fial hen a um:

⁹ “Aigupta minung tla leh hi ram ah minung tla nanmah an do natu lakah thawk hen ruang kan suah na rawh. Nan kalnâk zawzawngah ka nar vima na le, an ram chu ka nan pêk na.

¹⁰ Kei chu LALPA nan Pathian kasi, tuah nan umnâk ram ah mi Amor pathian tla chu nan sawnh ding asi lo kan ti na. Sikhawmsele ka thu nan ngâilo,” a ti.

¹¹ LALPA vânmifial chu Ophrah khua ah a hawng kal le, Abiezer chi Joash tâ oak thing tangah a to. A fapa Gideon chu a thuptê hen grep sûrnâk ah fâng a khâwng, Midian tla nih an muh lo ding hen.

¹² LALPA vânmifial chu chunah a sinah a va a langh le, “Nang, mi râlṭha leh mi chak, LALPA na sinah a um,” a ti.

¹³ Gideon nih a sinah, “Pu, kan deih râu lai, LALPA kan sinah a um mi chu, zei zia hi bang thil zawzawng hi kan lakah a hawng tlung ne? Thilchê thu zawzawng LALPA nih Aigupta ram thawk hen a suah na mi thu kan pa le tla nih hawng kan simh si lo ma? LALPA nih hawng kan kaltâk le, Midian tla tlûnah khua ruat hen kannih chu hawng kan mâk rawh,” a ti.

¹⁴ Churawhchun, LALPA nih thu a pêk le, “Na chaknâk zawzawng hen va kal le, Midian tla kut ah mi Israel tla chu ruang va suah na, keimah tak nih ka nan fial asi,” a ti.

¹⁵ Gideon nih a sâng le, “Asi chun zei hâwi hen Israel tla chu ruang ka suah kho na lai? Kei chi chu Manaseh phun chaklo chem mi leh kei khawm ka dâwngsungkhur lak khawm ah a tumh lo chem mi kasi,” a ti.

¹⁶ LALPA nih a sâng le, “Ka nan ṭangpi awt ruangah na ti kho lai. Minung pakhattek, awldek na ti mi hâwi hen Midian tla chu na neh na lai,” a ti.

¹⁷ Gideon nih, “Na thinlung ka tawng mi asi chun, LALPA na sinâk tak theihnâk hawng ka pêk.

¹⁸ Ei ding na sinah ka hawng put lânlo chu zângfahtê hen kal lah,” a ti. “Na hawng kîr lânlo chu ka um ko lai,” a ti.

¹⁹ Gideon chu a in leiah a va kal le, kêl la sâ a va suang le, sang rangah sangvut telh lo mi kilogramme râ a siam. Sâ chu pâi ah a siah le, a hâng chu bêl ah a siah le, oak thing tangah mi LALPA vânmifial sinah a kalpi le, a sinah a pêk.

²⁰ Vânmifial nih thu a pêk rawh, “Kha sâ leh sang kha hi lung tlûnah siah le, a hâng kha, kha lakah tawih,” a ti. Gideon nih chu hâwi hen a ti.

²¹ Churawhchun, LALPA vânmifial nih a tleih mi ṭhianṭhunh chu a lirh le, sâ leh sang chu a tawngh rawh. Lung thawk hen mei a hawng suak le, sâ leh sang chu a kâng hep. Churawhchun, vânmifial chu a tlâu ving.

²² Gideon nih chun LALPA vânmifial tak asi ti a theih le, ṭih tak bû hen, “LALPA zahkâi, Na vânmifial chu mâitawnh hen ka muh rawh,” a ti.

²³ Sikhawmsele LALPA nih a sinah, “Lungngam tak hen um le, ṭih lah, na thi lai lo,” a ti.

²⁴ Gideon nih chunah chun LALPA mâichâm a siam le, a min ah “Jehovah-Shalom’’ (LALPA chu lungngamhtu asi) a ti. (Abiezer phun murui umnâk Ophrah ah a um kumza rih.)

²⁵ Chu zân ah chun LALPA nih Gideon rangah a simh le, “Na pa chawchal leh chawchal dang kum sarih mi lâk le, na pa nih Baal a sawnh mi mâichâm siat le, a kiangah mi pathiannu Aserah lem khawm hâu ving.

²⁶ Hi lungpawng tlûnah LALPA na Pathian mâichâm ṭha tak hen siam. Churawhchun, chawchal a panihnâk lâk le, a pum hen thil ap rangah duah hep, Aserah lem na hâu mi thing kha tih ding ah mang rawh,” a ti.

²⁷ Gideon nih a to-aw tla parâ a put na le, LALPA nih a simh mi hâwi hen a ti rawh. Sûn ni tangah ti ding hen chun a dâwngsung leh khua mi tla a ṭih na le, churuang chun zân ah a ti rawh.

²⁸ A thâituan zîngtê ah khua mi tla an hawng thawk rawh chun Baal mâichâm leh Aserah lem hâu mi leh chawchal panihnâk mâichâm tlûnah duah mi an muh.

²⁹ “Âunih hi hi a ti?” ti hen anna deih. An hawng a deihfiang le, Joash fapa Gideon nih a ti mi asi ti an theih.

³⁰ Churawhchun, Joash sinah, “Na fapa kha hinah hawng suah, kan thah ding hen! Baal mâichâm a siat le, a kiangah mi Aserah lem khawm a hâu ving,” an ti.

³¹ Sikhawmsele Joash nih a mâika dîr mi tla sinah, “Baal ruangah ma nan dîr? Amah nan vêng mi ma? Âuzawng amah ruangah dîrtu chu khua dei lânah thah an si lai. Baal hi pathian tak asi chun amah leh amah a hum seh. Râwk mi mâichâm khawm chu amah tâ asi dangâiah,” a ti.

³² Chu thawk hen chun Gideon chu Jerubaal an ti, “Baal chu amah leh amah a hum seh; mâichâm a râwk mi khawm chu a tâ asi,” a ti ruangah.

³³ Churawhchun, Midian mi zawzawng, Amalek mi zawzawng leh ramkaro ah phun um tla chu anna pûm le, Jordan Va an kanh le, Jezreel Kuam ah um mun an khuar.

³⁴ LALPA thlarau nih Gideon chu a mang le, amah zûltu ding hen Abiezer phun tla chu tâwtawrâwt tum hen a kawh na.

³⁵ Amah zûltu ding hen Manaseh ram ah mi tla zawzawng kawh na ding hen mi a fial. Aser, Zebulun leh Naphtali phun tla sin khawm ah mi a fial le, annih khawm amah bawp ding hen an hawng rawh.

³⁶ Churawhchun, Gideon nih Pathian sinah, “Israel mi tla sanhtu ding ah hawng ka mang ding hen thu na tiamh.

³⁷ A ṭha asi, fâng khâwngnâk mun ah samul tual ah ka siah. Thâizîng ah tual a kiangkam mi chîn lo thlo hen dâmtî nih samul cho a chinh mi asi chun Israel ruangsuahtu ding ah na ka mang tak awt ti ka theih lai,” a ti.

³⁸ Chu hâwitê hen a hawng um. A thâituan zîngtê ah Gideon chu a thawk le, samul chu a sûr le, a zut mi khêng a khat phak.

³⁹ Churawhchun, Gideon nih Pathian sinah, “Ka tlûnah na thinrun lah le, veikhat tal hen thu hawng ka simtir rih. Zângfahtê hen veikhat kan nik nawlh lai rih. Tutan lam chu hul sele, a kiangkam tual chu chîn seh,” a ti.

⁴⁰ Chu zân ah chun Pathian nih chu hâwitê hen a ti rawh. A thâizîng ah chun samul chu a hul le, sikhawmsele a kiangkam tual chu dâmtî nih a chinh.