LÂIRÊL 1 - Bawm Common Language Bible Version

Juda Leh Simeon Phun Tla Nih Adonibezek An Lâk Mi

¹ Josua thih nûnah Israel mi tla nih LALPA sinah “Kan lakah a zei mi phun tla nih me Kanaan mi tla rangah kal masa chem hen do ding asi awt?” ti hen an deih.

² LALPA nih a sâng na le, “Juda phun kal masa chem seh. Anmah tla rangah ram chu ka pêk na,” a ti.

³ Juda phun tla nih Simeon phun tla sinah, “Kanmah ting mi ram ah kan sinah hawng bâk u, Kanaan mi tla chu a rual hen kan do lai. Chu tikah nanmah tingvo ram ah nan sinah kan hawng bâk lai,” an ti.

⁴ Churawhchun, Juda leh Simeon phun tla chu râl do ding hen munkhat hen an kal rawh. LALPA nih Kanaan mi leh Periz mi tla chu a nehtir na le, Bezek ah minung singkhat an neh na.

⁵ Chunah chun Adonibezek an va muh le, an do.

⁶ Adonibezek chu a tek ving le, an va ṭhâwl le, an tleih, a kutpi leh a kepi an tan piak.

⁷ Adonibezek nih, “Lalchem sâwmsarih kutpî leh kepî tan piak hen um mi tla nih ka dawhkân tangah eiphung neknâwi a tlâ mi an sar. Kei khawm an tlûnah ka ti na mi hâwitê hen ka lakah Pathian nih a ti bâk rawh mahi,” a ti. Jerusalem leiah an kalpi le, chunah chun a thi rawh.

Juda Phun Nih Jerusalem Leh Hebron An Neh Mi

⁸ Juda mi tla nih Jerusalem an do le, an lâk. Chunah mi minung tla an thah na le, khuapi chu an duah.

⁹ Chu nûnah Kanaan mi tlâng ram ah um mi tla chu do ding hen an kal vima, tlâng bul ah mi leh simlei kâng ram châr ah mi khawm an do vima.

¹⁰ Kanaan minung Hebron khuapi ah um mi tla do ding hen an va kal, chu chu Kiriath Arba an ti. Sesai, Ahiman leh Talmai chi tla chu an neh na.

Othniel Nih Debir Khuapi A Neh Mi

¹¹ Chu thawk hen Juda tla chu Debir khua leiah an kal le, chu liau chun Kiriath Sepher an ti.

¹² An lakah minung pakhat Kaleb nih, “Âuzawng Kiriath Sepher lâk khotu chu ka fanu Aksah umpi ding hen ka pêk lai,” a ti.

¹³ Kaleb naupa Kenaz fapa Othniel nih khuapi chu a lâk rawh, churawhchun Kaleb nih a fanu Aksah chu umpi ding hen a pêk.

¹⁴ Anna umh ni ah chun Othniel nih Aksah chu a pa sinah phâisen deih ding hen a fawrh. A sanatung tlûnah mi chu a ṭum le, Kaleb nih a fanu chu zei na duh ati? ti hen a deih.

¹⁵ Anih nih, “Tikhurchawh ka duh. Na hawng kan pêk mi ram a châr ruangah,” a ti. Churawhchun, Kaleb nih a tlûnah mi leh a tang mi tinung a pêk.

Juda leh Bejamin Phun Tla Nehtu An Sinâk

¹⁶ Mosi pupa thlâk Kenit mi tla chu tûm thing khuapi Jeriko thawk hen Juda mi tla sinah Juda ram ah Arad simlei mi ram fê leiah a kal bâk. Chunah mi Amalek mi tla sinah an va um bâk.

¹⁷ Juda mi tla chu Simeon mi tla hen munkhat hen an kal le, Kanaan mi Zephath khuapi ah um mi tla chu an va neh na. Khuapi chu siat an barh le, an veih dep, a min ah Hormah an ti.

^18-19 LALPA nih Juda mi tla a ṭangpi na le, tlâng ram chu anna ting rawh. Sikhawmsele, Gaza, Askelon, mawh Ekron leh an kiangkam mi ram tla lam chu an lâk lo. Hi minung tiva dung ah um mi tla nih chun thîr kari tla an nei le, churuangah Juda mi tla nih an nar na kho lo.

²⁰ Mosi nih thu a pêk rawh hâwi hen Hebron chu Anak thlâk, phun thum khuapi lakah mi nartu Kaleb rangah pêk asi rawh.

²¹ Sikhawmsele Benjamin phun tla nih Jebus mi tla Jerusalem ah um mi tla chu an nar na lo le, Benjamin mi leh Jebus mi tla chu, chu thawk hen an um vima.

Efraim Leh Manaseh Phun Tla Nih Bethel An Neh Mi

^22-23 Efraim leh Manaseh phun tla chu Bethel khuapi do ding hen an kal le, chu liau chun Luz an ti. LALPA nih a ṭangpi na. Khuapi ah thlingthlâktu an fial na le,

²⁴ chu tla nih chun minung pakhat an muh le, a sinah, “Khuapi lûtnâk hawng kan simh le, zeitin khawm kan ti lai loh,” an ti.

²⁵ Churawhchun, a simh na le, Efraim leh Manaseh mi tla nih chun khuapi sungah mikip, chu minung leh a dâwngsung cho lo chu an thah ver na.

²⁶ Chu nûnah chun Hit mi ram ah a va kal le, chunah khuapi a va siam le, a min ah Luz a sak, chu chu tutiang a min a put vima rih.

Israel Tla Nih An Nar Lo Mi Tla

²⁷ Manaseh phun tla nih Beth Shan, Taanak, Dor, Ibleam, Megido leh a kiangkam ah khua lian ah um mi tla, Kanaan mi tla chunah um mi tla chu an nar na lo.

²⁸ Israel tla chu an hawng chak dauh rawh chun Kanaan mi tla chu an rianṭuantu rangah zângran ko hen an siam na le, sikhawmsele an nar hep na lo nget rih.

²⁹ Efraim phun tla khawm nih Gezer khuapi ah um mi Kanaan mi tla chu an nar na lo, churuangah Kanaan mi tla chu an sinah an um vima.

³⁰ Zebulun phun tla nih Kitron leh Nahalal khuapi ah um mi tla chu an nar na lo, churuangah Kanaan mi tla chu an sinah an um vima le, rianṭuantu rangah an mang na.

³¹ Aser phun tla nih chun Ako, Sidon, Ahlab, Akzib, Helbah, Aphek leh Rehob khuapi ah um mi tla chu an nar na lo.

³² An nar na lo ruangah Aser mi tla chu chu khua mi Kanaan mi hen munkhat hen an um.

³³ Naphtali phun tla nih Beth Semes leh Bethanath khuapi ah um mi tla chu, an nar na lo. Naphtali mi tla chu chu khua Kanaan mi tla hen munkhat hen an um le, khawmsele an rianṭuantu rangah an mang na.

³⁴ Amor mi tla nih Dan phun tlâng ram ah um mi tla chu phâi leiah tlâ lo ding hen an khap rêt na.

³⁵ Amor mi tla chu Aijalon, Saalbim leh Heres Tlângah an um vima. Sikhawmsele, Efraim leh Manaseh phun tla nih anmah dân siam tangah an siah na le, an rangah rianṭuantu rangah an mang na.

³⁶ Sela marlei ah Edom mi tla ramri chu Akrabim Liamnâk leikângah a kal.