JOSUA 15 - Bawm Common Language Bible Version

Juda Phun Tla Rangah Pêk Mi Ram

¹ Juda phun tla nih hi hâwi hen ruat mi ram zeimaw zat chu anna ting: Chu ram chu Zin ramkaro simlei ram Edom ramri tiang asi.

² Hi simlei ramri hi Tipi Thi dawnghnâk thawk hen a kal le,

³ Akrabim Liamnâk thawk hen simlei kâng a kal le, Zin tiang asi. Kades Barnea simlei ah a kal le, Hezron pal hen Adar leiah a kâi le, Karka leiah a pial.

⁴ Azmon leiah a kal vima le, Aigupta ram leiah tiva dung zûl hen a kal le, ramri dawnghnâk Mediteranian Tipi a tleng. Chu chu Juda phun tla simlei ramri asi.

⁵ Saklei ramri chu Tipi Thi asi, a luang vima le, Jordan Va suak tiang hen. Chun, marlei ramri chu a dawmh le,

⁶ Beth Hoglah tiang hen, Jordan Va tlûnlei marlei kâng tlâng tiang hen, Bohan Lung leikângah a kâi le, (Bohan chu Reuben fapa asi)

⁷ ‘Akor’ (Nawknâk) Vakuâm thawk hen Debir leiah a kâi le, churawhchun marlei kâng Gilgal leiah, Adumim Liamnâk lei hawi hen tivakuam simlei sîr tiang. Chu thawk hen a kal vima le, Ensemes tiva lâi ah, Enrogel ah a va suak le,

⁸ Hinom Vakuam leiah a kâi le, Jebus khuapi Jerusalem umnâk simlei tlâng sîr ah. Ramri chu tlâng tlûnlei kângah a kâi le, Hinom Vakuam thlanglei kâng sîr ah Rephaim Kuam mar dawnghnâk tiang hen.

⁹ Chu thawk hen Nephtoah tiva leiah a kal le, Ephron Tlâng kiang khuapi tla kiangah a va suak. Chu thawk hen a hawng mer le, Baalah leiah (mawh Kiriath Jearim),

¹⁰ Baalah chu kulh hen Edom tlâng leikângah Jearim Tlâng marlei sîr ah a kal le, (mawh Kesalon) Bethshemes leiah a ṭum le, Timna tiang hen.

¹¹ Ramri Ekron marlei tlângah a kal le, Sikeron leiah a pial le, Baalah Tlâng pal hen Jamnia tiang hen, Mediteranian Tipi ah a dawng.

¹² Chu chu thlanglei kâng ramri asi. Hi ramri tla sungah hin Juda dâwngsung minung tla an um asi.

Kaleb Nih Hebron Leh Debir A Neh Mi Thu

¹³ LALPA nih Josua rangah thu a pêk mi hâwi hen Juda tingvo lakah mi Juda phun lakah mi Jephuneh fapa Kaleb sinah khawm ram tingvo an pêk bâk. Anak thlâktu Arba khuapi Hebron â ting.

¹⁴ Kaleb nih Anak thlâk tla khuapi ah um mi Sesai chi, Ahiman chi leh Talmai chi chu a nar phin na.

¹⁵ Chu thawk hen Debir khua mi tla do ding hen a kal. (Hi khua hi Kiriath Sepher ti hen an sak.)

¹⁶ Kaleb nih, “Kiriath Sepher do hen hawng ka neh piaktu zawng chu ka fanu Aksah umpi ding hen ka pêk lai,” a ti.

¹⁷ Othniel, Kaleb unaupa Kenaz fapa nih khuapi chu a lâk le, churuangah umpi ding hen a fanu Aksah chu a pêk rawh.

¹⁸ Anna umh ni ah Othniel nih a nupi chu a pa rangah phâisen a deihtir. A sanatung tlûnah mi chu a ṭum le, a pa Kaleb nih, “Zei na duh?” a ti.

¹⁹ Anih nih, “Tikhurchawh ka duh, mun na hawng kan pêk mi kha mun char asi,” a ti. Churawhchun, Kaleb nih a tlûnah mi leh a tangah mi tikhur a pêk.

Juda Khuapi Tla

²⁰ Hi hi Juda phun dâwngsungkhur tla nih ram anna ting mi tla chu asi.

²¹ Khuapi simlei kângah anna ting mi a lât chem mi chu Edom ramri kiang tla, chubang tla chu Kabzeel, Eder, Jaqur,

²² Kinah, Dimonah, Adadah,

²³ Kades, Hazor, Ithnan,

²⁴ Ziph, Telem, Bealoth,

²⁵ Hazor Hadattah, Kerioth Hezron (mawh Hazor.)

²⁶ Amam, Sema, Moladah,

²⁷ Hazar Gadah, Hesmon, Bethpelet,

²⁸ Hazar Shual, Bersheba, Beziothiah,

²⁹ Baalah, Iim, Ezem,

³⁰ Eltolad, Kesil, Hormah,

³¹ Ziklak, Madmanah, Sansanah,

³² Lebaoth, Silhim, Ain leh Rimon: a ekte hen khua kul leh khua kua, a kiangkam ah khua lian tla zawzawng hen.

³³ Tlâng bul ah mi khua tla Estaol, Zorah, Asnah,

³⁴ Zanoah, Enganim, Tapuah, Enam,

³⁵ Jarmut, Adulam, Sokoh, Azekah,

³⁶ Saaraim, Adithaim, Gederah leh Gederothaim: a kiangkam ah khuapi tla hen khua leili asi.

³⁷ Chu lo khawm ah Zenan, Hadasah, Migdalgad,

³⁸ Dilean, Mizpah, Joktheel,

³⁹ Lakis, Bozkath, Eklon,

⁴⁰ Kabon, Lahmam, Kitlis,

⁴¹ Gederoth, Bethdagon, Naamah leh Makedah: a kiangkam mi khuapi hen khua leiruk asi.

⁴² Chu lo khawm ah Libnah, Ether, Asan,

⁴³ Iphtah, Asnah, Nezib,

⁴⁴ Keilah, Akzib leh Marsesah: a kiangkam mi khua lian tla hen khuapi pakua an si.

⁴⁵ Ekron khawm a um, khua lian leh khuatê tla hen.

⁴⁶ Khuapi leh khuatê Asdod, Ekron thawk hen Mediteranian Tipi tiang um mi tla an si.

⁴⁷ Asdod leh Gaza khawm khua lian leh khua mê hen an um, Aigupta ramri kiang leh Mediteranian Tipi dawngnâk tiang ah a um.

⁴⁸ Tlâng ram mi tla chu Samir, Jatir, Sokoh,

⁴⁹ Danah, Kiriath Sepher (mawh Debir.)

⁵⁰ Anab, Estemoa, Anim,

⁵¹ Gosen, Holon leh Giloh: a kiangkam khua lian tla hen leikhat an tling.

⁵² Chun, Arab, Dumah, Esan,

⁵³ Janim, Beth Tapuah, Aphekah,

⁵⁴ Humtah, Hebron leh Zior: a kiangkam mi khua lian tla hen khua kua an si.

⁵⁵ Maon, Karmel, Ziph, Jutah,

⁵⁶ Jezreel, Jokdeam, Zanoah,

⁵⁷ Kain, Gibeah leh Timnah: a kiangkam khua lian tla hen khua râ an si.

⁵⁸ A dang Halhul, Bethzur, Gedor,

⁵⁹ Maarath, Bethanoth leh Eltekon: a kiangkam ah khua lian tla hen khua ruk an si.

⁶⁰ Chu lo chu Kiriat Baal, (mawh Kiriath Jearim) leh Rabah: a kiangkam mi khua tla hen khua nih an si.

⁶¹ Ramkaro mi chu Beth Arabah, Midin, Sekakah,

⁶² Nibsan, Chitê khuapi leh Engedi: a kiangkam khua lian tla hen khua ruk an si.

⁶³ Sikhawmsele Juda nih Jebus mi Jerusalem ah an um mi tla chu an nar kho lo, Juda mi tla hen munkhat hen an um ko.