LÂIRÊL 5 - Bawm Common Language Bible Version

Deborah Leh Barak La

¹ Chu ni ah chun Deborah leh Barak, Abinoam fapa nih hi la hi an sak:

² LALPA chu sawr u! Israel mi tla nih do ding anna tum; mi zapi tla chu lâwm tak hen mah duh thu hen anna pêk.

³ Nannih Lalchem tla ngâi u! Nannih lâirêltu tla, nan nâ thlir u! Tumphung tum hen LALPA, Israel Pathian sinah la ka sak lai.

⁴ LALPA, Seir tlâng na hawng kaltâk hen Edom ram thawk hen na hawng suak liauah tual â nîn le, vân thawk hen ruah a sûr rawh. Asi, vândâwm thawk hen tî a hawng tlê.

⁵ Sinai tlâng LALPA mâika ah, LALPA, Israel Pathian mâika ah tlâng chu â nîn rawh.

⁶ Shamgar, Anath fapa dam liau leh Jael dam liauah chun khualtlâwngtu murui khawm an um lo, mi velvâ tla khawm lam vâu ah an kal.

⁷ Deborah, Israel khua tla chu kaltâk hen a um rawh; na hawng lânlo chu a karo hen a um, Israel rangah nu hâwi hen hawng rawh.

⁸ Israel tla nih pathian thar an thîm liauah ram lakah râltuknâk a um. Israel minung sîng li lakah pakhat tal nih phaw mawh fei mawh anna put ma?

⁹ Ka thinlung chu Israel thupêktu tla, mah duh thu hen lâwm tak hen  pêk mi tla sinah a um. LALPA chu sawr u!

¹⁰ Nannih, sanatung tlûnah chuan hen tonâk tla tlûnah totu tla, leh mun kip ah kal ding mi tla sim u.

¹¹ Tikhurchawh kiangah mi zapi tla nih LALPA nehnâk thu, Israel mi tla nehnâk thu, an sim mi hâu chu ngâinik u! Churawhchun, LALPA mi tla chu anmah khuapi thawk hen an kal rawh.

¹² Rui vima, Deborah, rui vima! Rui vima! La sak! rui vima! Barak Abinoam fapa, mâilei ah kal le, Na sal tleih tla chu rui na.

¹³ Mi zumhkâi tla chu anmah ruitu tla sinah an hawng; LALPA mi tla chu a sinah an hawng le; râltuk ding hen anna tîm.

¹⁴ Benjamin phun leh a mi tla dunglei ah, Efraim thawk hen tivakuam leiah an hawng, Makir ram thawk hen thupêktu tla an hawng le, Zebulun thawk hen khawm hotu tla an hawng.

¹⁵ Isakar phun ruitu tla chu Deborah hen an hawng le, asi, Isakar leh Barak khawm an hawng, Tivakuam leiah amah chu an zûl rawh. Sikhawmsele Reuben phun tla chu anna ṭhêk ver; hawng ding mi an thlûk kho lo.

¹⁶ Zei rangah dawrâ tla hen dunglei ah an um? Dawrâpu nih dawrâ rual a kawh mi ngâi ding hen ma? Reuben phun tla chu anna ṭhêk ver; hawng ding mi an thlûk kho lo.

¹⁷ Gad phun tla chu Jordan saklei ah an um le, Dan phun chu timeilawng tla ah an um Aser phun tla chu tipi kap ah an um le; tivakap vima ah an um.

¹⁸ Sikhawmsele, Zebulun leh Naphtali phun tla lam chu râltuknâk mun ah thih an ngamh.

¹⁹ Taanak ah Megido tiva leikâng hen Lalchem tla chu an hawng le an do; Kanaan lalchem tla nih an do le, sikhawmsele tangka tla an lâk lo.

²⁰ Vân thawk hen ârfi tla nih an do le; chung vân ah kal hen Sisera chu an do.

²¹ Kison va tî lianh nih a fenh ving na, chaknâk hen ka kal lai le, ka kal vima lai .

²² Rang tla chu a rup rup hen an hawng, an tin tla hen tual an lamh.

²³ “Meroz chu siat barh,” LALPA Vânmifial nih a ti, “Barh ko, chunah um mi tla chu siatbarh ko. LALPA ṭangpi ding hen, amah rangah do piak ding hen kawrsen hâwi hen khawm an hawng kal lo,” a ti.

²⁴ Nunau vânṭha chem chu Jael, Kenit mi Heber nupi, puanin sungah um mi nunau asi.

²⁵ Sisera nih tî a deih le, sikhawmsele, nûk hâng a pêk; nûk khal chu khêng dawh tak hen a pêk.

²⁶ A kut khatlei hen puanin rêngnâk tung a put, khatlei kut hen rianṭuannâk tukboh a put; Sisera chu a lû ruh ah a khenh le; a lû tleng dak hen a khenh.

²⁷ A khûp a tum rep le, a tlû ro, a kê kiangah a rîl thlo, A kê phûr ah a khûp a tum le, a tlû thlo. Tual ah a tlû le, a thi rawh.

²⁸ Sisera nu nih langawt kawtkâ thawk hen a chuanh ko, châichêng vâm thawk hen a bih ko. “A kari chu a hawng tlung tlâi chiam e?” a ti. “Zei rangah a rang tla khawm ti ti hen an fûm?” a ti.

²⁹ A nunau fing chem tla nih an sâng le, amah leh amah â chaih.

³⁰ “Lâk ding thil an hâwl hen anna ṭhen mi ba a, Kawrsen kip nih nungâk pakhat mawh panih chiau ding hen mawh, Sisera rangah nipuan tam tak mawh, Lalnu awih ding mi thuamnâk mawh an hâwl mi mawh asi ah” an ti.

³¹ LALPA, na mêlma tla chu chu hâwi hen thi hep na seh, Sikhawmsele, na hâwi tla lam chu nî a hawng suak mi hâwi hen chêu na seh! Churawhchun, ram chu thlangam tak hen kum sâwmli ding a um.