JOSUA 8 - Bawm Common Language Bible Version

Ai Khua Râwknâk Leh An Lâk Mi

¹ LALPA nih Josua sinah, “Kawrsen zawzawng put na le, Ai khua leiah va kâi rawh; ṭih lah le, dâwk lah. Ai khua lalchem nehtu ah ka nan siam awt; a mi tla, khuapi leh ram chu nangmah tâ asi lai rawh.

² Jeriko khua leh a lalchem tlûnah na ti mi hâwitê hen Ai khua leh a lalchem tlûnah na ti ber lai. Sikhawmsele, tutan mi lam chu thil-le-rî leh a ranrual tla nangmah tâ asi lai. Khuapi do ding hen a tîm le, râl vêngtu tla siam na,” a ti.

³ Josua chu a kawrsen zawzawng hen Ai khua leiah kal ding hen â tîm rawh. A kawrsen a ṭha chem mi sâng sâwmthum a thîm le, zânah a fial na.

⁴ “Khuapi khatlei râl ah a thup ule, sikhawmsele khuapi hen lât tuktarâi lo hen, chunah chun do ding tîm zet hen um u.

⁵ Kei leh ka mi tla chu khuapi leiah kan va kal lai. Ai khua mi tla nih hawng kan do ding hen an hawng suak rawh chun, kanna let sawm lai le, a lânah kan tek mi hâwi khan.

⁶ Khuapi lei kiang mi chu kal ving ding hen hawng kan ṭhâwl lai le, a lânah mi hâwi khan tek ver hen hawng kan ruat lai.

⁷ Chu tikah nannih nanna thupnâk ah mi nan hawng suak lai le, khuapi chu nan lâk lai rawh. LALPA nan Pathian nih a nan pêk na lai rawh.

⁸ Khuapi nan lâk rawh chun, LALPA thupêk hâwi hen, duah hep u. Chu chu nan rangah thupêk chu asi,” a ti.

⁹ Josua nih a fial na le, anna thupnâk lei an va kal le, chunah chun an ngâk na ko, chu ram chu Ai thlanglei ah Bethel leh Ai kar asi. Josua chu, chu zân ah chun riaknâk mun ah a riak rih.

¹⁰ A thâi zîngtê ah Josua chu a thawk le, kawrsen tla a pumh na, amah leh Israel ruitu tla nih Ai leiah an kalpi na.

¹¹ Kawrsen a sinah um mi tla chu khuapi zâwllâi lian chemnâk leikângah an va kal le, marlei kângah riakmun an khuar, Ai leh an karah chun tivakuam a um.

¹² Mi sângnga ding chu khuapi thlanglei kângah Ai leh Bethel karah a thuh na.

¹³ Khuapi marlei kângah riaknâk mun lian chemnâk ah mi khawm tîm chia zet hen an um. A dang vial chu thlanglei kângah an um. Josua chu zân ah tivakuam ah a riak.

¹⁴ Ai lalchem nih Josua minung chu a muh na le, mawhsareh hen â tîm rawh. A lânah mi hâwitê hen amah leh a minung zawzawng tla hen Jordan Vakuam ah Israel tla do ding hen an suak rawh, bawhtu tla nih hawng kan do awt ti rêng an theih lo.

¹⁵ Josua leh a minung tla nih neh mi hâwi hen anna tektir telê le, mâng leiah an tek ving.

¹⁶ Khuapi mi minung zawzawng chu munkhat ah a pûm ver ding hen a kawh na le, a ṭhâwltir na, Josua murui tla chu khuapi thawk hen lât ual an ṭhâwl.

¹⁷ Ai khua mi tla nih Israel tla an ṭhâwl na le, khuapi chu a vêngtu umlo hen awng hung hen an siah ko.

¹⁸ Churawhchun, LALPA nih Josua sinah, “Na fei kha Ai leiah awt; ka nan pêk rawh asi,” a ti. A simh mi hâwi hen Josua nih a ti.

¹⁹ A kut chu a lirh kâ hen anna thup mi tla chu an hawng thawk sawm le, khuapi sungah chun an tek le, an lâk rawh. Mawhsareh hen khuapi chu an duah sawm.

²⁰ Ai khua mi tla nih an dunglei an hawng zauh le, meikhû vân leiah a dîr mi an muh rawh. Annih rangah suaknâk lampi rerêng an nei lo rawh, Israel tla mâng leiah tek mi tla chu anmah do ding hen an hawng a her nawlh.

²¹ Josua leh a mi tla nih an lâk rawh mi leh mei tla chu an muh le, churawhchun an hawng a her le, Ai khua chu thah anna dawmh rawh.

²² Israel khuapi ah um mi tla khawm nih tuknâk chu an hawng bawmh bâk na rawh. Ai khua mi tla khawm nih Israel mi tla nih an kulh dak na le, an thah mi tla an muh na rawh. Âukhawm an suak lo, an lalchem pakhat

²³ Ai lalchem cho lo chu pakhat khawm an dam lo. Ai lalchem chu an tleih le, Josua sinah an kalpi.

²⁴ Israel tla nih anmah ṭhâwltu tla chu mâng ah an thah hep na. An kîr le, Ai khua khawm ah chun an va thah hep na.

^25-26 Josua nih minung tla an thah hep na lânlo chu Ai khua leiah a fei chu a zâwn kumza. Chu ni ah Ai khua an thah mi zawng chu sâng leinih an thah na, nunau leh mipa hen.

²⁷ LALPA nih a simh hâwi hen Israel tla nih chun khuapi mi thil-le-rî tla leh ranrual tla chu anmah rang ding ah anna lâk rawh.

²⁸ Josua nih Ai khua chu a duah hep le, râwk dep hen a mâk. Tutiang hen chu hawi hen a um kumza.

²⁹ Ai khua lalchem chu thing pâr ah a thlâi le, zânlei tiang a ruak chu an siah thlap. Josua nih nî tlâk nûnah a ruak chu lâk hen khuapi lûtnâk kawtkâ ram ah lawnh thlap ding hen thu a pêk na. A tlûnah lung cherkhet an pawng le, tusûn ni tiang hen a um ko.

Ebal Tlang Ah Dân Rêlnâk

³⁰ Josua nih Ebal tlângah LALPA, Israel Pathian rangah mâichâm a siam.

³¹ A siam mi chu LALPA to-aw Mosi dân Israel fa tla sinah a pêk mi hâwi hen, chu sîntirnâk Mosi dân lakah chun, “Mâichâm rang ding lung tla chu thîr riamnâm hen khuai lo mi lung mang ding asi,” a ti. Chu tlûnah chun duahphung bâwlnâk leh kawmhnâk thil ap LALPA sinah an ap.

³² Chu lakah chun Israel fa tla nih Josua nih lung a siam mi chu Mosi dân rîn mi a châwng ti theihnâk ding hen.

³³ Israel mi tla, an ruitu leh an hotu tla, an lâirêltu leh ramdang minung an sinah an um mi tla hen Levi bâwlpu tla Thudântuk Bâwm zawnhtu lei hawi hen, LALPA Thudântuk Bâwm khatlei sîr ah an dîr. Mi khingkhuai chu Gerazim tlâng dunglei an sît le, a dang mikhing nih Ebal tlâng dunglei an sît. LALPA to-aw Mosi nih malsâwmnâk an tawng kip ah hi hâwi ti ding hen thu a pêk na.

³⁴ Josua nih hâu fâk tak hen Dân zawzawng a rêl le, dân bu ah rîn mi hâwi hen malsâwmnâk leh siatbarhnâk khawm a rêl hep.

³⁵ Nunau ngâksia, ramdang minung an sinah um mi tla zawzawng pumhnâk ah Mosi thupêk zawzawng chu Josua nih a rêl hep.