JOSUA 7 - Bawm Common Language Bible Version

Akan Sualnâk

¹ Israel tla sinah LALPA thupêk, Jeriko khua sungah mi thil zeikhawm râwk ding mi thil rerêng lâk lo ding ti hen LALPA thupêk chu an zûl lo. Mi pakhat Akan an ti mi nih thupêk chu a zûl lo. Churuangah LALPA thinthawknâk chu Israel tlûnah a hawng tlung. (Akan chu Karmi fapa, Jabdi tupa, Juda phun lakah mi Zerah thlâk asi.)

² Josua nih mi zeimaw zat ding chu Jeriko khua thawk hen Ai khua ah a fial na le, Ai khua chu Bethel saklei ah Bethaven kiangah mi asi. Chu lei ram ah chun thlingthlâk ding hen a fial na mi asi.

³ An kal rawh chun Josua sinah an hawng kîr le, an hawng sim, “Ai khua chu âukhawm nih a rûn a herh lo, minung sâng nih mawh sâng thum cho fial ko. Kawrsen zawzawng fial lah na ko, khua lian chiam asi lo,” an ti.

⁴ Churawhchun, Israel mi sâng thum nih do ding hen anna timhtuah, sikhawmsele anmah lam neh hen an um ving.

⁵ Ai khua mi tla nih khuapi kawtkâ thawk hen lung khur an chawhnâk tiang hen tlâng leikângah lampi tluan hen minung sâwmthum leh paruk an thah na. Churawhchun, Israel tla chu an thin a dâwk hen an ningṭih rawh.

⁶ Josua leh Israel ruitu tla nih an ngaihsia tukah an puan tla an thlêk le, Thudântuk Bâwm kiangah chun tual ah an ngaihsia ti theihnâk ding hen an lû ah valei kawp buk hen zânlei tiang an rîl ko.

⁷ Churawhchun, Josua nih, “LALPA, Pathian, zei rangah hi Jordan Va hi na hawng kan kanhtir êu? Amor mi kut lakah pêk ding hen ma? Hawng kan veih hep ding hen ma? Zei rangah khatlei râl ah khin kan um ko lo?

⁸ LALPA, zei thu ka sim kho lai rawh? Israel chu an mêlma nih an neh na rawh asi lo ma?

⁹ Kanaan mi leh ram lakah mi tla nih hi thu hi an theih lai le, hawng kan kulh lai le, hawng kan thah hep ding ko rawh. Chu hâwi asi chun zah na kâinâk hi zeitin na hum kho zia lai ne?” a ti.

¹⁰ LALPA nih Josua sinah, “Thawk! zei rangah kha hâwi hen na rîl ko?

¹¹ Israel tla nih thilsual an ti! Zûl ding thu ka pêk na mi an buar rawh. Veih ding mi thil zeimawh tla an lâk. An fîr le, anmah thil nâwngah an siah.

¹² Churuangah asi Israel tla nih an mêlma an neh lonâk san chu. Neh hen an um mi chu tuah anmah nih thil râwk ding mi lakah an mawh ruangah asi! Lâk lo ding ka ti mi thil kha nan veih lânlo chu nan sinah ka um ding asi lo.

¹³ Thawk! A thenhlimh ule, ka mâika ah hawng ding a tîm u. Thâituan rangah a tîm zet ule, Kei, Israel LALPA leh Pathian nih hi thu hi ka sim awt ruangah: ‘Israel, na neih lakah veih ding mi, ka ti mi thil zeimawh na siah asi! Chubang thil lakah na thliar lânlo chu na mêlma na neh kho lai lo!’

¹⁴ Churuangah thâizîng ah hawng a langh ver ding hen simh na, a phun phun hen. Keimah nih ka ruat na mi phun vial an hawng vima ding asi, a chi chi hen. Keimah nih ka thur na mi chi chu a dâwngsungkhur vima hen an hawng ding asi. Keimah nih ka thur na mi dâwngsung chu a mâilei ah pakhat vima hen an hawng ding asi.

¹⁵ Ka thur na mi zawng thil-le-rî ah mawh hen a lang mi chu mei ah duah an si lai, a dâwngsung leh a thil neih hen Israel lakah thil ṭihnungkâi a hawng tlungtir hen LALPA Thudântuk a buar mi ruangah,” a ti.

¹⁶ A thâituan zîngtê ah Josua nih Israel tla chu a phun phun hen a kalpi na le, chu lakah Juda phun chu thur asi.

¹⁷ Juda phun chu mâilei ah a chi chi hen a hawng kaltir le, chu lakah Zerah chi chu thur asi, churawhchun Zerah chi chu a dâwngsungkhur hen an hawngpi le,

¹⁸ Zabdi dâwngsungkhur chu thur asi. Mipa pakhat khat hen a kalpi le, Akan, Karmi fapa, Zabdi tupa chu thur asi.

¹⁹ Josua nih a sinah, “Ka fapa, LALPA mâika ah thudik sim rawh, Israel Pathian sinah na sual phuang rawh. Thil na ti mi tuah hawng ka simh. Ka sinah zei thu khawm pheh lah,” a ti.

²⁰ Akan nih, “A dik asi, LALPA, Israel Pathian tlûnah ka sual ngâk asi, ka ti mi chu hi hi asi,” ti hen a sâng.

²¹ “Thil kan tleih mi Babulon kawrfual dawh tak pakhat, tangkasa kilogram nih ding, ngûn a rih lei kilogramme khing ka muh. Thungâi ka duh le ka lâk. Ka puanin kiangah ka phûm le, a tanglei ah mi tangkasa hen nan tawng lai,” a ti.

²² Josua nih minung âumawh a fial na le, thil lâk thianglo phûm mi leh a tangah mi tangkasa hen an tawng rawh.

²³ Chun puanin ah mi chu an lâk le, Josua leh Israel mi zawzawng sinah an kalpi le, LALPA mâika ah an siah.

²⁴ Josua leh Israel mi tla nih Akan, tangkasa, kawrfual leh ngûn tla, Akan fapa tla leh fanu tla, a ranrual tla, dawrâ tla, a puanin a neih dang zawzawng hen “Akor” (Nawknâk Vakuam) ah an kalpi rawh.

²⁵ Josua nih, “Zei rangah kan lakah nawknâk na siam? LALPA nih na tlûnah nawknâk a hawng tlungtir bâk lai!” a ti. Churawhchun, mi zapi tla nih Akan chu lung hen thi thlo an seh; a dâwngsung tla khawm chu hâwi hen lung hen an seh na le, a neih zawzawng khawm an duah hep.

²⁶ A tlûnah lung tam tak an pawng le, tutiang hen chunah chun a um rih. Churuangah asi, chu mun chu ‘’Akor’’ (Nawknâk Vakuam) an ti mi chu. Churawhchun, LALPA chu a thinthawk lo rawh.