JOSUA 13 - Bawm Common Language Bible Version

Ram Chu Lâk Vima Ding Hen A Um Nget Rih

¹ Josua chu thungâi a tar rawh. LALPA nih a sinah, “Na tar thlo rawh, ram chu lâk vima ding hen a um pung rih:

² Philistia ram leh Gesur ram tla,

³ simlei ram ah Avim zawzawng, (Sihor va Aigupta ramri thawk hen Kanaan mi nih Ekron an ti mi marlei tiang hen, Philistia lalchem tla chu Gaza, Asdod, Askelon, Gath leh Ekron ah an um.)

⁴ Kanaan ram chu a um vima rih, Mearah (chu chu Sidon mi tla tâ asi), Amor ramri leiah Aphek tiang hen;

⁵ Gebal ram, saklei kângah Lebanon zawzawng Baalgad thawk hen, chu chu Hermon Tlâng asi, Hamat Liamnâk tiang hen.

⁶ Hi hi Sidon ram zawzawng, Lebanon tlâng leh Misrephoth Maim karah mi tlâng ram ah um mi tla an si. Hi bang minung tla zawzawng hi Israel kalnâk kip mi chu ka nar phin na lai. Ram chu Israel tla sinah ti ding hen thu ka pêk hâwi hen Israel tla lakah na ṭhenh zâr na ding asi.

⁷ Tuah phun kua tla leh Manaseh phun khingkhuai rangah ṭhenh na le, mah rang chiau anna ting kho ding hen.

Jordan Va Saklei Ram ṭhenh Zârnâk.

⁸ Reuben leh Gad phun tla leh Manaseh phun khingkhuai tla nih LALPA to-aw Mosi nih a pêk na liauah ram chu anna ting ving rawh le, chu chu Jordan Va saklei ram asi.

⁹ An ram chu Aroer tiang (Arnon Va kiang) leh chu tivakuam lâi ah tivapi, ram tênâu Medeba thawk hen Dibon tiang telhsih ver asi.

¹⁰ A kal vima le, Amon ramri leh Amor lalchem Sihon nih Hezbon ah â ting mi tiang hen.

¹¹ Gilead ram fawnh sih hen, Gesur leh Maakah, Hermon Tlâng zawzawng leh Basan ram tla, Salekah tiang hen.

¹² Og lalchem Astarot leh Edrei ah lâirêltu Rephaim phun madung chem ram telhsih hen. Mosi nih hi bang minung tla hi a nar phin na.

¹³ Sikhawmsele, Israel tla nih Gesur leh Maakah ah mi chu an nar na lo; Israel tla sinah an um ko rih.

¹⁴ Mosi nih Levi phun tla rangah chun ram a pêk na lo. LALPA nih Mosi sinah a simh mi hâwi hen Israel LALPA leh Pathian mâichâm ah bâwlnâk lakah mi tingvo chu an vo ah ting ding an si bâk.

Reuben Phun Rangah Pêk Mi Ram

¹⁵ Mosi nih ram zeimaw zat chu Reuben dâwngsung rangah an tâ ding hen a pêk na rawh.

¹⁶ An ram chu Aroer tiang hen (Arnon Vakuam kiang) leh chu tivakuam lâi ah mi khuapi leh Medeba kiangkam mi ram tênek telhsih hen asi.

¹⁷ Hesbon leh chu ram tênâu khuapi tla, Dibon, Bamoth Baal, Beth Baalmeon.

¹⁸ Jahaz, Kedemoth, Mephath,

¹⁹ Kiriathaim Sibmah, Zereth Sahar tlângah mi leh tiva dung ah mi,

²⁰ Bethpeor, Pisgah Tlâng, Beth Jeshimoth tla chu an si.

²¹ Chu ram tênâu khuapi zawzawng leh Amor lalchem Sihon, Hesbon ah lâirêltu ram pumpi rêlsih hen. Mosi nih Midian lâirêltu khawm a neh: Evi, Rekem Zur, Hur leh Reba tla. Chubang zawzawng tla chu lalchem Sihon ram ah lâirêltu tla an si.

²² Chubang tla zawzawng lakah Israel mi tla nih an thah bâk mi chu Beor fapa Balaam malsâwmnâk simtu asi.

²³ Jordan Va chu Reuben phun tla umnâk thlanglei ram asi. Hi bang khuapi leh khua tla hi Reuben phun tla rangah anmah tâ ding hen pêk mi ram chu asi.

Gad Phun Tla Rangah Pêk Mi Ram

²⁴ Mosi nih Gad phun tla rang khawm ram zeimaw zat a pêk na bâk.

²⁵ An ram tla chu Jazer leh Gilead ram khuapi tla, Amon ram khingkhuai Aroer tiang hen, chu chu Rabah saklei ram asi.

²⁶ An ram chu Hesbon thawk hen Ramath, Mizpeh leh Betonim tiang, Mahanaim thawk hen Lodebar ramri tiang asi.

²⁷ Jordan Vakuam ah Beth Haram, Bethnimrah, Sukoth leh Saphon, Hesbon ah mi Sihon lalchem ram telhsih hen asi. Thlanglei mi ramri chu Jordan Va simlei kâng Galili Rilî tiang asi.

²⁸ Hi bang khuapi tla leh khua tla hi Gad phun tla tingvo rangah pêk asi.

Saklei Mi Manaseh Phun tla Rangah Pêk Mi tla Ram

²⁹ Mosi nih ram zeimaw zat chu Manaseh phun khingkhuai tla rangah an tâ siding hen a pêk na.

³⁰ An ram chu Mahanaim leikâng leh Basan ram Og lalchem telhsih hen asi. Basan ram ah Jair khua sâwmruk tla khawm an si.

³¹ Gileed ram khingkhuai Astarot, Edrei leh Basan ram ah mi Og lalchem khuapi tla telhsih hen. Hi bang zawng tla hi Makir fapa Manaseh phun thlâk khingkhuai tla rangah pêk mi chu asi.

³² Hi hi Mosi nih Moab phâi ah Jeriko leh Jordan Va saklei ram a ṭhen dân chu asi.

³³ Sikhawmsele, Mosi nih Levi phun tla rangah lam chun ram rerêng a pêk na lo. Israel tla LALPA Pathian vo chu an vo ding asi ti hen a simh na.