JOSUA 4 - Bawm Common Language Bible Version

Theihkumzanâk Lung Pawng

¹ Phun zawzawng nih Jordan Va an kanh rawh chun LALPA nih Josua sinah,

² “Phun kip ah mi minung pakhat vima hen leinih thîm na;

³ Jordan Va lâi ah mi lung leinih lâktir na le, chu lung tla chu bâwlpu tla dîrnâk ah mi lâk ding asi. Chu lung tla chu riaknâk mun leiah put hen siah ding hen simh na,” a ti.

⁴ Josua nih minung leinih a thîm na mi chu a kawh na le,

⁵ an sinah, “LALPA nan Pathian Thudântuk Bâwm mâilei ah va put u, Israel phun kip ruangrûl ah lung pakhat vima hen nan liang ah put u.

⁶ Hi lung nih hin LALPA thilti mipi tla rangah theihtirnâk asi lai. Hi nûnthâi ah nan fa tla nih hi bang lung tla hi zei tinâk me si an ti na chun,

⁷ Jordan Va ah LALPA Thudântuk Bâwm an tanpi liauah a luang mi tî â dîn thlo ti nan simh na lai. Chu lung nih chun Israel mi tla rangah zei thil a hawng um ti theihtirtu asi kumza lai,” a ti.

⁸ Chu minung tla nih chun Josua thu chu an ngâi rawh. LALPA nih Josua rangah thu a pêk hâwi hen Jordan Va lâi ah mi lung leinih chu a lâk le, chu lung pakhat chu Israel phun khat ruangrûl vima ding asi. An riakmun leiah lung chu an kâipi le, chunah chun lung tla chu an siah rawh.

⁹ Chun, Josua nih Jordan Va lâi ah bâwlpu tla nih Thudântuk Bâwm an zawnh le, an dîrnâk mun ah lung leinih a pawng. (Chu lung tla chu a um ko rih.)

¹⁰ LALPA nih Josua rangah mipi ti ding hen a simh mi hâwi hen thil zeizawng a lîm lânlo chu bâwlpu tla chu Jordan Va lâi ah an dîr ko. Chu chu Mosi thupêk asi. Mi zapi tla nih mawhsareh hen tiva chu an kanh rawh.

¹¹ Varâl lei an tan thluh rawh chun bâwlpu tla chu LALPA Thudântuk Bâwm hen zapi tla mâilei ah an kal rawh.

¹² Reuben phun ah mi leh Gad phun leh Manaseh phun khingkhuai tla chu râltuk ding tîm chia zet hen Mosi nih ti ding a simh na mi hâwi hen zapi tla mâilei ah Jordan Va an tan.

¹³ LALPA mâika ah minung sâng sâwmli chu Jeriko khua kiangah mi phâi ah râltuk sek ding hen an tan rawh. Israel mi tla

¹⁴ nih Josua chu, chu ni ah chun LALPA nih zei hâwi tluk rokual hen a siam awt ti an thinlung ah ruatnâk a neihtir na. Mosi an zah hâwi hen a dam kar zawzawng amah chu an zah rawh.

¹⁵ Churawhchun, LALPA nih Josua sinah

¹⁶ bâwlpu Thudântuk Bâwm zawnh hen Jordan tiva ah um mi chu hawng kâi rawh ding hen thupêk na ding hen a simh.

¹⁷ Josua nih chu hâwi hen a ti le,

¹⁸ bâwlpu tla nih vakap an tlung rawh chun tiva chu a luang nawlh le, a tiva kâwr chu a khat nawlh rawh.

¹⁹ Zapi tla nih Jordan Va chu a thla khatnâk ni râ ni ah an kanh le, Jeriko saklei Gilgal ah riakmun an khuar.

²⁰ Chunah chun Josua nih lung leinih Jordan Va ah mi chu a pawng.

²¹ Israel mi tla sinah, “Hi nûnthâi ah nan fa tla nih hi lung hi zei tinâk mesi ti hen an deih na chun,

²² Israel tla nih Jordan Va tual hul lakah kal hen an tan liau mi asi ti nan simh na ding asi.

²³ LALPA nan Pathian nih Tipi Sen a kangtir mi hâwi hen Jordan Va khawm tual châr lakah an tan hep lânlo chu tî chu a kangtir.

²⁴ Hi ruangah hin tual tlûnah mikip nih LALPA thilti a rokual zia an theihnâk ding leh LALPA nan Pathian chu nan zah kumzanâk ding hen asi,” a ti.