JOSUA 3 - Bawm Common Language Bible Version

Israel Tla Nih Jordan Va An Kanh Mi

¹ A thâituan zingtê hen Josua leh Israel mi zawzawng tla an thawk le, Akasia mun chu an kaltâk le, Jordan Va kanh hen anna ngâknâk mun leiah an kal rawh.

² Ni thum nûnah chun ruitu tla nih riakmun chu an ṭawl le, mi zapi sinah,

³ “Bâwlpu tla nih LALPA nan Pathian Thudântuk Bâwm an zawnh mi nan muh tikah chun riaknâk mun tla siat ule, zûl na u.

⁴ A lânah hi mun hi nan riak dah lonâk asi ruangah nan kalnâk ding lampi an simh na lai. Sikhawmsele Thudântuk Bâwm chu naih tuk lah ule, dunglei kângah kilometer khat ding lâtnâk ah nan um ding asi,” an ti.

⁵ Josua nih mi zapi tla sinah, “A thenhlimh ule, thâi chu LALPA nih nan lakah thilchê a ti awt,” a ti.

⁶ Churawhchun, bâwlpu tla chu thudântuk Bâwm put hen zapi mâilei ah kal ding hen a simh na le, a simh na mi hâwi hen an kal rawh.

⁷ LALPA nih Josua sinah, “Tusûn ah ka thilti ding mi chu Israel mi tla nih mi rokual tak hâwi hen nangmah zah anna dawmhnâk ding asi, Mosi sinah ka um mi hâwi hen nang sin khawm ah ka um ti an theih lai rawh.

⁸ Bâwlpu tla chu Jordan Va leiah Thudântuk Bâwm chu tiva ah an tlungpi rawh chun an ṭum lai le, tivakap ah an dîr ding asi ti simh na” a ti.

⁹ Chun, Josua nih mipi tla sinah, “Hinah hawng hep ule, LALPA nan Pathian thusim ngâi u.

¹⁰ Nan kalnâk zawng ah Kanaan mi tla, Hit mi tla, Hiv mi tla, Periz mi tla, Girgasit mi tla, Amor leh Jebus mi tla Kanaan ram ah mi a nar na lai.

¹¹ Nan mâilei ah laikulh zawzawng LALPA thudântuk Bâwm nih Jordan Va a kanh tikah Pathian nung chu nan sinah a um ti nan theih lai.

¹² Tuah minung leinih thîm ule, Israel phun kip ah mi pakhat vima hen simh u.

¹³ Bâwlpu tla nih laikulh zawzawng LALPA Pathian Thudântuk Bâwm zawnhtu nih tî an kê hen an lamh kâ hen Jordan Va chu a luang mi â dîn lai le, chu tiva ah mi tî chu munkhat kâ ah â dil hep lai,” a ti.

^14-15 Fângzûn liau asi le, tî khawm a sah thlo rih. Mipi tla nih Jordan Va tan ding hen an riakmun an kaltâk rawh chun bâwlpu tla chu Thudântuk Bâwm put hen mâilei ah an kal rawh. Bâwlpu tla nih an kê hen tî an lamh rawh chun

¹⁶ tî a luang mi tla â dîn thlo le, â pawng tung. Adam ti mi mun ah chun tiva ngâk hen a sâng le, chu chu Zarethan kiang asi. Tipi Thi leikângah a luang mi chu a chat bawk, churawhchun Jeriko khua kiangah an kanh kho rawh.

¹⁷ Mi zapi tla nih tual châr ah Jordan Va an tan liauah chun bâwlpu tla nih Jordan Va lâi tual châr tlûnah Thudântuk Bâwm put hen zapi tla nih an tan thluh ver tiang an dîr ko.