LÂIRÊL 4 - Bawm Common Language Bible Version

Deborah Leh Barak

¹ Ehud thih nûnah Israel mi tla nih LALPA lakah thilsual an ti nawlh.

² Kanaan lalchem Hazor khuapi ah lâirêltu Jabin chu anmah nehtu ah a siam. A kawrsen hotu chem chu Sisera Jentel tla khua Haroseth ah um mi asi.

³ Jabin nih thîr kari zakua a nei le, an tlûnah sual tak leh nehsawh tak hen kum kul kar lâi a rêl. Churawhchun, Israel tla nih LALPA rangah ṭangpi ngiar hen an auh.

⁴ Chu liau chun Lappidoth nupi Deborah chu khuavâng asi le, chu liauah chun Israel tla lakah lâirêltu asi.

⁵ Efraim tlâng ram Ramah leh Bethel karah tûm kûng tangah a to tâwn le, Israel tla chu thu thlûktir ding hen a sinah an va kal.

⁶ Nikhat chu Barak, Abinoam fapa Naphtali ram ah mi Kades khuapi mi chu a kawh le, a sinah, “LALPA, Israel Pathian nih hi thupêk hi a nan pêk asi: ‘Naphtali leh Zebulun phun ah mi minung singkhat put na le, Tabor Tlâng leiah kalpi na.

⁷ Jabin kawrsen hotu Sisera chu Kison va ah a nan do ding hen ka hawngpi awt. Kari tla leh kawrsen tla a nei lai le, sikhawmsele amah nehtu ah ka nan ruat awt,’ ” a ti.

⁸ Churawhchun, Barak nih, “Ka sinah na hawng chun ka kal lai, sikhawmsele ka sinah na hawng lo asi chun zei lei khawm ka kal awtlo,” a ti.

⁹ Deborah nih, “Asi ma chu, na sinah ka hawng bâk lai, sikhawmsele nehnâk ruangah thang ṭhat lam chu na lawh lai loh. LALPA nih Sisera chu nunau sinah a pêk awt ruangah,” a ti. Churawhchun, Deborah chu Barak sinah Kades leiah â thawh rawh.

¹⁰ Barak nih Zebulun leh Naphtali phun tla chu Kades ah a kawh na le, mi singkhat nih an zûl. Deborah khawm a sinah a kal bâk.

¹¹ Kenit mi, Heber chu Mosi nupi ṭapa Hobab thlâk lakah mi asi le, Kenit mi tla thawk hen a thlei le, Kedesh naih tekah, Zananim ah mi Oak thing kiangah a puan in a zâr.

¹² Sisera nih Barak chu Tabor Tlâng leiah a kâi ti a theih rawh chun,

¹³ a thîr kari zakua leh a minung zawzawng a kawh na le, Jentel khua Haroseth thawk hen Kison va leiah a fial na.

¹⁴ Churawhchun, Deborah nih Barak sinah, “Kal rawh, LALPA nih a nan rui! Tusûn ni ah Sisera chu na sinah pêk asi rawh,” a ti. Churawhchun, Barak chu Tabor tlângah mi chu a minung singkhat hen a va ṭum rawh.

¹⁵ Barak nih a kawrsen tla hen a va do le, LALPA nih Sisera chu a kari tla leh a mi tla hen a nawktir chiam na. Sisera chu kari thawk hen a ṭum le, kê hen a tek rawh.

¹⁶ Barak nih kawrsen tla leh a kari tla chu Jentel khua Haroseth leiah a ṭhâwl na le, Sisera kawrsen zawzawng chu a thah hep na. Minung pakhat khawm an zuah loh.

¹⁷ Sisera chu Jael puanin leiah Kenit mi Heber nupi sinah a tek le, Hazor ah mi Jabin lalchem chu Heber dâwngsung hen anna rem thlo ruangah.

¹⁸ Jael chu Sisera dawng ding hen a va kal le, a sinah, “Pu, hawng lût, ka puanin sungah hawng lût, ṭih rîlmâl lah,” a ti. Churawhchun, a va lût le, puan zâr pîn leiah a thuptir.

¹⁹ Anih nih nunau sinah, “Zângfahtê hen tî hawng ka pêk; ka tîhâl tuktarâi,” a ti. Savun dûr a mi nûk hâng chu din ding hen a pêk le, a thuptir nawlh.

²⁰ Churawhchun, nunau sinah, “Puanin kawtkâ ah khan dîr le, mi âumawh an hawng hen khanah mi an um ma a nan ti chun, umlo ti,” a ti.

²¹ Sisera chu a dî tuktarâi le, a it thlit rawh. Churawhchun, Jael nih tukboh leh puanin rêngnâk tung a lâk le, a sinah dîn dîk a va kal le, puanin rêngnâk tung chu a na chabeng ah tleng dak hen tual ah lût bir hen a khenh le, a thah thlo.

²² Barak chu Sisera hâwl hen a hawng le, Jael chu a va suak le a sinah, “Hinah hawng! na hâwl mi minungpa ka nan zauhtir lai,” a ti. Churawhchun, a sinah a va lût le, Sisera chu thi chia hen puanin rêngnâk tung a lû ah khenh hen a va muh rawh.

²³ Chu ni ah chun Pathian nih Israel tla chu Kanaan lalchem Jabin nehtu sinâk a pêk na rawh.

²⁴ Amah an veih lânlo chu an nâwr dadauh.