JOSUA 20 - Bawm Common Language Bible Version

Himnâk Khuapi Tla

¹ Churawhchun, LALPA nih Josua chu

² Israel mi tla simh na ding hen thu a simh, “Mosi sinah an simh na ding hen thu ka pêk rawh hâwi hen himnâk khuapi thîm u.

³ Mi âunih mawh, mi a thah palh sual chun chu himnâk khua ah chun a va tek lai le, lehrûl samtu ding mi lakah mi chu a suak khonâk ding hen.

⁴ Chu khua tla lakah zei mi khua tal ah a tek kho lai le, khuapi tual zâwllâi lâirêlnâk mun ah a va kal lai le, ruitu tla sinah thil a hawng umdân tla chu a va sim fiang lai. Churawhchun, annih nih khuapi sungah umnâk ding mun an pêk lai le, chunah chun a um kho lai.

⁵ Lawhbâ samtu nih a hawng hâwl hen a zûl asi chun, khua mi minung tla nih a hâwltu kut ah an ap chawlh ding asi lo. Thinthawk ruang silo hen palhsual asi ruangah an hum ding asi.

⁶ Chu khuapi ah chun zatlâng nih lai an rêl lânlo leh chu liauah bâwlpu lal a thih lânlo chu, chu khua ah a um kumza ding asi. Chu tikah lam chun a in leiah amah khua ah a kîr nawlh lai rawh,” a ti.

⁷ Churawhchun, Jordan Va thlanglei sîrah Galili ah Kades chu an siam, Naphtali tla umnâk tlâng ram; Sekem, Efraim umnâk tlâng ram ah, Hebron chu Juda umnâk tlâng ram asi.

⁸ Jordan saklei, ramkaro mun tênâu dauh Jeriko khua saklei ah, Reuben ram ah Hezer an thîm: Gilead a mi Ramoth, Gad phun umnâk ram; Basan ah mi Golan, Manaseh phun tla umnâk ram.

⁹ Hi bang khuapi tla hi Israel mi zawzawng leh ramdang mi an sinah um mi tla rangah himnâk khuapi rangah thîm mi chu asi. Âuzawng nih mi a thah palh sual ah anmah lehrûl samtu lakah mi chu chunah chun himnâk an tawng khonâk ding hen. Zatlâng lâirêlnâk a um lânlo chu mi thahtupa chu thah ding asi lo.