JOSUA 2 - Bawm Common Language Bible Version

Josua Nih Jeriko Ah Zauh Thling thlâktu A FiaI Na Mi

¹ Josua nih thlingthlâktu panih Akasia ah mi riakmun thawk hen a thup hen Kanaan ram ah mi Jeriko khua zauh ding hen a fial na. Khuapi ah an va lût le, nunau â zuar mi Rahab in ah, zân ah an riak.

² Jeriko khua mi lalchem nih chu zân ah chun Jeriko ram ah mi thlingthlâktu an hawng ti a theih le;

³ Rahab sinah thu a thanh le, “Na in ah an hawng kal mi tla kha ram thlingthlâktu tla an si! Hawng suakpi na!” a ti.

^4-6 “Ka in ah mi zeimaw mi chu an hawng le, a zei lei mi minung me an si ti lam chu ka theih loh. Nî tlâk lânah kulh an khâr lântê ah an suak ving rawh, an kalnâk khawm ka theih loh. Sikhawmsele, an dunglei ah nan ṭhâwl sawm chun nan tleih kho lai dahmawh,” ti hen a sâng. (Rahab nih thlingthlâktu chu in tlûnah a kalpi na le, lapawng a siah mi tlûnah a thuh na.)

⁷ Chu lalchem minung tla chu khuapi ah mi an suak le, kulh chu an khâr rawh. Jordan Va an kanhnâk mun tiang hen Israel thlingthlâktu tla chu kawrsen tla nih an va zauh.

⁸ Zauh thlingthlâktu tla chu an it lântê ah Rahab chu a in tlûn chawnh lakah a kal le, an sinah,

⁹ “LALPA nih hi ram hi an pêk na rawh ti ka theih. Ram sungah mikip nih an ṭih na ti ka theih rawh.

¹⁰ Aigupta ram nan kaltâk liauah nan mâika ah Tipi Sen a kangtir mi tla khawm kan theih. Jordan saklei ah Amor lalchem tla panih Sihon leh Og nan thah mi thu khawm kan theih.

¹¹ Chu chu kan theih kâ hen thungâi kan ningṭih, nanmah ruangah kan thinlung thungâi kan lâu. LALPA nan Pathian chu tual leh vân Pathian asi.

¹² Tuah nanmah rangah ṭhadektê hen ka nan ti na mi hâwi hen ka dâwngsung tla khawm nan ti bâk na ding hen thu tiam u, nanmah kan zumh na khonâk ding hen singsiahnâk hawng ka pêk u.

¹³ Ka pa leh ka nu, ka unaupa leh ka unaunu leh an dâwngsung tla zawzawng zuah na ding hen leh nan hawng kan thah lonâk ding hen ka sinah thu tiam u,” a ti na.

¹⁴ Annih nih nunau sinah, “Kan thusim hâwi hen kan tilo chun Pathian nih kan nungnâk lâk seh! Hi kan thilti tla hi pakhat khawm na simh na lo asi chun, LALPA nih hi ram hi hawng kan pêk tikah, ṭhadektê hen kan ti na lai ti hen thu kan tiamh asi,” an ti.

¹⁵ Rahab in chu khuapi kulh sungah asi le, churawhchun thlingthlâktu tla rî hen langawtkawt ah a thlâk na.

¹⁶ An sinah, “Tlâng ram ah kal ule, lalchem minung tla nih an hâwl na awt asi, an hawng kîr lânlo chu chunah ni thum va a thup u, chu tikah nan kalnâk ding mi leiah nan kal kho lai,” a ti na.

¹⁷ Annih nih a sinah, “Thu na kan simh mi hâwi hen kan ti lai.

¹⁸ Hi hi na ti ding mi chu asi. Nan ram kan hawng rûn tikah, hi na kan thlâknâk langawtkawt ah lasen thlâi. Na nu leh na pa, na unau tla leh na pa dâwngsungkhur tla, na in ah pumh ver na.

¹⁹ Âuzawng chu liauah lêng suaktu chu amah mawh asi lai, kannih mawh asi lai lo; in ah mi âutal nganfâk a tuartu an um chun kanmah mawh asi lai.

²⁰ Sikhawmsele, kan thilti hi âumawh na simh mi asi chun, kannih khawm nih na lakah thu kan tiamh mi tla hi kan zûl ding asi lo,” an ti.

²¹ Nunau nih rem a ti le, a kaltir na rawh. An kal ving rawh chun lasen chu langawtkawt ah a thlâi rawh.

²² Chu thlingthlâktu tla chu tlâng leiah an va kal le, anna thup rawh. Lalchem minung tla nih tlâng kiangkam ah nithum an hâwl na le, khawmsele an tawng na lo. Churawhchun, Jeriko leiah an kîr rawh.

²³ Churawhchun, tlângah mi thlingthlâktu panih chu an hawng ṭum le, tiva an kanh rawh chun Josua sinah an kîr nawlh rawh. Thil zeizawng tla chu an simh rawh le,

²⁴ a sinah, “LALPA nih ram pumpi chu hawng kan pêk rawh ti kan theihfiang rawh. Chunah mi tla nih chun hawng kan ṭih hep,” an ti.