JOSUA 9 - Bawm Common Language Bible Version

Gibeon Mi tla Nih Josua Rangah An Perpetnâk

¹ Israel tla nih nehnâk anna ting mi chu Jordan thlanglei mi lalchem zawzawng tlângah mi, Mediteranian Tipi phâi ah mi zawzawng, Lebanon tlâng marlei tiang hen an theih ver. Hi bang Lalchem tla hi Hit mi lalchem tla, Amor mi lalchem tla, Kanaan mi lalchem tla, Periz mi lalchem tla, Hiv mi lalchem tla leh Jebus mi lalchem tla an si.

² Chubang tla chu thu a rual hen Israel leh Josua do an tum.

³ Sikhawmsele, Gibeon mi tla chu Hiv mi an si le, Josua nih Ai leh Jeriko ah an thilti an theih le,

⁴ amah chu perpet ding an tum. An sanatung tla fâng vûitun leh uain dûr tla neh leh neh lo hen an phurhtir le, an kal rawh.

⁵ puan ṭet fup mi aih leh pheikawk an belh tup mi ruk hen, an ei ding mi sang tla châr fûk hen a mawr khur.

⁶ Gilgal an riakmun ah Josua leh Israel mi tla sinah, “Ram lât tak thawk hen hawng mi kan si, nanmah tla hen remnâk siam kan duh,” an ti.

⁷ Sikhawmsele, Israel mi tla nih, “Zei rangah nanmah tla hen remnâk kan siam zia lai? Kan kiangkam mi khawm nan si kho,” an ti.

⁸ Josua sinah, “Nangmah thu tangah mi kan si,” an ti. Josua nih an sinah, “Âu me nan si le? Zei thawk hen hawng mi me nan si?” a ti na.

⁹ Churawhchun, hi thu hi an simh, “Ram lât tak thawk hen hawng mi kan si Pu, LALPA na Pathian thâwngthâng kan theih ruangah hawng mi kan si. Aigupta ram ah a thilti tla kan theih le,

¹⁰ Amor lalchem panih Jordan saklei mi Hesbon lalchem Sihon leh Basan lalchem Og Astarot ah um mi lakah a thilti tla khawm kan theih.

¹¹ Kan hotu leh kan mi tla kan ram ah um mi tla nih ei leh bâr hawng kan timhtuah piak le, nanmah hen a tawng ding hen hawng kan fial. Nanmah tangah um hen nanmah hen remnâk siam ding hen an duh.

¹² Kan sang tla hi zauhnik, nanmah tla hen tawng ding hen kan hawng liauah mi tla asi. A lum it mi, sikhawmsele zauhnik, tuah a châr hen a buar ver rawh.

¹³ Hi uain khawm kan râwn liauah chun a thar siak. Sikhawmsele, zauhnik, a dûr khawm a pem ver rawh. Kan pheikawk leh nipuan tla khawm kan tlâwngnâk a sâwt ruangah a li ver rawh,” an ti.

¹⁴ Israel mi tla nih chun an zumh na le, an sang an lâk le, LALPA khawm simh tâ ding herh hen an ruat lo.

¹⁵ Josua nih Gibeon mi tla hen hâwikawmh siding hen remnâk a siam le, um ding a siang piak na. Israel ruitu murui tla nih thutiamnâk bir tak nei hen remnâk an siam.

¹⁶ Chu remnâk an siam nûnah ni thum thawk hen chun Israel tla nih an kiangkam mi an si ti an theih.

¹⁷ Churawhchun, Israel mi tla chu an suak le, a ni thumnâk ah an umnâk khuapi chu an va tlung. Gibeon, Kephirah, Beeroth leh Kiriath Jearim khua mi tla an si.

¹⁸ Sikhawmsele, Israel tla nih thah na ding an tawng lo, an ruitu tla nih LALPA, Israel Pathian min hen thutiam bir tak an siam rawh ruangah. Hi ruangah mi zawzawng chu ruitu tla tlûnah an chipchiar.

¹⁹ Sikhawmsele, annih nih an sâng le, “LALPA, Israel Pathian min hen anmah hen thutiamnâk bir tak kan nei rawh. Annih rangah nganfâk pêk kho kan si lo rawh.

²⁰ Kan thutiam ruangah kan zuah na ding si ko rawh, kan tilo ni ah Pathian nih hawng kan rêp lai.

²¹ Zuah na ko u, kan thing khawmh leh tî thantu si ko na seh,” an ti. Hi hi ruitu tla thuruat chu asi.

²² Josua nih Gibeon mi tla chu a sinah hawng put na ding hen a simh na le, thu a deih na,”Hinah um ko hen, ram lât tak mi kan si ti hen zeitin hawng kan perpet kho zia?

²³ Hi hâwi nan ti ruangah Pathian nih an mawhtir na asi. Nan minung tla chu sal an si kumza lai le, ka Pathian mun thenhlimh rangah thing an khawmh lai le, tî an than lai,” a ti na.

²⁴ Annih nih an sâng le, “Kan ti ko lai ma chu Pu, LALPA nan Pathian nih a to-aw Mosi sinah ram pumpi pêk hen an kalnâk kip ah minung tla chu ram ah um mi chu thah ding asi ti hen thu a pêk mi chu a dik asi ti kan theih ruangah asi. Kan ṭih na ruangah kan ti mi asi, thi ding kan ṭih ruangah.

²⁵ Tuah chun nan thu thu hen um kan si rawh le, dik hen nan ruat mi zawng chu kan tlûnah ti ko,” an ti.

²⁶ Churuangah asi hi hâwi hen Josua nih a ti mi hi: a hum thlir na le, Israel mi tla nih an thah na ding a siang na lo.

²⁷ Sikhawmsele, chu liau lîlâ ah sal ah a siam na le, Israel mi leh LALPA mâichâm rangah thing an khawmh le, tî an than rawh. Tusûn ni tiang hen LALPA nih amah sawnhnâk mun a ruatnâk ah chun an ṭuan vima.