JOSUA 18 - Bawm Common Language Bible Version

Ram A Leifuan Mi Ṭhennâk

¹ Ram an lâk thluh ver nûnah chun, Israel mi zawzawng chu Siloh ah anna pûm le, chunah LALPA umnâk puanin an zâr.

² Israel lakah phun sarih chu ram anna ting lo rih mi an um nget rih.

³ Churawhchun, Josua nih Israel mi tla sinah, “Zei tiang riamruam me LALPA Pathian nih nan thlâktu rangah a pêk mi ram chu lâk lo hen nan ngâk ko awt?

⁴ Phun kip lakah mi pathum seng hawng ka pêk u, ram pumpiluk ṭawl hen a thlâ lâk ding hen ka fial na awt, anmah ting ding hen an duh mi ram tla chu. Chu tikah ka sinah an hawng kîr nawlh ding asi.

⁵ Ram chu an rangah anrang sarih hen ṭhen ding asi lai. Juda chu simlei kâng ram ah, Josef fa tla chu marlei kâng ram ah.

⁶ Hi ram mun sarih hi rîn ule, ka sinah hawng put u. Churawhchun, LALPA kan Pathian sinah deih hen nan rangah chamchawhnâk ka siam lai.

⁷ Sikhawmsele Levi murui nih chun tuah nan lakah vo ting lo mi tla hâwi hen vo an nei lo, annih tla lam chu LALPA bâwlpu tla rianṭuantu an si ruangah. Asi, Gad phun leh Reuben phun leh saklei kângah um mi Manaseh phun tla nih chun Jordan Va saklei ram anna ting rawh le, LALPA to-aw Mosi nih an sinah a pêk na rawh asi” a ti.

⁸ Josua nih chu hâwi hen thu a simh na rawh chun minung tla chu ram lem rîn ding hen an kal rawh. “Ram pumpi kal ver hen a lem siam ule, ka sinah hawng kîr nawlh u. Churawhchun, hi Siloh khua ah keimah nih chamchawhnâk siam hen nan rangah LALPA ka deih lai,” a ti.

⁹ Churawhchun, chu mi tla chu ram pumpi ah an kal le, mun sarih ah an ṭhen mi chu, khuapi tla zawzawng an rîn sih ver. Churawhchun, Josua sinah Siloh ah an kîr nawlh rawh.

¹⁰ Josua nih LALPA ngiar hen an rangah chamchawhnâk a siam le, Israel phun um rih mi nih anna ting ding hen a vauh na.

Benjamin Thlâk Tla Rangah Pêk Mi Ram

¹¹ Benjamin dâwngsungkhur tla rangah ruat mi ram chu a masa chem ding asi. An ram ding mi chu Josef leh Juda phun kar lakah um ding asi.

¹² Marlei kângah ramri chu Jordan Va thawk hen Jeriko Suk marlei kâng asi le, thlanglei kângah tlâng ram pal hen Bethaven ramkaro tiang asi.

¹³ Chun, chu ramri chu a kal vima le, simlei kâng Luz kiang (Bethel khawm an ti mi) tiang, chun Atarot Adar leiah a ṭum le, simlei kâng tlângah Beth Horon Tang dauh mi tiang.

¹⁴ Chu ramri chu mun dang leikângah a pial le, hi tlâng thlanglei thawk hen simlei kângah a hawng a kuai le, Kiriath Baal ah, (Keriath Jearim mawh) chu chu Juda phun tla tâ asi. Chu chu thlanglei kâng ramri asi.

¹⁵ Simlei kâng ramri chu Keriath Jearim thawk hen a dawmh le, Neptoah Tinung va leiah a kal.

¹⁶ Churawhchun, tlâng bul ah a ṭum le, Hinom Kuam chu tlûnlei kâng asi, Rephaim Kuam marlei kâng dawnghnâk asi. Simlei kângah Hinom Kuam leiah a pal le, Jebus tlâng simlei Enrogel leiah.

¹⁷ Churawhchun, marlei kângah her hen Ensemes leiah Geliloth ah, Adumim Liamnâk zâwn ah a kal. Bohan Lung leikângah ramri chu a liam le, (Bohan chu Reuben fapa asi)

¹⁸ Jordan Vakuam tlûnlei kângah marlei a hawng pal. Churawhchun, tivakuam leikângah a liam le,

¹⁹ Beth Hoglah marlei kâng pal hen, Jordan Va a suaknâk mun marlei kâng Tipi Thi ah a dawng. Hi hi simlei kâng ramri asi.

²⁰ Jordan chu saklei kâng ramri asi. Hi ramri hi Benjamin dâwngsung tla nih anna ting mi ram chu asi.

²¹ Hi bang tla hi Benjamin phun dâwngsungkhur nih anna ting mi ram sungah khuapi tla chu an si: Jeriko, Beth Hoglah, Emek Keziz,

²² Beth Arabah, Zemaraim, Bethel,

²³ Avim, Parah, Ophrah,

²⁴ Kepharamoni, Opni leh Geba: Khuapi leinih asi, a kiangkam mi tla khawm.

²⁵ Chu lo khawm ah, Gibeon, Ramah, Beeroth,

²⁶ Mizpah, Kephirah, Mozah,

²⁷ Rekem, Irpeel, Taralah,

²⁸ Zela, Haeleph, Jebus (mawh Jerusalem), Gibeah leh Keriath Jearim: khuapi leili, a kiangkam mi khua tla khawm. Hi ram hi Benjamin phun dâwngsungkhur tla nih anmah rangah anna ting mi chu asi.