JOSUA 6 - Bawm Common Language Bible Version

Jeriko Khuapi A Chim Mi

¹ Jeriko khua chu an khâr le, Israel tla lût lo ding hen an vêng pang. Âukhawm chu khuapi ah chun an lût hen an suak kho lo.

² LALPA nih Josua sinah, “Jeriko khua chu lalchem tla leh an kawrsen râlṭha tla zawzawng nanmah kut ah ka siah rawh.

³ Nang leh na kawrsen tla nih ni khat ah veikhat vima hen ni ruk tiang nan hêl vima ding asi.

⁴ Bâwlpu pasarih tla chu tâwtawrâwt put chiau hen Thudântuk Bâwm mâilei ah an kal ding asi. A ni sarih ni ah chun nang leh na kawrsen tla chu a vei sarihnâk ah khuapi chu nan hêl lai le, chu liauah chun bâwlpu tla nih chun tâwtawrâwt an tum lai.

⁵ A hâu chu hâu khat hâwi hen a rual hen sâwt vat tum ding asi. Chu rihâu chu nan theih ka hen mi zawzawng hâu fâk tak hen âu ding asi. Churawhchun, khuapi kulh chu a chim ko lai rawh. Churawhchun, kawrsen zawzawng nih ding zar hen khuapi lei chu fûk chawlh ding asi,” a ti.

⁶ Josua nih bâwlpu tla a kawh na le, an sinah, “Kha Thudântuk Bâwm kha lâk ule, minung pasarih a mâilei ah kal ule, tâwtawrâwt put chiau u,” a ti.

⁷ Churawhchun, a minung tla chu khuapi hêl ding hen thu a pêk na rawh, LALPA Thudântuk Bâwm mâilei ah kaltu ding mi tla hen.

^8-9 Churawhchun, Josua nih thu a pêk na mi hâwi hen bâwlpu tla chu mâilei ah tâwtawrâwt tum hen an kal le, chu dunglei ah chun Thudântuk Bâwm zawnhtu bâwlpu tla an kal, vêngtu kawrsen tla nih an zûl na. Chat lo hen tâwtawrâwt chu an tum kumza.

¹⁰ Sikhawmsele, Josua nih a mi tla chu âu lo ding hen a khap na rih le, thu a pêk na lânlo chu zei thu khawm a simtir na lo.

¹¹ Churawhchun, chu murui tla chu LALPA Thudântuk Bâwm put hen khuapi chu veikhat hêl ding a ti na. An hawng kîr le, an riaknâk mun ah an riak.

^12-13 Josua a thâi zîngtê ah a thawk le, a veinihnâk khawm chu bâwlpu leh kawrsen tla nih khuapi chu a lânah mi ni ah an ti hâwi hen an hêl rawh: a masa hen kawrsen vêngtu, a dunglei ah tâwtawrâwt tumtu bâwlpu pasarih, chu zûl ah bâwlpu LALPA Thudântuk Bâwm puttu tla, a dunglei chem ah vêngtu kawrsen tla. Hi kar zawzawngah hin tâwtawrâwt chu tum kumza asi.

¹⁴ A ni nihnâk ah chun khuapi chu veikhat an hawng hêl nawlh le, an riakmun ah an kîr nawlh. Hi hâwi hen ni ruk tiang an ti.

¹⁵ A ni sarih ni ah khuadei bâiah an thawk le, vei sarih a ti hâwi hen an hêl le-- a ni sarih ni cho vei sarih an hêl.

¹⁶ Vei sarih an hawng hêl rawh chun bâwlpu tla nih tâwtawrâwt an hawng tum rawh. Josua nih a mi tla chu âu ding hen thu a pêk na le, an sinah, “LALPA nih khuapi chu an pêk na rawh!

¹⁷ Khuapi leh a sungah mi thil zeizawng LALPA rangah bâwlnâk ding hen veih hep ding asi. Rahab â zuar mi nunau leh a dâwngsungkhur tla cho zuah ding asi, anih nih kan lakah thlingthlâktu tla a thuh na ruangah.

¹⁸ Sikhawmsele, veih ding mi thil chu zeikhawm nan lâk ding asi lo; nan lâk chun Israel riakmun lakah râwknâk nan tlungtir mi asi lai.

¹⁹ Thil zeizawng tangka, ngûn, dâr leh thîr tla LALPA vo asi. LALPA thil siahnâk ah siah ding asi,” a ti.

²⁰ Churawhchun, bâwlpu tla nih tâwtawrâwt chu an tum rawh. Tâwtawrâwt hâu chu mi nih an theih kâ hen hâu fâk tak hen an âu le, kulh chu a chim rawh. Churawhchun, kawrsen zawzawng chu lan fêk hen tlâng leiah an kâi le, khuapi sungah chun an lût le, an lâk rawh.

²¹ Nâmsâu hen khua lakah mi chu mikip mipa, nunau, ngâksia leh upa an thah na. Ranrual tla, dawrâ tla, sanatung tla khawm an thah na.

²² Chun, Josua nih thlingthlâktu panih sinah chun, “Nunau â zuar mi in ah va kal ule, thu nan tiamh mi hâwi hen amah leh a dâwngsung tla hinah hawngpi na u,” a ti.

²³ Churawhchun, an va kal le, Rahab chu a nu leh a pa hen, a unau tla leh a dâwngsungkhur zawzawng an kalpi rawh. An dâwngsungkhur leh an to-aw tla leh an sal tla, Israel riakmun ah him tak hen an kalpi na.

²⁴ Chun, khuapi chu an duah le, a tual leh a sungah mi thil hen a kâng hep. LALPA thil siahnâk ah an hawng put mi ngûn, tangka, dâr leh thîr cho a him.

²⁵ Sikhawmsele, Josua nih Rahab leh a rualsia tla zawzawng chu Jeriko khua ah thlingthlâktu mi panih an fial mi tla a hum na ruangah an nungnâk tla a zuah na. (A thlâk tla chu tusûn ni tiang hen Israel tla lakah an um.)

²⁶ Chu liau chun Josua nih fawrhnâk thu a sim le: “Âuzawng Jeriko khua sak nawlh ding tumtu chu LALPA siatbarh hen um seh! Âuzawng nih a lungphûm phûmtu chu a fapa upachem nih tlâu tâk seh. Âuzawng a kulh kawtkâ siamtu nih chun a fapa a tlum chem mi nih tlâu tâk seh,” a ti.

²⁷ Churawhchun, LALPA chu Josua sinah a um le, chun ram pumpi ah a min a thang rawh.