JOSUA 21 - Bawm Common Language Bible Version

Levi Khuapi Tla

¹ Levi dâwngsung lakah ruitu tla chu Eleazar bâwlpu sinah an va kal le, Nun fapa Josua leh Israel phun lakah a lukhâi dadauh tla sin khawm ah an va kal.

² Kanaan ram Siloh khua ah an sinah thu an sim le, “LALPA nih Mosi mang hen khuapi tla umnâk ding hen hawng kan pêk ding leh a kiangkam ranrual tlawngnâk ding mun tla khawm hawng kan pêk ding hen thu a pêk,” an ti.

³ LALPA thupêk zia an ngiar hâwi hen Israel mipi tla nih chun khuapi zeimaw mi an pêk na le, an ran tlawngnâk ding hen an mun an pêk na.

⁴ Levi dâwngsung lakah Kohat chi tla chu khuapi pêk masa chem ding asi. Aron, bâwlpu thlâk dâwngsungkhur rangah Juda, Simeon, Benjamin phun tla ram thawk hen khuapi leithum pêk ding hen ruat asi.

⁵ A dang Kohat chi tla rangah chun Efraim, Dan leh thlanglei mi Manaseh phun tla ram lakah mi khuapi parâ ruat asi.

⁶ Gerson thlâk tla rangah khuapi leithum: Isakar, Aser, Naphtali leh saklei mi Manaseh tla ram lakah mi ruat asi.

⁷ Merari thlah rangah khuapi leinih, Reuben, Gad leh Zebulun ram ah mi ruat asi.

⁸ Mosi mang hen LALPA nih thu a pêk hâwi hen, Israel mi tla nih chamchawhnâk mang hen Levi tla rangah hi bang khuapi tla leh an ran rangah ram tla an ruat piak na.

⁹ Levi chi Aron thlâk lakah mi Kohat chi tla rangah

¹⁰ Simeon leh Juda, ram lakah mi khuapi an pêk na mi min tla chu hi bang tla hi an si: An ruat masa chem chu hi hi asi ding asi.

¹¹ Arba khuapi pêk an si. (Arba chu Anak thlâktu asi), tuah lam chun Hebron ti asi, Juda tlâng ram ah a um, a kiangkam ah ran tlawngnâk mâng tla hen.

¹² Sikhawmsele, chu khuapi tla, phâisen leh khua lian dauh tla khawm, Jephuneh fapa Kaleb tingvo rangah pêk asi rawh.

¹³ Hebron sap singsuan ah (himnâk khuapi pakhat) mun ah bâwlpu Aron thlâk tla rang ding ah hi bang khuapi tla hi ruat asi: Libnah,

¹⁴ Jatir, Estemoa,

¹⁵ Holon, Debir,

¹⁶ Ain, Jutah leh Beth Semes leh ran tlawngnâk mâng hen. Juda leh Simeon phun tla thawk hen khuapi pakua asi.

¹⁷ Benjamin ram thawk hen khuapi pali Gibeon, Geba,

¹⁸ Anathoth leh Almon, ran tlawngnâk mâng hen pêk an si.

¹⁹ A ektê hen khua leithum ran tlawngnâk mun hen Aron thlâk bâwlpu tla rangah pêk an si.

²⁰ Levi dâwngsungkhur lakah mi a dang tla, Kohat chi tla rangah Efraim lakah mi khuapi zeimaw zat chu ruat asi.

²¹ Khuapi pali an pêk na: Sekem leh a kiangkam ran tlawngnâk, Efraim tlâng ram (himnâk khuapi tla lakah pakhat), Gezer,

²² Kibzaim, Beth Horon, a kiangkam ran tlawngnâk mun hen.

²³ Dan phun tla ram thawk hen khuapi pali pêk an si: Eltekeh Gibethon,

²⁴ Aijalon leh Gathrimon, a kiangah ran tlawngnâk mun hen.

²⁵ Thlanglei mi Manaseh phun tla ram lakah mi khuapi panih pêk an si: Taanak leh Gathrimon, a kiangkam ran tlawngnâk mun hen.

²⁶ Kohat chi dâwngsungkhur tla nih khuapi parâ leh a kiangkam ran tlawngnâk mun hen anna ting.

²⁷ Levi murui dang Gerson chi, saklei mi Manaseh ram mi khuapi panih anna ting. Basan ram ah mi Golan (himnâk khuapi tla lakah pakhat) leh Beeshterah, a kiangkam ah mi ran tlawngnâk hen.

²⁸ Isakar ram lakah mi khuapi pali anna ting; Kision, Daberrath,

²⁹ Jarmut leh Enganim tla, an kiangkam ran tlawngnâk hen.

³⁰ Aser ram thawk hen khuapi pali anna ting; Misal, Abdon,

³¹ Helkath leh Rehob, an kiangkam mâng ran tlawngnâk hen.

³² Naphtali ram thawk hen khuapi pathum anna ting; Galili ram ah mi Kades, a kiangkam mi ram ran tlawngnâk hen, (himnâk khuapi tla lakah pakhat asi), Hamoth Dor, Kartan, a kiangkam mi mang ran tlawngnâk hen.

³³ Gerson phun tla dang dang nih anna ting mi zawzawng khuapi fawnh hen leithum asi, a kiangkam mi ram ran tlawngnâk mâng hen.

³⁴ Levi dang tla Merari chi nih chun Zebulun phun tla ram ah mi khuapi leili anna ting: Jokneam, Kartah,

³⁵ Dimnah leh Nahalal, a kiangkam mâng ran tlawngnâk hen.

³⁶ Reuben phun tla ram lakah mi khuapi pali anna ting: Bezer, Jahaz,

³⁷ Kedemoth leh Mephath, a kiangkam mâng ran tlawngnâk hen.

³⁸ Gad phun tla thawk hen khuapi pali anna ting; Gilead a mi Ramoth, a kiangkam ah mi mâng ran tlawngnâk hen (himnâk khuapi tla lakah pakhat asi), Mahanaim,

³⁹ Hesbon leh Jazer, a kiangkam ah mi mâng ran tlawngnâk hen.

⁴⁰ Merari phun tla rangah ruat mi fawnh ver hen khuapi leinih asi.

^41-42 Israel mi tla ram thawk hen Levi tla nih anna ting mi fawnh ver hen khuapi sâwmli leh pariat asi, a kiangkam ah mâng ran tlawngnâk hen, chu zawng chu Levi tla rangah pêk asi.

Israel Tla Nih Ram Chu Anna Ting Rawh

⁴³ Churawhchun, LALPA nih an thlâktu tla rangah a tiamh na rawh hâwi hen Israel tla zawzawng rangah ram chu a pêk na rawh. Ram chu anna ting rawh chun chunah chun an um rawh.

⁴⁴ Ram chu thlangam tak hen LALPA nih a pêk na le, an pu tla sinah a tiamh na rawh hâwi hen. Anmah dotu an mêlma zawzawng lakah pakhat khawm anmah do khotu an um lo, LALPA nih Israel tla chu an mêlma zawzawng lakah nehtu ah a siam na rawh ruangah.

⁴⁵ LALPA nih Israel tla sinah thu a tiamh na mi vial chu pakhat khawm a thlâu lo.