JOSUA 19 - Bawm Common Language Bible Version

Simeon Rangah Pêk Mi Ram

¹ Ruatnâk panihnâk chu Simeon phun dâwngsungkhur rangah asi. A ram chu Juda phun tla rangah ruat mi leikângah asi.

² Hi lakah hin Bersheba, Seba, Moladah,

³ Hazar Shual, Balah, Ezem,

⁴ Eltolad, Bethul, Hormah,

⁵ Ziklak, Beth Markaboth, Hazar Susah,

⁶ Beth Lebaoth leh Saruhen: Khuapi leithum asi, a kiang mi khua tla hen.

⁷ Chu lo khawm a dang Ain, Rimmon, Ether leh Asan: khuapi pali, a kiang mi khua tla hen.

⁸ Hi bang tla hen a kiang kam khuapi hen Baalath Beer (Ramah mawh) simlei tiang hen. Hi hi Simeon phun dâwngsungkhur tla nih an umnâk ding hen anna ting mi chu asi.

⁹ Juda tla rangah tingvo chu anmah rang tâwk nûnah a leifuan ram zeimaw zat ding chu Simeon phun rangah pêk asi.

Zebulun Phun Rangah Pêk Mi Ram

¹⁰ Ruatnâk veithumnâk chu Zebulun phun dâwngsung rang asi. An ram ting chu Sarid tiang asi.

¹¹ Chu thawk hen ramri chu thlanglei kâng Mareal leiah a kal le, Dabeseth dêng hen, Jokneam saklei mi tiva a va tleng.

¹² Sarid varâl saklei kângah a kal le, Kisloth Tabor ramri leiah kal hen Daberath ah, chu thawk hen Japhia leiah a kâi.

¹³ Saklei a kâi vima le, chu thawk hen chun Gath Hepher, Ethkazin ah, Neah leiah a ngâwi le, Rimon lampi leiah a kal.

¹⁴ Marlei kângah chun ramri chu Hanathon leiah a ngâwi, Iphtahel Tivakuam ah a dawng.

¹⁵ Katath, Nahalal, Simron, Idalah leh Bethlehem: khuapi leinih, a kiangkam mi khua rêlsih hen.

¹⁶ Hi bang khuapi tla leh ram lakah khua lian tla chu Zebulun phun dâwngsung tla nih an mun rangah anna ting mi chu asi.

Isakar Phun Tla Rangah Pêk Mi Ram

¹⁷ Ruatnâk palinâk chu Isakar phun dâwngsungkhur tla rang ding asi.

¹⁸ Chu lakah chun Jezreel, Kesuloth, Sunem,

¹⁹ Hapharaim, Sion, Anaharath,

²⁰ Rabith, Kision, Ebez,

²¹ Remeth, Enganim, Enhadah leh Beth-pazez telh hen.

²² Ramri nih Tabor a va dêng le, Sahazumah, Beth Shemes pal hen Jordan Va ah a dawng, khuapi leiruk a kiangkam khua tla hen.

²³ Hi bang khuapi tla hi Isakar phun dâwngsungkhur tla nih anna ting mi ram chu asi.

Aser Phun Tla Rangah Pêk Mi Ram

²⁴ Ruatnâk panganâk chu Aser dâwngsungkhur rang asi;

²⁵ Chu ram sungah khuapi Helkath, Mali, Beten, Aksap,

²⁶ Alam Melek, Amad, Misal tla an si. Thlanglei kângah Karmel leh Sihor Libnath a va dêng.

²⁷ Saklei kângah â her le, Bethdagon ah a kal, Zebulun leh Iphtahel lei kuam a va dêng le, marlei ah Bethemek leh Neiel a va tleng. Marlei kâng Kabul leiah a kal vima le,

²⁸ Ebron, Rehob, Hamon leh Kanah pal hen Sidon tiang a kal.

²⁹ Ramri chu Ramah leiah a ngâwi le, Tura kulhnei khuapi a va tleng, chu thawk hen Hosah leiah a kal le, Mediteranian Tipi ah a dawng. Chunah khuapi tla chu Mahalab, Akzib,

³⁰ Umah, Aphek leh Rehob khuapi tla chu an si: khuapi kul leh panih a kiangkam mi hen.

³¹ Hi bang khuapi tla hi Aser phun dâwngsungkhur nih anna ting mi ram chu asi.

Naphtali Phun Tla Rangah Pêk Mi Ram

³² Ruatnâk paruknâk chu Naphtali phun dâwngsung tla rangah asi.

³³ A ramri chu Heleph thawk hen Zaananim leikângah Oak leiah a kal. Adaminekep leh Jamnia leikângah Lakum tiang a kal, churawhchun Jordan Va ah a dawng.

³⁴ Ramri chu thlanglei kângah Aznoth Tabor leiah a pial le, chu thawk hen Hukok thawk hen simlei ah Zebulun a va dêng, thlang leiah Aser, Jordan chu saklei kângah.

³⁵ Kulhnei khuapi tla chu hi tla an si: Zidim, Zer, Hamath, Rakath, Kinereth,

³⁶ Adamah, Ramah, Hazor,

³⁷ Kades, Edrei, Enhazor,

³⁸ Iron, Mikdalel, Horem, Bethanath leh Beth Shemes tla hi an si: Khuapi leikua a kiangkam mi khua lian tla hen.

³⁹ Hi bang khuapi tla hi Naphtali phun dâwngsung khur tla ting mi chu asi.

Dan Phun Tla Rangah Pêk Mi Ram

⁴⁰ Ruatnâk pasarihnâk chu Dan phun dâwngsung tla rang asi.

⁴¹ Chu lakah chun Zorah, Eshtaol, Irsemes,

⁴² Saalbim, Aijalon, Ithlah,

⁴³ Elon, Timnah, Ekron,

⁴⁴ Eltekeh, Gibethon, Baalath,

⁴⁵ Jehud, Beneberak, Gathrimon,

⁴⁶ Mejarkon leh Rakon tla an um, a kiang mi Jopa khawm.

⁴⁷ Dan tla nih an ram an nei lo liauah Laish an va do, an lâk le; mi tla an thah na, anna ting rawh. Chunah chun an um le, a min khawm Laish an ti mi chu Dan ti hen an thleng, anmah thlâktu Dan min suangkhâng hen.

⁴⁸ Chubang khuapi tla chu Dan phun dâwngsung nih anna ting mi ram chu asi.

Ram Ruatnâk Dawng Chem

⁴⁹ Israel mipi tla nih ram tla anna ṭhen rawh chun, Nun fapa Josua khawm a tâ ding hen ram zeimaw zat an pêk bâk.

⁵⁰ LALPA thupêk hâwi hen khuapi a deih mi chu an pêk: Timnath Serah, Efraim tlâng ram ah mi khuapi chu an pêk. Chu khuapi chu a sak nawlh le, chunah chun a um.

⁵¹ Bâwlpu Eleazar, Nun fapa Josua, Israel phun lakah ruitu tla nih chun Siloh ah LALPA puanin mâika ah mah vo chiau theihnâk ah chamchawh hen an ṭhen. Hi hâwi hen ram ṭhen chu anna lîm rawh.