JOSUA 17 - Bawm Common Language Bible Version

Thlanglei Mi Manaseh Phun Tla

¹ Jordan Va thlanglei ram chu Josef fapa upachem mi Manaseh thlâk tla dâwngsungkhur rangah ruat asi. Makir, Gilead pa chu Manaseh fapa upachem asi, amah chu kawrsen râlṭha asi le, churuangah Gilead leh Basan, Jordan saklei chu a rangah pêk asi.

² Jordan Va thlanglei ram chu Manaseh dâwngsungkhur tla zawzawng rangah pêk asi: Abiezer, Helek, Asriel, Sekem, Hepher leh Semida. Hi tla hi Josef fapa Manaseh thlâk tla lakah mipa chu an si, dâwngsungkhur lakah a lû dauh an si.

³ Zelophehad, Hepher fapa, Gilead fapa, Makir fapa, Manaseh fapa tla nih chun fapa an nei lo, fanu karo an nei. An min tla chu Mahlah, Noah, Hoglah, Milkah leh Tirzah.

⁴ Eleazar bâwlpu leh Nun fapa Josua leh ruitu tla sinah an va kal le, “LALPA nih Mosi sinah kanmah leh kan unau mipa tla sinah, mun zeimaw zat hawng kan pêk ding hen thu a pêk,” an ti. Churawhchun, LALPA thupêk hâwi hen, an unau mipa sinah chun an pêk na.

⁵ Churuangah chun asi, Manaseh phun tla nih chun Gilead leh Basan, Jordan saklei mi ram chu tingvo râ anna ting mi chu.

⁶ Chu thawk hen a fanu leh a fapa thlâk tla rangah chun ram chu ruat piak asi rawh. Gilead ram chu Manaseh thlâk dang tla zawzawng rangah ruat asi.

⁷ Manaseh phun tla ram nih chun Aser thawk hen Sekem saklei mi Mikmethath rî. Chu ramri chu simlei kângah Entapuah mi tla a uap.

⁸ Tapuah kiangkam ah mi ram chu Manaseh phun tla tâ asi, sikhawmsele Tapuah khua ramri kiangah mi chu Efraim thlâk tla tâ asi.

⁹ Ramri chu thlanglei kâng Kanah tiva leikângah a ṭum. Chu tiva simlei kângah mi khuapi tla chu Efraim tâ asi, sikhawmsele Manaseh ramri kiangah um mi asi. Manaseh ramri chu tiva sîr marlei kângah a kal vima le, Mediteranian Tipi ah a dawng.

¹⁰ Efraim chu simlei kângah a um le, Manaseh chu marlei kângah, thlanglei kângah chun Mediteranian Tipi chu an ramri asi. Aser chu mar thlanglei kângah a um le, Isakar chu mar saklei ah.

¹¹ Aser leh Isakar ram sungah Manaseh nih â ting mi chu Beth Shan leh Ibleam, a kiangkam ah mi khuapi tla, Dor khua khawm (Vakap mi pakhat asi) Endor, Taanak, Megido leh a kiangkam mi khuapi tla.

¹² Manaseh phun tla nih chun chubang khuapi ah um mi tla chu an nar na kho lo le, churuangah Kanaan mi tla chu chunah an um vima.

¹³ Israel tla chu an hawng chak dauh tik khawm ah Kanaan mi tla chu an nar ver na lo, sikhawmsele anmah rianṭuantu ah an mang na.

Efraim Phun Leh Tlâklei Manaseh Phun Tla Nih Ram Kâu Dauh An Ngiarnâk

¹⁴ Josef thlâk tla nih Josua sinah, “Zei zia, ram chu tingvo khat cho hawng kan pêk zia? LALPA malsâwmnâk zârah minung kan tam thlo bâk rawh mi,” an ti.

¹⁵ Josua nih a sâng le, “Chu hâwi tluk hen nan tam asi chun, Efraim tlâng ram nan rangah a bî tuktarâi chun thing mun ah va kal ule, Periz leh Rephaim umnâk ram chu nanmah rangah va siam u,” a ti na.

¹⁶ Annih nih, “Tlâng ram chu kannih rangah a kâu tawk lo, phâi ah mi Kanaan mi tla nih chun thîr kari tla an nei, Beth Shan leh a kiangkam mi khuapi tla Jezreel Vakuam ah um mi tla khawm nih an nei,” an ti.

¹⁷ Josua nih Efraim phun leh thlanglei mi Manaseh phun tla sinah, “Nannih hi tam khawm nan tam le, thil khawm nan tikho thlo, rangkhat ngâk a tam nanna ting lai.

¹⁸ Tlângram chu nan tâ asi lai rawh. Chu lo khawm ah zachang mun a um, chubang tla chu khatlei thawk hen khatlei dawng tiang siam ule, a ting u. Kanaan mi tla chu thîr kari nei hen chak khawmsele nar hep na u,” a ti na.